કેન્દ્ર સરકાર દ્વારા એમ્પ્લોઇઝ પ્રોવિડન્ટ ફંડ ઓર્ગેનાઇઝેશન (EPFO) હેઠળ ફરજિયાત કવરેજ માટેની વેજ સીલિંગ ₹15,000 થી વધારીને ₹25,000 પ્રતિ માસ કરી દેવામાં આવી છે. આ મહત્વપૂર્ણ બદલાવ 17 સપ્ટેમ્બર 2026 થી અમલમાં આવી ચૂક્યો છે. આ ફેરફારના કારણે ₹15,000 થી ₹25,000 ની વચ્ચે પગાર ધરાવતા લાખો કર્મચારીઓને હવે ઈપીએફ, પેન્શન અને વીમા યોજનાઓનો સીધો લાભ મળશે, જેઓ અગાઉ ઓછી પગાર મર્યાદાના કારણે આ સામાજિક સુરક્ષાથી વંચિત હતા. આ નિર્ણયથી આશરે 51 લાખ વધારાના કર્મચારીઓ પીએફના દાયરામાં આવશે.

નવી વેજ સીલિંગ લાગુ થયા બાદ તમામ કંપનીઓએ પોતાના પેરોલ સિસ્ટમ અને પીએફ યોગદાનની ગણતરીમાં ફેરફાર કરવા પડશે. સપ્ટેમ્બર મહિનાની સેલરી સ્લિપમાં આ ફેરફાર ક્યારથી અને કેવી રીતે દેખાશે તે કંપનીની પેરોલ પ્રક્રિયા પર આધાર રાખે છે. જો સપ્ટેમ્બરના મધ્યમાંથી વધારાનું યોગદાન બને છે અને તે જ મહિનાના પગારમાં કપાત થઈ શકતી નથી, તો કર્મચારીના હિસ્સાની રકમ આગામી પેરોલ સાયકલમાં એડજસ્ટ કરવામાં આવી શકે છે.

ઘણા કર્મચારીઓમાં એવો ભ્રમ છે કે નવી સીલિંગ બાદ દરેક કર્મચારીના ખાતામાંથી ફરજિયાત ₹3,000 કપાશે. પરંતુ વાસ્તવિકતામાં 12% યોગદાનની ગણતરી પીએફ વેજ અને નિયમો અનુસાર થશે. ઉદાહરણ તરીકે, જો કોઈ કર્મચારીનો પીએફ વેજ ₹25,000 છે, તો તેનું 12% લેખે યોગદાન ₹3,000 થશે. જોકે, જે કર્મચારીઓનું પીએફ કન્ટ્રિબ્યુશન અગાઉથી જ તેમના વાસ્તવિક પગારના આધારે કપાતું હતું, તેમના પગારમાં કોઈ મોટો બદલાવ આવશે નહીં.

​​​​​​​પીએફ યોગદાન વધવાથી કર્મચારીઓની ટેક-હોમ સેલરી (હાથમાં આવતો ચોખ્ખો પગાર) થોડી ઓછી થઈ શકે છે, પરંતુ બીજી તરફ નિવૃત્તિ માટેની બચતમાં મોટો વધારો થશે. આથી, કર્મચારીઓએ પોતાની સેલરી સ્લિપમાં પીએફ કપાત, એમ્પ્લોયરનું યોગદાન અને ઇપીએસ (EPS) નો હિસ્સો બરાબર ચકાસી લેવો જોઈએ. કર્મચારીઓ પોતાની કંપનીના એચઆર (HR) અથવા પેરોલ વિભાગનો સંપર્ક કરીને નવી વેજ સીલિંગની પોતાના પગાર પર થતી અસર અંગે માહિતી મેળવી શકે છે.