અમરેલી જિલ્લાના પોલીસ સ્ટેશનના ગુનાઓમાં નાસતા ફરતા અને પેરોલ જમ્પ કરનાર આરોપીઓને ઝડપી પાડવા જિલ્લા પોલીસ વડા સંજય ખરાતએ જિલ્લા પોલીસને સૂચના આપી હોય જેના પગલે અમરેલી એલસીબીના પીઆઈ વી.એમ.કોલાદરાની રાહબરીમાં પેરોલ ફર્લો સ્ક્વોડના પીએસાઈ આર.એલ.રાઠોડ અને પીએસઆઈ એન.જી.સાપરાના સુપરવિઝન હેઠળ ટીમ આરોપીઓને પકડવા પ્રયત્નશીલ હોય દરમિયાન સાવરકુંડલા રૂરલ પોલીસ મથકમાં ઓળિયા ગામે કરાળની સીમમાં આવેલી વાડીમાંથી તા.16-1ના 700 ફૂટ કેબલ વાયર કી.રૂ.35000નો કાપી ચોરી કર્યાની ફરિયાદ નોધવાઇ હતી આ ગુનામાં શકદાર તરીકે ગોવિંદ ઉર્ફે ગલ્લુ લલુભાઈ પરમાર (રહે-વરુડી રોડ, જગુ પુલ પાસે, અમરેલી)નું નામ ખુલતા આ ગુનામાં પોલીસ પકડથી બચવા નાસતો ફરતો હોવાથી હ્યુમન ઇન્ટેલિજન્સ અને ટેક્નિકલ સોર્સ મારફતે બાતમી મળી હતી કે ગોવિંદ અમરેલી રૂરલ પોલીસ મથકના વોરંટના ગુનામાં જેલમાં હોય અને હાલ જામીન પર છૂટી ઘરે જઈ રહ્યો છે. જે બાતમીના આધારે પેરોલ ફર્લો સ્ક્વોડએ જેલ રોડ પરથી જ ઝડપી લઇ આગળની કાર્યવાહી માટે સાવરકુંડલા રૂરલ પોલીસને સોંપ્યો હતો.

પોલીસની વિશેષ તપાસમાં ગોવિંદ સામે જૂનાગઢ સી ડિવિઝન પોલીસમાં જાહેરનામા ભંગ, ભાવનગર નિલમબાગ પોલીસમાં ચોરી, અમરેલી સીટી પોલીસમાં જુગાર, ચોરી, લાઠીમાં ગુનાહિત કાવતરું, અમરેલી રૂરલ પોલીસમાં દારૂના બે અને ચલાલા પોલીસમાં ચોરીના ગુનામાં ચોપડે ચડી ચુક્યો હોવાનું ખુલ્યું છે.