આંતરરાષ્ટ્રીય બજારમાં સોનાના ભાવોમાં સતત તેજી જોવા મળી રહી છે અને આજે સ્પોટ ગોલ્ડ પ્રતિ ઔંસ 4,383.73 ડોલરની વિક્રમી સપાટીએ પહોંચ્યું હતું. ભારતીય ઘરેલુ બજારમાં 24 કેરેટ સોનાનો 10 ગ્રામ રૂ.1,38,550 પર ટ્રેડ થઈ રહ્યો હતો. વૈશ્વિક સ્તરે વધી રહેલી અનિશ્ચિતતા, અમેરિકી ડોલરની નબળાઈ અને રોકાણકારોમાં સલામત સંપત્તિ તરફ વધતા ઝુકાવને કારણે સોનાના ભાવોમાં આ ઉછાળો નોંધાયો છે. ખાસ કરીને ગયા સપ્તાહે અમેરિકી ફેડરલ રીઝર્વ દ્વારા વ્યાજ દરોમાં ક્વાર્ટર-પોઇન્ટનો ઘટાડો કરવામાં આવ્યા બાદ આગામી સમયમાં વધુ ઘટાડાની અપેક્ષાએ બજારમાં સોનાની માંગને વધુ બળ આપ્યું છે.

નાણાકીય નિષ્ણાતો જણાવે છે કે વ્યાજ દરોમાં ઘટાડો થતાં વ્યાજ આપતી સંપત્તિઓની આકર્ષકતા ઘટે છે, જેના કારણે સોનાં જેવી બિન-વ્યાજદાર પરંતુ સલામત સંપત્તિમાં રોકાણ વધે છે. આ ઉપરાંત, અમેરિકી ડોલર ઇન્ડેક્સમાં થયેલા ઘટાડાએ પણ સોનાના ભાવને ટેકો આપ્યો છે. ડોલર નબળો પડતા અન્ય દેશોના રોકાણકારો માટે સોનું સસ્તુ બની જાય છે, જેના પરિણામે વૈશ્વિક માંગમાં વધારો થાય છે.

એક વર્ષમાં સોનાના ભાવમાં 67 ટકા વધારો 

આંકડાઓ મુજબ, છેલ્લા એક વર્ષમાં સોનાના ભાવોમાં લગભગ 67 ટકા જેટલો વધારો નોંધાયો છે. આ વધારો માત્ર નાણાકીય પરિબળોને કારણે નહીં પરંતુ ભૂ-રાજકીય અને વૈશ્વિક વેપાર તણાવને કારણે પણ થયો છે. વિવિધ પ્રદેશોમાં ચાલી રહેલા સંઘર્ષ, વેપાર નીતિઓને લઈને અનિશ્ચિતતા અને વૈશ્વિક અર્થતંત્રની ધીમી ગતિએ રોકાણકારોને જોખમથી દૂર રહેવા માટે પ્રેરિત કર્યા છે, અને તેનું સીધું લાભ સોનાને મળ્યો છે.

સતત સોનાની ખરીદી પણ ભાવ વધારાનું એક કારણ

સેન્ટ્રલ બેંકો દ્વારા સતત સોનાની ખરીદી પણ ભાવોમાં તેજીનું એક મહત્વપૂર્ણ કારણ માનવામાં આવે છે. ઘણા દેશોની સેન્ટ્રલ બેંકો પોતાના વિદેશી મુદ્રા ભંડારમાં વૈવિધ્યતા લાવવા અને ડોલર પરની નિર્ભરતા ઘટાડવા માટે મોટા પાયે સોનું ખરીદી રહી છે. આ લાંબા ગાળાની માંગે બજારમાં મજબૂત આધાર પૂરો પાડ્યો છે. આગામી સમયમાં પણ જો વૈશ્વિક અર્થતંત્રમાં અનિશ્ચિતતા યથાવત રહેશે, વ્યાજ દરો નીચા રહેવાની શક્યતા રહેશે અને ડોલર પર દબાણ ચાલુ રહેશે, તો સોનાના ભાવોમાં તેજી જળવાઈ રહેવાની સંભાવના નિષ્ણાતો વ્યક્ત કરી રહ્યા છે. પરિણામે, સોનું ફરી એક વખત રોકાણકારો માટે વિશ્વસનીય સલામત આશ્રય તરીકે પોતાની ભૂમિકા મજબૂત રીતે નિભાવતું દેખાઈ રહ્યું છે.