રાજકોટ જિલ્લાના ધોરાજી શહેરમાં જૂનાગઢ ફાટક પાસે એક અત્યંત હૃદયદ્રાવક અને કાળજું કંપાવી દેનારો અકસ્માત સર્જાયો છે. પૂરઝડપે આવી રહેલા એક બેફામ ડમ્પરે બાઇકને જોરદાર અડફેટે લેતાં ગંભીર અકસ્માત સર્જાયો હતો. આ ભયાનક બનાવમાં બાઇક પર સવાર દાદી અને તેમના 1 વર્ષના માસૂમ પૌત્રનું ઘટનાસ્થળે જ કમકમાટીભર્યું મોત નીપજ્યું હતું. આ ઘટનાને પગલે સમગ્ર વિસ્તારમાં અરેરાટી સાથે ભારે શોકની કાલીમા છવાઈ ગઈ છે.

પૂરઝડપે આવતા ડમ્પરે બાઇકને કચડી

મળતી માહિતી મુજબ, જૂનાગઢ ફાટક પાસેથી પસાર થઈ રહેલા બાઇક સવારોને પૂરઝડપે આવી રહેલા ડમ્પરના ચાલકે પોતાની ગફલતભરી ડ્રાઇવિંગના કારણે કચડી નાખ્યા હતા. ટક્કર એટલી પ્રચંડ હતી કે બાઇક પર સવાર સુમીબેન રાજુભાઈ સોલંકી અને તેમનો 1 વર્ષનો માસૂમ પૌત્ર પ્રિન્સ રોડ પર પટકાતાં ગંભીર ઈજાઓના કારણે સ્થળ પર જ કાળધર્મ પામ્યા હતા. એક જ પરિવારના દાદી અને માસૂમ પૌત્રના કરુણ મોતથી પરિવાર પર આભ તૂટી પડ્યું છે.

ડમ્પર ચાલક વાહન મૂકી ફરાર

આ ગોઝારા અકસ્માતમાં બાઇક ચલાવી રહેલા રાકેશભાઈ નામના વ્યક્તિને પણ શરીરે ગંભીર ઈજાઓ પહોંચી હતી. અકસ્માત સર્જાતાં જ આસપાસના સ્થાનિક લોકો તાત્કાલિક મદદ માટે દોડી આવ્યા હતા અને ગંભીર રીતે ઈજાગ્રસ્ત રાકેશભાઈને વધુ સારવાર અર્થે નજીકની હોસ્પિટલમાં ખસેડવામાં આવ્યા હતા. બીજી તરફ, અકસ્માત સર્જ્યા બાદ ડમ્પર ચાલક પકડાઈ જવાની બીકે પોતાનું ડમ્પર ઘટનાસ્થળે જ મૂકી ફરાર થઈ ગયો હતો.

પોલીસે ગુનો નોંધી આગળની તપાસ હાથ ધરી

બનાવની જાણ થતાં જ ધોરાજી પોલીસ કાફલો તાબડતોબ ઘટનાસ્થળે પહોંચી ગયો હતો. પોલીસે મૃતકોના મૃદુદેહને કબ્જે કરી પીએમ (પોસ્ટમોર્ટમ) અર્થે સરકારી હોસ્પિટલ ખસેડવાની તજવીજ હાથ ધરી હતી. આ સાથે જ પોલીસે અકસ્માત સર્જીને નાસી છૂટેલા અજાણ્યા ડમ્પર ચાલક સામે ગુનો નોંધી તેને ઝડપી પાડવા માટે ચક્રો ગતિમાન કર્યા છે. જૂનાગઢ ફાટક જેવા વ્યસ્ત વિસ્તારમાં અવારનવાર સર્જાતા અકસ્માતોને લઈને સ્થાનિકોમાં પણ ભારે રોષ જોવા મળી રહ્યો છે.