રાજ્યમાં હાલમાં મેઘરાજાની કૃપા અવિરતપણે વરસી રહી છે, જેના કારણે રાજ્યભરમાં વરસાદી માહોલ જામ્યો છે. સાર્વત્રિક અને ભારે વરસાદને કારણે સમગ્ર રાજ્યમાં અત્યાર સુધીમાં સીઝનનો સરેરાશના ૮૦.૨૩ ટકા જેટલો નોંધપાત્ર વરસાદ વરસી ચૂક્યો છે. ગુજરાતની જનતા માટે આશીર્વાદરૂપ એવો સરદાર સરોવર નર્મદા ડેમ તેની જળસપાટીના ભરાવ સાથે ૯૪.૭૪ ટકા જેટલો ભરાઈ ગયો છે. જ્યારે રાજ્યના ૩૫ મહત્વપૂર્ણ જળાશયોને 'હાઈએલર્ટ' પર મૂકવામાં આવ્યા છે

રાજ્યમાં પડી રહેલા સારા વરસાદના પગલે ખેતીની જીવાદોરી સમાન જળાશયોમાં પાણીની આવકમાં ઉત્તરોત્તર મોટો વધારો થયો છે. આ ઉપરાંત, રાજ્યના અન્ય કુલ ૨૦૬ જળાશયોમાં હાલ ૬૬.૯૯ ટકા જેટલો પાણીનો સંગ્રહ નોંધાયો છે, જે આગામી દિવસોમાં પીવાના અને સિંચાઈના પાણીની જરૂરિયાતો માટે ખૂબ જ રાહતજનક સમાચાર છે.

જળાશયોમાં સતત થઈ રહેલી પાણીની આવક અને જળસપાટીમાં થતા વધારાને ધ્યાનમાં રાખીને વહીવટી તંત્ર દ્વારા વિશેષ સાવચેતી રાખવામાં આવી રહી છે. સુરક્ષાના ભાગરૂપે રાજ્યના કુલ ૩૫ મહત્વપૂર્ણ જળાશયોને 'હાઈએલર્ટ' પર મુકવામાં આવ્યા છે. આ ઉપરાંત, સંભવિત જોખમને પહોંચી વળવા ૧૩ જળાશયોને 'એલર્ટ' પર તથા ૧૧ જળાશયોને 'વોર્નિંગ' પર રાખવામાં આવ્યા છે. જળસપાટી પર સરકારી તંત્ર દ્વારા સતત અને સઘન નજર રાખવામાં આવી રહી છે જેથી કોઈપણ અનિચ્છનીય પરિસ્થિતિને ટાળી શકાય.

હવામાન વિભાગ દ્વારા આગામી દિવસોમાં પણ રાજ્યના કેટલાક વિસ્તારોમાં ભારેથી અતિભારે વરસાદની આગાહી કરવામાં આવી છે. આ આગાહીને પગલે રાજ્યનું વહીવટી તંત્ર સંપૂર્ણપણે એલર્ટ મોડ પર આવી ગયું છે. સંભવિત આપત્તિઓ અને નીચાણવાળા વિસ્તારોમાં સર્જાતી મુશ્કેલીઓનો સામનો કરવા માટે સ્ટેટ ડિઝાસ્ટર રિસ્પોન્સ ફોર્સ અને નેશનલ ડિઝાસ્ટર રિસ્પોન્સ ફોર્સની ટીમોને તૈનાત કરવામાં આવી છે. રાજ્યના સંવેદનશીલ જિલ્લાઓમાં એનડીઆરએફની કુલ નવ ટીમોને સ્ટેન્ડબાય રાખવામાં આવી છે જેથી કોઈપણ કટોકટીના સમયે તાત્કાલિક રાહત અને બચાવ કામગીરી હાથ ધરી શકાય.