ભારત હવે રિયલ એસ્ટેટ ક્ષેત્રે વિદેશી રોકાણ આકર્ષવાના મામલામાં ચીનને પાછળ છોડીને આગળ નીકળી ગયું છે. વૈશ્વિક રોકાણકારો હવે એશિયામાં પ્રોપર્ટીમાં નાણાં રોકવા માટે ચીન કરતાં ભારતને વધુ પ્રાથમિકતા આપી રહ્યા છે અને તેને વધુ પસંદ કરી રહ્યા છે. પ્રોપર્ટી કન્સલ્ટન્સી ફર્મ 'સેવિલ્સ' દ્વારા બહાર પાડવામાં આવેલા એક નવા રિપોર્ટ અનુસાર, ચાલુ વર્ષના પહેલા નવ મહિનામાં ભારતના રિયલ એસ્ટેટ બજારમાં કુલ ૫.૫ અબજ ડોલર એટલે કે આશરે ૪૯ હજાર કરોડ રૂપિયાનું વિદેશી રોકાણ આવ્યું છે. જ્યારે તેની સામે આ જ સમયગાળા દરમિયાન ચીનમાં રિયલ એસ્ટેટ ક્ષેત્રનું કુલ વિદેશી રોકાણ માત્ર ૩.૭ અબજ ડોલર એટલે કે આશરે ૩૩ હજાર કરોડ રૂપિયા જેટલું જ રહ્યું છે. આનો સ્પષ્ટ અર્થ એ થાય કે ભારતને ચીનના મુકાબલે આશરે ૫૦ ટકા જેટલી વધુ વિદેશી મૂડી પ્રાપ્ત થઈ છે. 
  

આ મોટા બદલાવ પાછળનું સૌથી મોટું અને મુખ્ય કારણ ભારતમાં કોમર્શિયલ પ્રોપર્ટી અને ખાસ કરીને ડેટા સેન્ટરની વધતી જતી માંગ છે. આજની તારીખમાં ડિજિટલ સેવાઓ, ક્લાઉડ કમ્પ્યુટિંગ અને એઆઈના ઝડપી વિસ્તારને કારણે દેશમાં ડેટા સેન્ટરના નિર્માણ માટે રોકાણની નવી તકો મોટા પ્રમાણમાં પેદા થઈ છે. રિપોર્ટમાં જણાવ્યા મુજબ, ભારતમાં એકલા ડેટા સેન્ટર ક્ષેત્રમાં જ ૩.૯ અબજ ડોલરનું જંગી રોકાણ થયું છે. આ આંકડો ઓફિસ પ્રોપર્ટીમાં લગાવવામાં આવેલા કુલ રોકાણ કરતા લગભગ બમણો છે. વૈશ્વિક કંપનીઓ ભારતમાં ડેટા સેન્ટર બનાવવા અને મજબૂત ડિજિટલ ઇન્ફ્રાસ્ટ્રક્ચરનો વિસ્તાર કરવા માટે મોટી રકમનું રોકાણ કરી રહી છે, આ ઉપરાંત વિકાસ કાર્યો માટે જમીન ખરીદવામાં પણ રોકાણકારોની ભારે રસ દાખવી રહ્યા છે.   

ભારતીય રિયલ એસ્ટેટ બજારમાં વિદેશી રોકાણકારો કેમ આટલા બધા આકર્ષાઈ રહ્યા છે, તેના કેટલાક મુખ્ય કારણો પણ રિપોર્ટમાં સ્પષ્ટ કરવામાં આવ્યા છે. ભારતમાં પ્રીમિયમ શ્રેણીની ઓફિસો એટલે કે 'ગ્રેડ-એ' પ્રોપર્ટી પર રોકાણકારોને વાર્ષિક ૭.૭૫ થી આઠ ટકા સુધીનું શાનદાર રિટર્ન મળી રહ્યું છે. ઓફિસ પ્રોપર્ટીના ભાડામાં દર વર્ષે સાતથી આઠ ટકાનો સારો એવો વધારો થઈ રહ્યો છે, જેના કારણે રોકાણકારોને પ્રોપર્ટીની કિંમતમાં થતા વધારાની સાથેસાથે નિયમિત ભાડા દ્વારા પણ મજબૂત આવક કમાવવાની સુવર્ણ તક મળી રહી છે.   

હાલમાં ભારતની આશરે ૩૬ ટકા વસ્તી શહેરોમાં વસવાટ કરે છે અને દર વર્ષે લગભગ ૧.૨ કરોડ લોકો શહેરી વસ્તીમાં ઉમેરાઈ રહ્યા છે. આનાથી આગામી સમયમાં ઓફિસો, કોમર્શિયલ સ્પેસ અને અન્ય પ્રોપર્ટીઓની માંગમાં જબરદસ્ત ઉછાળો આવવાની પૂરેપૂરી સંભાવના છે. દેશભરમાં ડેટા સેન્ટર, ક્લાઉડ સર્વિસિસ અને ડિજિટલ કારોબારના થઈ રહેલા વ્યાપક વિસ્તારને કારણે તદ્દન નવા પ્રકારની કોમર્શિયલ પ્રોપર્ટીઓમાં રોકાણનું પ્રમાણ ખૂબ જ ઝડપથી વધી રહ્યું છે.