સોમનાથ મંદિર આસપાસના ચોક્કસ વિસ્તારોમાં માંસાહારી ખોરાકના વેચાણ અને સંગ્રહ પર પ્રતિબંધ મૂકતા રાજ્ય સરકારના જાહેરનામાને ગુજરાત હાઈકોર્ટમાં પડકારવામાં આવ્યું હતું. સોમનાથના 06 નોનવેજ રેસ્ટોરન્ટના માલિકો દ્વારા દાખલ કરવામાં આવેલી આ અરજી પર સુનાવણી હાથ ધરીને હાઈકોર્ટે સિંગલ જજની બેન્ચ સમક્ષ આજે મોટો ચુકાદો આપ્યો છે. હાઈકોર્ટે રાજ્ય સરકારના આ વિવાદાસ્પદ જાહેરનામાને રદ્દ કરી નાખ્યું છે, જેના કારણે સરકારને મોટો ઝટકો લાગ્યો છે.

સ્ટેની માંગણી ફગાવી, સરકારી વકીલ ડબલ બેન્ચમાં પહોંચ્યા

ચુકાદો આવ્યા બાદ રાજ્ય સરકારે સિંગલ જજ સમક્ષ અપીલમાં જવા માટે શરૂઆતમાં 07 દિવસનો સ્ટે (રોક) માંગ્યો હતો. જો કે કોર્ટે આ માંગણી ફગાવી દીધા બાદ સરકારે 02 દિવસનો સ્ટે માંગ્યો હતો. કોર્ટે આ માંગણી પણ ફગાવી દેતા સ્પષ્ટ શબ્દોમાં જણાવ્યું હતું કે આ અરજદારોની રોજીરોટી અને આજીવિકાનો પ્રશ્ન છે. સિંગલ જજના આ હુકમ સામે નારાજ સરકારી વકીલ તાત્કાલિક ધોરણે ચીફ જસ્ટિસની ડબલ બેન્ચ સમક્ષ પહોંચ્યા હતા અને સિંગલ જજના ઓર્ડરને પડકારવા માટે તાત્કાલિક સુનાવણીની માંગણી કરી છે.

બંધારણીય અધિકારોના ઉલ્લંઘનનો દાવો

મૂળ અરજી અનુસાર, અરજદાર રેસ્ટોરન્ટ્સ એવા માર્ગો પર આવેલા છે, જે સરકારે ઓગસ્ટ મહિનામાં ઈશ્યૂ કરેલા જાહેરનામામાં નિર્દિષ્ટ કરેલા 06 પ્રતિબંધિત વિસ્તારો પૈકી એકમાં આવે છે. આ જાહેરનામા દ્વારા માંસાહારી ખાદ્ય પદાર્થોના વેચાણ પર કાયમી પ્રતિબંધ લાદવામાં આવ્યો હતો. અરજદારોના એડવોકેટ અસરા૨ મન્સૂરીએ કોર્ટમાં ശക്ത દલીલ કરી હતી કે સરકારનો આ નિર્ણય ભારતીય બંધારણના અનુચ્છેદ 19(1)(g) હેઠળ નાગરિકોને આપવામાં આવેલા વેપાર અને વ્યવસાય કરવાના મૌલિક અધિકારોનું સીધું ઉલ્લંઘન કરે છે. તેમણે રજૂઆત કરી હતી કે અધિકારીઓ પાસે કોઈ પણ વાજબી અને કાયદેસરના કારણ વગર વ્યક્તિને તેનો વેપાર કે આજીવિકા મેળવતા અટકાવવાનો અધિકાર નથી.

સરકારની દલીલ અને ભક્તોની ધાર્મિક ભાવનાઓનો મુદ્દો

બીજી બાજુ, રાજ્ય સરકાર તરફથી રજૂઆત કરવામાં આવી હતી કે સોમનાથ મંદિરની 500 મીટરની ત્રિજ્યામાં તેમજ અન્ય ધાર્મિક સ્થળો આવેલા છે તેવા 06 સંવેદનશીલ વિસ્તારોમાં યાત્રાળુઓની ધાર્મિક ભાવનાઓને ઠેસ ન પહોંચે તે હેતુથી માસાહારી ખોરાક પર પ્રતિબંધ મૂકવામાં આવ્યો છે. સરકારી વકીલે એવી પણ રજૂઆત કરી હતી કે અરજદારોની દુકાનો અને રેસ્ટોરન્ટ્સ સીધા સોમનાથ મંદિર તરફ જતા મુખ્ય માર્ગ પર જ આવેલા છે, જેના કારણે દર્શને આવતા તમામ યાત્રાળુઓને નોનવેજ ખાદ્યપદાર્થોનો સામનો કરવો પડે છે. અરજદારોએ સામે આક્ષેપ કર્યો હતો કે સત્તાવાળાઓએ તેમને તેમની હોટેલો બંધ કરવા માટે બળપૂર્વક મજબૂર કર્યા હતા અને અધિકારીઓ સતત તેમને માનસિક રીતે હેરાન કરી રહ્યા છે.

મામલતદાર દ્વારા સહી કરાવવાનો વિવાદાસ્પદ મુદ્દો

સુનાવણી દરમિયાન એક અત્યંત ચોંકાવનારો મુદ્દો સામે આવ્યો હતો. અરજદારના જણાવ્યા અનુસાર, જ્યારે ગત 7 ઓક્ટોબરે હાઈકોર્ટમાં આ કેસની પહેલી સુનાવણી ચાલી રહી હતી, તે જ દિવસે સ્થાનિક મામલતદારે આ 06 અરજદારોને બોલાવીને પોલીસ ચોકીમાં એક કબૂલાતનામા પર બળજબરીપૂર્વક સહીઓ કરાવી લીધી હતી. આ કબૂલાતનામામાં એવું લખાણ હતું કે તેઓ ભવિષ્યમાં ક્યારેય નોનવેજ ખોરાક નહીં વેચે અને માત્ર શાકાહારી ચીજવસ્તુઓનો જ વેપાર કરશે. આ ગંભીર બાબતની નોંધ લઈને હાઈકોર્ટે પણ સરકારને આડે હાથ લીધી હતી અને કડક સવાલ કર્યો હતો કે જ્યારે હાઈકોર્ટમાં આ કેસની ન્યાયિક સુનાવણી ચાલી રહી હતી, તે જ દિવસે મામલતદારે આ રેસ્ટોરન્ટ માલિકો પાસે આવી સહીઓ કેમ લીધી? આ સમગ્ર પ્રકરણે આગામી દિવસોમાં વધુ રાજકીય અને કાનૂની ગરમાવો લાવવાના એંધાણ વર્તાઈ રહ્યા છે.