દેશમાં વસ્તીની સરખામણીમાં ન્યાયાધીશોની ઓછી સંખ્યા પર અફસોસ વ્યક્ત કરતા સુપ્રીમ કોર્ટે કહ્યું કે ન્યાયિક અધિકારીઓ પર કામનો વધુ પડતો બોજ છે, જેના કારણે તેઓ ભૂલો કરે છે. સુપ્રીમ કોર્ટે શુક્રવારે યાદ અપાવ્યું કે 2002માં આપેલા નિર્ણયમાં 2007 સુધીમાં નીચલી અદાલતોમાં 10 લાખની વસ્તી દીઠ 50 જજ રાખવાની સૂચના આપવામાં આવી હતી, પરંતુ 2024 સુધીમાં આ રેશિયો 25 જજો સુધી પણ પહોંચી
શક્યો નથી.
જસ્ટિસ અભય એસ.ઓકા, જસ્ટિસ એ.અમાનુલ્લાહ અને જસ્ટિસ એજે મસીહની બેન્ચે દિલ્હી હાઈકોર્ટના ચુકાદામાં સેશન્સ જજ વિરુદ્ધ કરવામાં આવેલા અવલોકનોને રદ કરવા માટે દાખલ કરવામાં આવેલી અરજી પરના તેના ચુકાદામાં આ અવલોકન કર્યું હતું. ખંડપીઠે આ ટિપ્પણીઓને હાઈકોર્ટના નિર્ણયમાંથી દૂર કરવાનો નિર્દેશ આપ્યો હતો.
સુપ્રીમ કોર્ટની બેન્ચે કહ્યું કે હાઈકોર્ટે નીચલી કોર્ટના આદેશોને રદબાતલ કરતી વખતે ન્યાયિક અધિકારીઓની વ્યક્તિગત ટીકા ટાળવી જોઈએ. ઘણા સારા ચુકાદાઓ લખ્યા પછી, ન્યાયાધીશ કામના દબાણ અથવા અન્ય કારણોસર નિર્ણયમાં ભૂલ કરી શકે છે.