રણબીર કપૂરની ‘રામાયણ’નું ટ્રેલર રિલીઝ થયા પછી રોકિંગ સ્ટાર યશ સતત ચર્ચામાં રહ્યા છે. આ ટ્રેલરમાં યશને રાવણના દમદાર અવતારમાં જોઈને દરેક લોકો આશ્ચર્યચકિત થઈ ગયા હતા અને તેમણે એકલા જ બધી વાહવાહી લૂંટી લીધી હતી. ‘રામાયણ’ના ભારે ક્રેઝ વચ્ચે હવે યશની આગામી ફિલ્મ ‘ટોક્સિક’ વિશે એક મોટું અપડેટ સામે આવ્યું છે. અહેવાલો મુજબ, આ ફિલ્મનું ટ્રેલર આવતા અઠવાડિયે રિલીઝ કરવા માટે મેકર્સ સંપૂર્ણ તૈયાર છે.
મીડિયા રિપોર્ટ્સ અનુસાર, ‘ટોક્સિક’ના મેકર્સ ૮ ઓગસ્ટ ૨૦૨૬ ના રોજ ફિલ્મનું ટ્રેલર રિલીઝ કરવાની યોજના બનાવી રહ્યા છે. આ માટે બેંગલુરુમાં એક ગ્રાન્ડ ટ્રેલર લોન્ચ ઈવેન્ટનું આયોજન કરવામાં આવે તેવી શક્યતા છે. બેંગલુરુના આ ઈવેન્ટ પછી મેકર્સ સમગ્ર ભારતના વિવિધ શહેરોમાં જોરદાર પ્રમોશનલ ટૂર પણ કરશે, જોકે આ અંગે હજુ સુધી કોઈ સત્તાવાર જાહેરાત કરવામાં આવી નથી.

આ એક્શન-થ્રિલર ફિલ્મનું નિર્દેશન ગીતુ મોહનદાસે કર્યું છે. ફિલ્મમાં યશ ઉપરાંત કિઆરા અડવાણી, તારા સુતારિયા, હુમા કુરેશી, નયનતારા, રુકમિણી વસંત અને અક્ષય ઓબેરોય જેવા ઘણા જાણીતા કલાકારો જોવા મળશે. ફિલ્મનું મ્યુઝિક રવિ બસરુરે તૈયાર કર્યું છે, જ્યારે ઈન્ટરનેશનલ એક્શન કોરિયોગ્રાફર જેજે પેરી અને અનબરીવની જોડીએ ફિલ્મના એક્શન સીન્સ ડિઝાઇન કર્યા છે. કેવીએન પ્રોડક્શનના બેનર હેઠળ બનેલી આ ફિલ્મ કન્નડ અને અંગ્રેજી ઉપરાંત હિન્દી, મલયાલમ, તેલુગુ અને તમિલ ભાષાઓમાં રિલીઝ થશે.