યમન અને સોમાલિયાના દરિયાઈ વિસ્તાર પાસે ચાંચિયાઓ (દરિયાઈ લૂંટારૂઓ) દ્વારા 2 જહાજોનું અપહરણ (Hijack) કરવામાં આવ્યું હોવાની એક ચોંકાવનારી ઘટના સામે આવી છે. આ બંને વિદેશી ફ્લેગ ધરાવતા વ્યાપારી જહાજો (Commercial Vessels) પર કુલ 30 ક્રૂ મેમ્બર્સ સવાર હતા, જેમાં 22 ભારતીય નાગરિકો નો પણ સમાવેશ થાય છે. ભારતીય વિદેશ મંત્રાલયે (MEA) આ ઘટના અંગે સત્તાવાર પુષ્ટિ કરીને મહત્વની માહિતી આપી છે. આ સમગ્ર ઘટનાક્રમ અંગેનો અહેવાલ નીચે મુજબ છે.

વિદેશ મંત્રાલયના પ્રવક્તા રણધીર જાયસ્વાલે પ્રેસ બ્રીફિંગ દરમિયાન માહિતી આપતાં જણાવ્યું હતું કે આંતરરાષ્ટ્રીય જળસીમામાં બનેલી આ ઘટનામાં હાઇજેક કરાયેલા બંને જહાજો પર સવાર તમામ 22 ભારતીય નાવિકો સુરક્ષિત છે. વિદેશ મંત્રાલયના જણાવ્યા અનુસાર પ્રથમ જહાજ 'MT Sibu 1' પર 16 ભારતીય નાગરિકો સવાર છે. જ્યારે બીજા જહાજ 'M/V Lutuf' પર 6 ભારતીય નાગરિકો સવાર છે.

​​​​​​​ભારતીય તંત્ર સતત સંપર્કમાં
ભારતીય વિદેશ મંત્રાલય અને સંબંધિત એજન્સીઓ આ મામલે આંતરરાષ્ટ્રીય દરિયાઈ સુરક્ષા દળો અને સ્થાનિક સત્તાવાળાઓ સાથે સતત સંપર્કમાં છે. જહાજ પર સવાર નાગરિકોની સુરક્ષા સુનિશ્ચિત કરવા અને તેમને વહેલી તકે સલામત રીતે છોડાવવા માટે જરૂરી રાજદ્વારી અને સુરક્ષાત્મક પગલાં ભરવામાં આવી રહ્યા છે.