રાજકોટ શહેરમાં સાયબર ગઠીયાઓ દ્વારા લોકોને ડરાવીને નાણાં પડાવવાની ઠગાઈના કિસ્સાઓ દિનપ્રતિદિન વધી રહ્યા છે. તાજેતરમાં જ રાજકોટ પોલીસે સતર્કતા દાખવીને એક ૭૫ વર્ષીય વૃદ્ધ દંપતીને સાયબર ગઠીયાઓની 'ડિજિટલ એરેસ્ટ' નામની ચુંગાલમાંથી સફળતાપૂર્વક મુક્ત કરાવ્યા છે. આ સમયસૂચકતાને કારણે દંપતી સાથે થનાર લાખો રૂપિયાનું મોટું ફ્રોડ અટકી ગયું છે, જેનાથી સમગ્ર વિસ્તારમાં રાહતની લાગણી ફેલાઈ ગઈ છે.

ઘટનાની વિગતો મુજબ, રાજકોટ શહેરના કાલાવડ રોડ પર રહેતા ૭૫ વર્ષીય વૃદ્ધને રાત્રે અડધી રાતે એટલે કે અંદાજે ૨:૪૬ વાગ્યે એક અજાણ્યો ફોન આવ્યો હતો. ફોન કરનાર યુવતીએ પોતાની ઓળખ TRAI (ટ્રાઈ)ના અધિકારી પ્રીતિ વર્મા તરીકે આપી હતી. થોડીવારની વાતચીત બાદ તેણે ફોન તેના કથિત ઉપરી અધિકારીને આપ્યો હતો. ત્યારબાદ બીજા મોબાઈલ નંબર પરથી વિડિયો કોલ કરવામાં આવ્યો હતો, જેમાં સામેવાળા વ્યક્તિનો ચહેરો દેખાતો ન હતો, પરંતુ તેમણે બંને દંપતીને બાજુ-બાજુમાં ખુરશી પર બેસી જવાની સખત સૂચના આપી હતી.

ગઠીયાઓએ વૃદ્ધનું આધાર કાર્ડ ચેક કરીને એવો ખોટો ડર બતાવ્યો હતો કે તેમના આધાર કાર્ડનો દુરુપયોગ કરીને બેંક એકાઉન્ટ ખોલવામાં આવ્યું છે, જેમાં બે કરોડ રૂપિયાનું ફ્રોડ ટ્રાન્ઝેક્શન થયું છે. આ એક ખૂબ જ મોટો કેસ હોવાનું કહીને તેમને આગામી ૩ થી ૯ દિવસ સુધી સર્વેલન્સમાં રાખીને 'ડિજિટલ એરેસ્ટ' કરવામાં આવ્યા હોવાનું જણાવીને માનસિક રીતે ડરાવવામાં આવ્યા હતા. વળી, ગઠીયાઓએ ધાક બેસાડવા માટે ગાડીમાંથી રિવોલ્વર મંગાવવાની વાતો પણ કરી હતી.

ઠગાઈ કરનારાઓએ દંપતીને ઘરના દરવાજા અંદરથી લોક કરી દેવા, ફોન સતત ચાર્જિંગમાં રાખીને વિડિયો કોલ ચાલુ રાખવા, ઘરકામ માટે આવનાર વ્યક્તિને પણ પ્રવેશ ન આપવા અને કોઈને પણ ફોન ન કરવાની સખત તાકીદ કરી હતી. આ મામલે મુંબઈ જેલની ધમકી આપીને ૨૫ લાખ રૂપિયા પડાવવા માટે ધીમે-ધીમે દબાણ વધારવામાં આવ્યું હતું. સતત ચાર કલાક સુધી આ માનસિક ત્રાસ સહન કર્યા બાદ વૃદ્ધ દંપતીમાં હિંમત આવી હતી અને તેઓએ તાત્કાલિક ૧૧૨ પોલીસ કંટ્રોલ રૂમમાં ફોન કરીને સમગ્ર ઘટનાની જાણ કરી હતી.

માહિતી મળતાની સાથે જ પોલીસ કંટ્રોલ રૂમે સાયબર ક્રાઈમ પોલીસને સતર્ક કરી હતી. સાયબર ક્રાઈમ પોલીસ સ્ટેશનના પી.આઈ. એમ.ડી. ગઢવી અને તેમની ટીમ તુરંત જ વૃદ્ધ દંપતીના ઘરે દોડી ગઈ હતી અને તેમને રૂબરૂ મળીને સમજાવ્યું હતું કે કાયદામાં 'ડિજિટલ એરેસ્ટ' જેવું કોઈ જોગવાઈ કે પ્રાવધાન હોતું જ નથી. આ માત્ર એક સાયબર સ્કેમ છે. પોલીસે દંપતીને સાયબર ફ્રોડથી બચાવી લીધા બાદ કાયદાકીય સમજણ આપી હતી અને આશ્વાસન આપ્યું હતું. આ માەલે પોલીસે કાયદેસરની કાર્યવાહી હાથ ધરી છે અને સિનિયર સિટીઝનોને અપીલ કરી છે કે આવા કોઈ પણ ડરામણા કોલથી ઘભરાવું નહીં.​​​​​​​

વૃદ્ધે રાત્રે જ પોલીસની મદદ માગતા ફ્રોડ થતું અટક્યું

4 કલાક બાદ વૃદ્ધને હિંમત આવતા તેઓએ 112 પોલીસ કંટ્રોલમાં જાણ કરતા કંટ્રોલ રૂમ દ્વાર સાયબર ક્રાઇમ પોલીસને જાણ કરતા તુરંત પીઆઇ એમ ડી ગઢવી અને તેમની ટિમ વૃદ્ધ દંપતીના ઘરે પહોંચી હતી અને ડિજિટલ એરેસ્ટ જેવું કશું હોતું નથી આ માત્ર સાયબર ફ્રોડ તેવી સમજણ આપી તેમના સાથે થનાર રૂપિયા 25 લાખનું સાય ફ્રોડ થતા અટકાવ્યું હતું અને તેમને કાયદા વિષે સાચી સમજણ આપી બાદમાં આશ્વાસન આપી તેમની સાત થયેલ ડિજિટલ એરેસ્ટ અંગે માહિતી મેળવી કાયદેસરની કાર્યવાહી હાથ ધરવામાં આવી છે.