બજારના અહેવાલો અને સત્તાવાર આંકડાઓ અનુસાર સોના અને ચાંદીના રોકાણકારો માટે આંચકાજનક સમાચાર સામે આવ્યા છે. સ્થાનિક વાયદા બજાર (એમસીએક્સ) માં કિંમતી ધાતુઓના ભાવમાં મોટો કડાકો જોવા મળ્યો છે. વૈશ્વિક દબાણ અને સ્થાનિક બજારમાં આવેલી વેચવાલીના કારણે સોનામાં આજે રૂ.1557 અને ચાંદીમાં રૂ.2740 સુધીનો મોટો ઘટાડો નોંધાયો છે. ટ્રેડિંગ સેશનની શરૂઆતથી જ બંને કિંમતી ધાતુઓ લાલ નિશાનમાં કારોબાર કરી રહી છે.

સોનાના ભાવમાં આજે મોટું દબાણ જોવા મળ્યું છે. મલ્ટી કોમોડિટી એક્સચેન્જ પર 5 ઓગસ્ટની એક્સપાયરી વાળું સોનું અગાઉના બંધ ભાવ રૂ.1,42,257.00 ની સામે રૂ.1,41,148.00 પર ઓપન થયું હતું. દિવસ દરમિયાન તે રૂ.1,40,740.00 ના નીચલા સ્તરે પહોંચી ગયું હતું. હાલમાં સોનાનો લાઈવ ભાવ રૂ.1,145.00 (-0.80%) ના ઘટાડા સાથેરૂ.1,41,112.00 પર ટ્રેડ થઈ રહ્યો છે.

ચાંદીના ભાવમાં સોના કરતાં પણ વધુ તીવ્ર ઘટાડો નોંધાયો છે. MCX પર 4 સપ્ટેમ્બરની એક્સપાયરી વાળી ચાંદી અગાઉના બંધ ભાવ રૂ.2,23,189.00 ની સામે રૂ.2,21,926.00 ના સ્તરે ગેપ-ડાઉન ઓપન થઈ હતી. દિવસ દરમિયાન ચાંદીમાં ભારે અસ્થિરતા વચ્ચે તે ₹2,20,449.00 ના લોઅર લેવલ સુધી ગગડી ગઈ હતી. હાલમાં ચાદીનો લાઈવ ભાવ રૂ2,509.00 (-1.12%) ના મોટા ઘટાડા સાથે કિલોગ્રામ દીઠ ₹2,20,680.00 પર આવી ગયો છે.

નિષ્ણાતોના મતે વૈશ્વિક બજારમાં થઈ રહેલી હલચલ આ ઘટાડા માટે મુખ્યત્વે જવાબદાર છે. મોંઘા ક્રૂડની અસર: અમેરિકા અને ઈરાન વચ્ચેના રાજદ્વારી તણાવ તેમજ હોર્મુઝની સામુદ્રધુનીના બ્લોકેડને કારણે આંતરરાષ્ટ્રીય બજારમાં ક્રૂડ ઓઈલના ભાવ વધ્યા છે, જેનાથી ફુગાવાનું જોખમ વધ્યું છે. ઉપરાંત ફુગાવો વધવાના ડરથી અમેરિકાની સેન્ટ્રલ બેંક વ્યાજદરોમાં વહેલી તકે ઘટાડો નહીં કરે તેવી શક્યતા પ્રબળ બની છે, જે સોના માટે નકારાત્મક ગણાય છે. આ સિવાય વૈશ્વિક અનિશ્ચિતતા વચ્ચે રોકાણકારો સુરક્ષિત રોકાણ તરીકે યુએસ ડોલર તરફ વળ્યા છે. ડોલર ઇન્ડેક્સ મજબૂત થતાં કિંમતી ધાતુઓ પર દબાણ વધ્યું છે. છેલ્લા કેટલાક સમયથી સોના અને ચાંદીના ભાવ ઓલ-ટાઇમ હાઇ સપાટી પર હોવાથી નીચલા સ્તરેથી રોકાણકારોએ આ સ્તરે નફો વસૂલવાનું (Profit Booking) યોગ્ય માન્યું છે.