ટીવી સીરિયલ ‘રામાયણ’ દ્વારા દેશ-વિદેશના કરોડો દર્શકોના દિલમાં ભગવાન રામ તરીકે વસેલા અભિનેતા અરુણ ગોવિલ હવે ફરી એક વખત રામાયણની દુનિયામાં વાપસી કરવા જઈ રહ્યા છે, પરંતુ આ વખતે સંપૂર્ણપણે અલગ અને નવી ભૂમિકામાં. દાયકાઓ સુધી ભગવાન રામના આદર્શ સ્વરૂપ તરીકે ઓળખાયેલા અરુણ ગોવિલ, નિર્દેશક નિતેશ તિવારીની આગામી ભવ્ય ફિલ્મ ‘રામાયણ’માં રાજા દશરથના પાત્રમાં નજરે પડશે. આ સમાચાર બહાર આવતા જ ફિલ્મ ઇન્ડસ્ટ્રી તેમજ દર્શકોમાં ચર્ચા શરૂ થઈ ગઈ છે.

આ ફેરફાર અંગે ટીવી શો ‘રામાયણ’માં માતા સીતાની ભૂમિકા ભજવનાર દીપિકા ચિખલિયાએ પણ પોતાની પ્રતિક્રિયા આપી હતી. તેમણે જણાવ્યું હતું કે અરુણ ગોવિલને ભગવાન રામ સિવાય અન્ય કોઈ પાત્રમાં જોવું તેમને થોડું અજીબ લાગે છે. વર્ષો સુધી રામ-સીતા તરીકે લોકોના મનમાં વસેલા કલાકારોને અલગ ભૂમિકામાં સ્વીકારવું સહેલું નથી, એમ તેમનો ભાવ હતો.
દીપિકા ચિખલિયાની આ ટિપ્પણી પર પ્રતિભાવ આપતાં અરુણ ગોવિલે મીડિયાને જણાવ્યું કે આ દીપિકાનો વ્યક્તિગત અભિપ્રાય છે અને દરેકને પોતાનો મત વ્યક્ત કરવાનો અધિકાર છે. તેમણે કહ્યું, “હું તેમના વિચારોનો પૂરો સન્માન કરું છું. મેં ક્યારેય મારા જૂના પાત્રને નકાર્યું નથી, પરંતુ એક અભિનેતા તરીકે નવા પાત્રને પણ સંપૂર્ણ પ્રામાણિકતા અને સમર્પણ સાથે સ્વીકારવું જરૂરી છે.”

ફિલ્મ ‘રામાયણ’માં સ્ટારકાસ્ટ પણ ખાસ આકર્ષણનું કેન્દ્ર છે. રણબીર કપૂર ભગવાન રામના પાત્રમાં, સાઈ પલ્લવી માતા સીતાના પાત્રમાં, યશ રાવણ તરીકે, સની દેઓલ હનુમાન તરીકે અને રવિ દુબે લક્ષ્મણના પાત્રમાં જોવા મળશે. આ ભવ્ય કાસ્ટને લઈને દર્શકોમાં પહેલેથી જ ભારે ઉત્સાહ જોવા મળી રહ્યો છે.

રણબીર કપૂર સાથે કામ કરવાનો અનુભવ શેર કરતાં અરુણ ગોવિલે જણાવ્યું કે રણબીર માત્ર એક ઉત્તમ અભિનેતા જ નથી, પરંતુ એક ખૂબ જ સારા અને વિનમ્ર માણસ પણ છે. તેમણે ઉમેર્યું કે ફિલ્મના સેટ પર તમામ કલાકારો વચ્ચે સકારાત્મક અને સહયોગી વાતાવરણ હતું, જે આટલા મોટા પ્રોજેક્ટ માટે અત્યંત મહત્વપૂર્ણ છે.

રાજા દશરથના પોતાના પાત્ર વિશે વાત કરતાં અરુણ ગોવિલે કહ્યું કે તેઓ આ ભૂમિકામાં એક પિતાની લાગણીઓ, જવાબદારીઓ અને આંતરિક સંઘર્ષને દર્શકો સુધી પહોંચાડવા માંગે છે. તેમના મતે દશરથ માત્ર શક્તિશાળી રાજા નથી, પરંતુ ઊંડા સ્નેહ, ત્યાગ અને પીડાથી ભરેલો પિતા પણ છે. આ ભાવનાત્મક પાસાને સાચી રીતે રજૂ કરવાનું તેમના માટે સૌથી મોટું પડકાર અને સૌથી મોટી તક છે.