ભારતીય જ્વેલરી ક્ષેત્રની સૌથી જૂની અને પ્રતિષ્ઠિત બ્રાન્ડ્સમાંથી એક એવી ત્રિભુવનદાસ ભીમજી ઝવેરી (TBZ) નું અધિગ્રહણ કરીને ચેન્નાઈ સ્થિત જીઆરટી જ્વેલર્સે (GRT Jewellers) વેપાર જગતમાં મોટો ધડાકો કર્યો છે. ચેન્નાઈની આ જ્વેલરી બ્રાન્ડે રૂ. 1033.71 કરોડના કુલ મૂલ્યમાં ટીબીઝેડનો 74.12 ટકા હિસ્સો ખરીદવા માટે સત્તાવાર કરાર કર્યા છે. આ સોદાની સાથે જ ઝવેરી પરિવારે 5 પેઢીઓ બાદ જ્વેલરી ઉદ્યોગમાંથી પોતાની સંપૂર્ણ એક્ઝિટ સ્વીકારી લીધી છે.

વર્ષ 1864 માં મુંબઈના ઝવેરી બજારમાંથી માત્ર 1 નાનકડા સ્ટોર સાથે શરૂ થયેલી ટીબીઝેડ બ્રાન્ડનો 162 વર્ષનો ભવ્ય ઈતિહાસ રહ્યો છે. પાંચ પેઢીઓથી ચાલતા આ પારિવારિક બિઝનેસનું વેચાણ જ્વેલરી માર્કેટ માટે એક યુગનો અંત માનવામાં આવી રહ્યો છે. આ અધિગ્રહણ હેઠળ જીઆરટી જ્વેલર્સને સમગ્ર ભારતમાં ફેલાયેલા ટીબીઝેડના 37 પ્રીમિયમ સ્ટોર્સનું વિશાળ રીટેલ નેટવર્ક પ્રાપ્ત થશે. 

આ વિશાળ સોદાથી જીઆરટી જ્વેલર્સને ઉત્તર અને પશ્ચિમ ભારતના માર્કેટમાં સીધો પ્રવેશ મળશે. હાલમાં જીઆરટી કંપની ભારતભરમાં 68 સ્ટોર્સ અને સિંગાપુરમાં 1 આંતરરાષ્ટ્રીય સ્ટોર ધરાવે છે. આ અધિગ્રહણ બાદ જીઆરટીનું રીટેલ નેટવર્ક 100 થી વધુ સ્ટોર્સ સુધી પહોંચી જશે. કંપની પાસે હાલમાં 12000 થી વધુ કર્મચારીઓ અને 6.5 લાખ ચોરસ ફૂટથી વધુનો રીટેલ સ્પેસ ઉપલબ્ધ છે.