દિવાળીના તહેવારો નજીક છે, અને તે દરમિયાન, એવા સમાચાર બહાર આવ્યા છે જેનાથી લોકો ચિંતિત છે. વેપારીઓ ખાસ કરીને આ સંદેશથી પ્રભાવિત થયા છે. હકીકતમાં, વોટ્સએપ પર એક સંદેશ ફરતો થઈ રહ્યો છે જે આરબીઆઈનો પરિપત્ર હોય તેવું લાગી રહ્યું છે. તેમાં જણાવાયું છે કે 10, 20 અને 50 રૂપિયા જેવી નાની નોટોની દેશવ્યાપી અછત રહેશે. જેમાં એવો નિર્દેશ કરાયો છે કે આરબીઆઈ નાની નોટોનું છાપકામ ધીમે ધીમે ઘટાડવા જઈ રહી છે. વાસ્તવમાં આ પરિપત્ર સાચો નથી, માત્ર અફવા જ છે. આથી લોકોને સાવધ કરવામાં આવ્યા છે કે અફવાઓમાં ન દોરવાઈ જાય.

સોશિયલ મીડિયા પર ફરતા એક ફોટામાં દાવો કરવામાં આવ્યો છે કે 10, 20 અને 50 રૂપિયાની નોટોની દિવાળી પર અછત રહેશે, જેના કારણે દિવાળી દરમિયાન નોંધપાત્ર મુશ્કેલીઓનો સામનો કરવો પડશે.

ફોટામાં આરબીઆઈનું નામ, લોગો અને ગવર્નરની સહી પણ છે. આ પોસ્ટમાં એમ પણ કહેવામાં આવ્યું છે કે સરકારના કેશલેસ સમાજના વિઝનને અનુરૂપ નાના મૂલ્યની નોટોનું છાપકામ ધીમે ધીમે ઘટાડવામાં આવી રહ્યું છે. ગ્રાહકોને યુપીઆઈ, કાર્ડ અને નેટ બેંકિંગ જેવી ડિજિટલ ચુકવણી પદ્ધતિઓનો ઉપયોગ કરવા માટે પ્રોત્સાહિત કરવામાં આવી રહ્યા છે.

સત્ય હકીકત શું છે?

પીઆઈબી ફેક્ટ ચેકે તેના હેન્ડલ પર આ વાયરલ ફોટોને નકલી જાહેર કર્યો છે. પીઆઈબીએ જણાવ્યું છે કે વોટ્સએપ પર ફરતો સંદેશ એવો દાવો કરે છે કે આરબીઆઈ એ દિવાળી પહેલા નવી 10, 20 અને 50 રૂપિયાની નોટોની અછતની જાહેરાત કરી છે તે ખોટી છે. સત્ય એ છે કે આરબીઆઈએ નોટોની ઉપલબ્ધતા અંગે આવી કોઈ જાહેરાત કરી નથી. તમારે ખોટા દાવાઓથી સાવચેત રહેવાની જરૂર છે.જો તમને કોઈ ખોટો સંદેશ દેખાય તો પહેલા સત્તાવાર સ્ત્રોત પાસેથી પુષ્ટિ મેળવો અને ક્યારેય વણચકાસાયેલ દાવાઓ શેર કરશો નહીં.