ઉત્તર પ્રદેશના મુઝફ્ફરનગરમાં સરકારી હોસ્પિટલમાં 14 વર્ષની દીકરીના ઘૂંટણની સારવાર માટે માતા પહોંચી હતી. જ્યાં ડોક્ટરે હાડકુ જોડ્યા બાદ 8 હજાર રૂપિયા લીધા હતા. બાકીની રકમ માતા ચૂકવી ન શકતા ડોક્ટરે ફરી બાળકીનું હાડકુ મસકોડીને તોડી નાખ્યું હતું. આવા આક્ષેપો દર્દીની માતાએ કર્યા છે. જોકે આ અંગે તપાસ ચાલી રહી છે.  

મળતી માહિતી મુજબ એક લાચાર માતા રેશ્મા પોતાની 14 વર્ષની માનસિક રીતે બીમાર પુત્રી માટે ન્યાય મેળવવા માટે જિલ્લા કલેક્ટર કચેરી પહોંચી હતી. વિધવા મહિલાએ જિલ્લા આરોગ્ય વિભાગ પર ગેરકાયદેસર તબીબી સારવાર અને ઘોર બેદરકારીના ગંભીર આરોપો લગાવ્યા છે. તેણીનો આરોપ છે કે સરકારી હોસ્પિટલના ડૉક્ટરે તેની પુત્રીની યોગ્ય સારવાર માટે પૈસાની માંગણી જ નહોતી કરી, પરંતુ અયોગ્ય સારવાર આપીને તેની પુત્રીના પગને પણ મોટું નુકસાન પહોંચાડ્યું હતું.

પીડિતાની માતા રેશ્માના જણાવ્યા અનુસાર, લગભગ દોઢ મહિના પહેલા, તેમની પુત્રીના જમણા પગનું જિલ્લા હોસ્પિટલમાં ઓપરેશન થયું હતું. હોસ્પિટલના સ્ટાફે આ પ્રક્રિયા માટે રૂ.25,000ની માંગણી કરી હતી. જ્યારે વિધવા હોવાનો દાવો કરતી મહિલાએ રૂપિયા આપવામાં અસમર્થતા દર્શાવી, ત્યારે તેઓએ સારવારનો ઇનકાર કર્યો હતો. ત્યારબાદ તેણીએ જિલ્લા મેજિસ્ટ્રેટને અપીલ કરી, જેમણે સીએમઓને મફત સારવાર આપવાનો આદેશ આપ્યો હતો. આમ છતાં, હોસ્પિટલના સ્ટાફે રૂ.8,000 લીધા અને કહ્યું કે બાકીની રકમ પછીથી ચૂકવવી પડશે.

ડૉક્ટરે મહિલાને થોડા દિવસો પછી ચેકઅપ માટે પાછા આવવા કહ્યું હતું જેથી તેનો ઘૂંટણ ફરીથી ગોઠવી શકાય. જ્યારે મહિલા તેની પુત્રી સાથે આવી, ત્યારે ઓપરેશન કરનારા ડૉ. ચતુર્વેદીએ બળજબરીથી તેની પુત્રીના ઘૂંટણને ફરીથી ગોઠવ્યું હતું. બાળકી પીડાથી ચીસો પાડી અને તેના પગમાં હાડકું તૂટવાનો અવાજ સંભળાયો, પરંતુ ડૉક્ટરોએ તેને દૂર ભગાડી દીધી. બાદમાં, જ્યારે પગનો એક્સ-રે લેવામાં આવ્યો, ત્યારે તેમાં હાડકું તૂટેલું હોવાનું બહાર આવ્યું. વ્યથિત માતાએ વરિષ્ઠ ડૉક્ટરોને ફરિયાદ કરી, પરંતુ કોઈએ સાંભળ્યું નહીં.

આ ગંભીર બાબત અંગે મુઝફ્ફરનગરના મુખ્ય તબીબી અધિકારી સુનિલ તેવતિયાનું નિવેદન પણ સામે આવ્યું છે. તેણે જણાવ્યું હતું કે બીજી બાજુ સાંભળ્યા વિના આ બાબતે ટિપ્પણી કરવી અયોગ્ય ગણાશે. જોકે, તેમણે ખાતરી આપી હતી કે સમગ્ર ઘટનાની સંપૂર્ણ તપાસ કરવામાં આવશે. જો તપાસમાં હોસ્પિટલ સ્ટાફ અથવા ડોકટરો તરફથી કોઈ બેદરકારી બહાર આવશે, તો તેમની સામે કડક કાનૂની અને વહીવટી કાર્યવાહી કરવામાં આવશે.