ભારતીય હવામાન વિભાગ (આઈએમડી)એ અહેવાલ આપ્યો છે કે પશ્ચિમ-મધ્ય બંગાળની ખાડીમાં સક્રિય થયેલું ચક્રવાત અર્નબ ભીષણ વાવાઝોડામાં પરિણમ્યું છે. વિશાખાપટ્ટનમથી લગભગ 300 કિલોમીટર દૂર સ્થિત છે. આ વાવાઝોડું આવતીકાલે સવારે યાનમ નજીક આંધ્ર પ્રદેશના દરિયાકાંઠે ટકરાવાની ધારણા છે. ડિઝાસ્ટર મેનેજમેન્ટ વિભાગે આજે અને આવતીકાલે ઓક્ટોબરના રોજ આંધ્ર પ્રદેશમાં ભારે વરસાદની આગાહી કરી છે. આ સમયગાળા દરમિયાન 140 કિલોમીટર પ્રતિ કલાકની ઝડપે પવન ફૂંકાશે તેવી પણ આગાહી છે.

આઈએમડી અનુસાર, આજે સાંજ સુધીમાં વાવાઝોડું પશ્ચિમ-ઉત્તરપશ્ચિમ દિશામાં આગળ વધવાની સંભાવના છે. ત્યારબાદ, અર્નબબ ઉત્તરપશ્ચિમ તરફ ફરી વળે તેવી શક્યતા છે. હવામાન વિભાગની આગાહી છે કે આ વાવાઝોડું આવતીકાલે બાપટલા અને વિશાખાપટ્ટનમ વચ્ચે યાનમ નજીક આંધ્રપ્રદેશ અને યાનમ કિનારાને પાર કરી શકે છે. આ સમયગાળા દરમિયાન વાવાઝોડું ખૂબ જ ગંભીર શ્રેણીમાં રહેવાની ધારણા છે.

આ વાવાઝોડું જમીન પર ત્રાટકશે ત્યારે તેની મહત્તમ સતત પવનની ગતિ ૧૧૫થી ૧૨૫ કિલોમીટર પ્રતિ કલાકની રહેશે અને ૧૪૦ કિલોમીટર પ્રતિ કલાકની ઝડપે પવન ફૂંકાશે તેવી શક્યતા છે. હવામાન વિભાગે આંધ્રપ્રદેશ અને નજીકના દક્ષિણ ઓડિશાના દરિયાકાંઠાના વિસ્તારો માટે રેડ એલર્ટ જારી કર્યું છે.

ઓરિસ્સા સરકારે ગંજમ, ગજપતિ, રાયગડા, મલકાનગિરી, કોરાપુટ અને નબરંગપુર સહિત છ જિલ્લાઓમાં વાવાઝોડાની ચેતવણી જારી કરી છે. મુખ્યમંત્રીએ તૈયારીઓની દેખરેખ રાખવા માટે આઠ મંત્રીઓને સોંપ્યા છે.

સંવેદનશીલ વિસ્તારોમાં એનડીઆરએફ, ઓરિસ્સા ડિઝાસ્ટર રેપિડ એક્શન ફોર્સ, ફાયર વિભાગ અને પોલીસ કર્મચારીઓને તૈનાત કરવામાં આવ્યા છે. કોઈપણ કટોકટીનો સામનો કરવા માટે, ઓરિસ્સાના સંવેદનશીલ જિલ્લાઓમાં 225 ફાયર સર્વિસ ટીમો અને રાષ્ટ્રીય આપત્તિ પ્રતિભાવ દળના જવાનો તૈનાત કરવામાં આવ્યા છે. વાવાઝોડાના ભયને ધ્યાનમાં રાખીને ગંજમ જિલ્લા વહીવટીતંત્રે 27થી 29 ઓક્ટોબર સુધી તમામ આંગણવાડી કેન્દ્રોમાં રજા જાહેર કરી છે. બાળકો અને સગર્ભા સ્ત્રીઓના પોષણની ખાતરી કરવા માટે દરેક ઘરમાં સૂકો રાશન પહોંચાડવા સૂચનાઓ આપવામાં આવી છે.

રાજ્ય પરિવહન સત્તામંડળે દરિયાકાંઠાના માર્ગો પર સલામત મુસાફરી સુનિશ્ચિત કરવા માટે એડવાઈઝરી જારી કરી છે. આજથી 29 ઓક્ટોબર સુધી ભારે વરસાદ ચાલુ રહેશે, 30 ઓક્ટોબરથી ઘટાડો થવાની સંભાવના છે.

વાવાઝોડું અર્નબની અસર ફક્ત દરિયાકાંઠાના રાજ્યો સુધી મર્યાદિત રહેવાની શક્યતા નથી. હવામાન વિભાગે પશ્ચિમ બંગાળ, બિહાર, ઝારખંડ અને પૂર્વી ઉત્તર પ્રદેશ સહિત અનેક વિસ્તારોમાં વરસાદની આગાહી કરી છે.

૨૮થી ૩૦ ઓક્ટોબર દરમિયાન પશ્ચિમ બંગાળના અનેક જિલ્લાઓમાં ભારે વરસાદની આગાહી છે. આમાં દક્ષિણ ૨૪ પરગણા, પૂર્વ અને પશ્ચિમ મેદિનીપુર, ઝારગ્રામ, બાંકુરા અને પુરુલિયાનો સમાવેશ થાય છે.

હવામાન વિભાગના જણાવ્યા અનુસાર, મધ્યપ્રદેશ, છત્તીસગઢ અને તેલંગાણાના કેટલાક વિસ્તારોમાં પણ ભારે વરસાદની આગાહી છે. દરમિયાન, ચક્રવાત શક્તિશાળી ચક્રવાતમાં ફેરવાઈ ગયા બાદ તમિલનાડુ અને પુડુચેરીના નવ બંદરો માટે ચેતવણી જારી કરવામાં આવી છે.  વાવાઝોડું અર્નબને કારણે ભારે વરસાદ અને ભારે પવનની શક્યતા વચ્ચે આંધ્રપ્રદેશ સરકારે સોમવારે 20 જિલ્લાઓને રાહત કાર્ય માટે રૂ.27 કરોડ જાહેર કર્યા છે. 

અર્નબ વાવાઝોડાની આગાહીને ધ્યાનમાં રાખીને, પડોશી તમિલનાડુમાં પણ ચેતવણી જારી કરવામાં આવી છે. શનિવારથી રાજ્યના કેટલાક ભાગોમાં ભારે વરસાદ પડી રહ્યો છે. રાજ્યના દરિયાકાંઠાના વિસ્તારોમાં મોટી સંખ્યામાં માછીમારો રહે છે, જેમની આજીવિકા સમુદ્ર પર નિર્ભર છે. ચેતવણી બાદ, થુથુકુડી અને પંબનમાં હજારો માછીમારી બોટ રોકી દેવામાં આવી છે.

માછીમારોએ વાવાઝોડાને કારણે તેમને થયેલા નુકસાન માટે વળતરની માંગ કરી છે. ચક્રવાતની ચેતવણીથી માત્ર માછીમારોને જ નહીં, પણ રોજીરોટી કમાવવા માટે પડોશી રાજ્યોમાં મુસાફરી કરતા દૈનિક મજૂરોને પણ અસર થઈ છે.

વાવાઝોડાને કારણે 60થી વધુ ટ્રેનો રદ

ચક્રવાતના સંભવિત ખતરાને ધ્યાનમાં રાખીને, રેલવેએ 60થી વધુ ટ્રેનો રદ કરી છે અને ચોથી નવેમ્બર સુધી અન્ય ટ્રેનોના સંચાલનમાં ફેરફાર કર્યો છે. આજે અને આવતીકાલે 53 ટ્રેનો રદ કરવામાં આવી છે. દક્ષિણ કોસ્ટ રેલવેએ ૨૪ કલાક કંટ્રોલ રૂમ અને સ્ટેશન હેલ્પ ડેસ્ક સ્થાપ્યા છે, જે રિફંડ, ખોરાક, બેકઅપ પાવર અને તબીબી સહાય પૂરી પાડે છે. રેલવેએ ઝોનલ અને ડિવિઝનલ હેડક્વાર્ટર પર ૨૪ કલાક વોર રૂમ સ્થાપ્યા છે. આનો હેતુ તોફાનને કારણે રેલ કામગીરીમાં કોઈપણ વિક્ષેપ પડે તો તાત્કાલિક કાર્યવાહી સુનિશ્ચિત કરવાનો છે. રેલવેએ મુસાફરોને ટ્રેનમાં બેસતા પહેલા તેમની ટ્રેનોની સ્થિતિ તપાસવા વિનંતી કરી છે. 

સોશિયલ મીડિયા અને મીડિયા માટે એડવાઈઝરી જારી

ઓરિસ્સા સરકારે પ્રિન્ટ, ઇલેક્ટ્રોનિક અને ડિજિટલ મીડિયા પ્લેટફોર્મ માટે ખાસ એડવાઈઝરી જારી કરી છે. સરકારે સ્પષ્ટપણે સૂચના આપી છે કે આઈએમડી, ખાસ રાહત કમિશનર અને અધિકૃત જિલ્લા વહીવટીતંત્ર દ્વારા જારી કરાયેલ વાવાઝોડા સંબંધિત સત્તાવાર માહિતી જ પ્રસારિત કરવામાં આવે. કોઈપણ પ્રકારની અપ્રમાણિત આગાહી, કાલ્પનિક ટ્રેક મોડેલ અથવા ગભરાટ ફેલાવતા સમાચાર પ્રસારિત કરવા પર સખત પ્રતિબંધ છે.

વાવાઝોડું 23 કિમી પ્રતિ કલાકની ઝડપે  દરિયાકાંઠા તરફ આગળ વધી રહ્યું છે

ભુવનેશ્વરમાં હવામાન વિભાગના પ્રાદેશિક હવામાન કેન્દ્ર અનુસાર, ચક્રવાતી સિસ્ટમ છેલ્લા છ કલાકમાં 23 કિમી પ્રતિ કલાકની ઝડપે પશ્ચિમ-ઉત્તરપશ્ચિમ તરફ આગળ વધી હતી અને 26 ઓક્ટોબરના રોજ રાત્રે 11:30 વાગ્યે પશ્ચિમ-મધ્ય બંગાળની ખાડી પર કેન્દ્રિત હતી. તે સમયે, વાવાઝોડું ઓડિશાના ગોપાલપુરથી લગભગ 400 કિમી દક્ષિણપૂર્વમાં, વિશાખાપટ્ટનમથી 350 કિમી દક્ષિણપૂર્વમાં અને કાકીનાડાથી 420 કિમી પૂર્વ-દક્ષિણપૂર્વમાં સ્થિત હતું. વિશાખાપટ્ટનમમાં ડોપ્લર વેધર રડાર સતત વાવાઝોડા પર નજર રાખી રહ્યું છે.

ઓરિસ્સામાં શાળાઓ બંધ, લોકોનું સ્થળાંતર

આવતીકાલે વાવાઝોડું અર્નબના લેન્ડફોલને ધ્યાનમાં રાખીને ઓરિસ્સા સરકારે છ જિલ્લાઓમાં તમામ શૈક્ષણિક સંસ્થાઓ બંધ કરી દીધી છે. 28 અને 29 ઓક્ટોબરે આ છ જિલ્લાઓમાં શાળાઓ, કોલેજો અને આંગણવાડી કેન્દ્રો બંધ રહેશે. લોકોએ સંવેદનશીલ વિસ્તારોમાંથી લોકોને સ્થળાંતર કરવાનું પણ શરૂ કરી દીધું છે. આપત્તિ વ્યવસ્થાપન મંત્રી સુરેશ પૂજારીએ કહ્યું, અમે કોઈ જોખમ લેવા માંગતા નથી. આથી, આપત્તિઓ દરમિયાન જીવન અને સંપત્તિનું રક્ષણ કરવા માટે ઓરિસ્સાની 'ઝીરો કેઝ્યુઅલ્ટી' નીતિ હેઠળ ઉચ્ચ સ્તરીય તૈયારીઓ કરવામાં આવી છે. છ સંવેદનશીલ જિલ્લાઓમાં દરિયામાં માછીમારી અને ટેકરીઓ, ધોધ, ડેમ અને પ્રવાસન સ્થળોની મુલાકાત પર પણ પ્રતિબંધ મૂકવામાં આવ્યો છે.