ગુજરાતનું સફેદ રણ  હાલમાં વિદેશી પક્ષીઓના આગમનથી ગુલાબી રંગે રંગાયું છે. સામાન્ય રીતે શિયાળાની વિદાય સાથે જ વિદેશી પક્ષીઓ વતન પરત ફરતા હોય છે, પરંતુ આ વર્ષે માર્ચ મહિનો પૂર્ણ થયા બાદ પણ હજારોની સંખ્યામાં ફ્લેમિંગો પક્ષીઓએ કચ્છના રણમાં પડાવ નાખ્યો છે.

કચ્છના સફેદ રણમાં ફ્લેમિંગોના મંત્રમુગ્ધ કરી દેતા દ્રશ્યોનો એક વીડિયો ગુજરાતના નાયબ મુખ્યમંત્રી હર્ષભાઈ સંઘવીએ પોતાના સોશિયલ મીડિયા એકાઉન્ટ 'એક્સ' પર શેર કર્યો છે.

દર વર્ષે હજારો કિમીનું અંતર કાપીને રશિયા અને સાઇબેરિયાથી ફ્લેમિંગો પક્ષીઓ ગુજરાતના મહેમાન બને છે. કચ્છનું રણ આ પક્ષીઓ માટે પ્રજનન અને વસવાટ માટેનું ઉત્તમ સ્થળ માનવામાં આવે છે. હર્ષ સંઘવીએ શેર કરેલા ડ્રોન વીડિયોમાં પક્ષીઓનો સુમેળભર્યો નજારો અને કુદરતની શ્રેષ્ઠ કૃતિ સમાન દ્રશ્યો કેદ થયા છે. પક્ષીઓના વિશાળ ઝુંડને કારણે રણ જાણે કોઈ જીવંત ચિત્ર હોય તેવું ભાસી રહ્યું છે.

કચ્છના પ્રખ્યાત 'રોડ ટુ હેવન'  વિસ્તારમાં આ પક્ષીઓનું આકર્ષણ સૌથી વધુ જોવા મળી રહ્યું છે. નાયબ મુખ્યમંત્રીએ આ નજારાને 'પિંક સીટી' તરીકે વર્ણવ્યું છે. સામાન્ય રીતે માર્ચના પ્રારંભમાં આ પક્ષીઓ પરત ફરતા હોય છે, પરંતુ આ વખતે એપ્રિલની શરૂઆત સુધી તેમનો અહીં જ રોકાણ પ્રવાસીઓ અને પક્ષીપ્રેમીઓ માટે ભારે કુતૂહલનો વિષય બન્યો છે.

સોશિયલ મીડિયામાં આ વીડિયો વાયરલ થતા લોકો કચ્છના કુદરતી સૌંદર્ય અને પક્ષીઓના સંગમની પ્રશંસા કરી રહ્યા છે. આ દ્રશ્યો સાબિત કરે છે કે પ્રકૃતિ અને વન્યજીવો માટે ગુજરાત આજે પણ સુરક્ષિત અને સુંદર આશ્રયસ્થાન છે.