ઉત્તર પ્રદેશના મુખ્યમંત્રી યોગી આદિત્યનાથે બુધવારે વારાણસીમાં ગંગા મહોત્સવ અને દેવ દિવાળીની તૈયારીઓની ઉચ્ચસ્તરીય સમીક્ષા કરી હતી. આ દરમિયાન તેમણે જણાવ્યું હતું કે દેવ દિવાળી કાશીની ઓળખ અને સાંસ્કૃતિક વિરાસતનો ગૌરવશાળી પર્વ છે. આ પ્રસંગે દેશ-વિદેશમાંથી મોટી સંખ્યામાં શ્રદ્ધાળુઓ અને પ્રવાસીઓ આવતા હોવાથી તેમની સુવિધા અને સુરક્ષાની તમામ વ્યવસ્થાઓ સુનિશ્ચિત કરવામાં આવે.

સમીક્ષા બેઠકમાં અધિકારીઓએ જણાવ્યું હતું કે આ વર્ષે ગંગા મહોત્સવનું આયોજન 20થી 23 નવેમ્બર દરમિયાન નમો ઘાટ પર કરવામાં આવશે. ચારેય દિવસ સાંસ્કૃતિક કાર્યક્રમો યોજાશે. મુખ્યમંત્રીએ આ કાર્યક્રમોમાં સ્થાનિક કલાકારોને પ્રાથમિકતા આપવા સૂચના આપી હતી. આ વખતે કાશીના તમામ પાકા ઘાટ, ગંગા નદીના સામેના રેતાળ કિનારા અને શહેરના 100થી વધુ કુંડ પર 11 લાખથી વધુ દીવાઓ પ્રગટાવવામાં આવશે.

સમગ્ર કાશીમાં થશે દીપોત્સવની રોશની

મુખ્યમંત્રી યોગીએ સૂચના આપી હતી કે દેવ દિવાળીનો ઉત્સવ માત્ર ગંગા ઘાટ પૂરતો સીમિત ન રહે, પરંતુ સમગ્ર કાશીમાં તેની ભવ્યતા જોવા મળે. ગ્રામીણ વિસ્તારો ઉપરાંત સારનાથ, માર્કંડેય મહાદેવ મંદિર, શૂલટંકેશ્વર મંદિર અને મુખ્ય કુંડ પર પણ વિશેષ દીપોત્સવનું આયોજન કરવામાં આવે.

નાવિકો સાથે સંવાદ કરીને તેમને સુરક્ષા અને વ્યવસ્થાપન અંગે તાલીમ આપવાની જરૂરિયાત પર પણ ભાર મૂકવામાં આવ્યો હતો.

અધિકારીઓએ જણાવ્યું હતું કે 24 નવેમ્બરની સાંજે તમામ ઘાટ પર દીવાઓ પ્રગટાવવામાં આવશે. દશાશ્વમેધ ઘાટ પર વિશ્વવિખ્યાત મહાઆરતી યોજાશે. ત્યારબાદ ચેતસિંહ ઘાટ પર ભવ્ય પ્રોજેક્શન અને લેસર શો, દશાશ્વમેધ તથા અસ્સી ઘાટની સામે ડ્રોન શો અને કાશી વિશ્વનાથ ધામ ઘાટની સામે ગ્રીન આતશબાજીનું આયોજન કરવામાં આવશે.

10 ઝોન અને 21 સેક્ટરમાં સુરક્ષા વ્યવસ્થા

કાર્તિક પૂર્ણિમાના સ્નાન અને દેવ દિવાળી દરમિયાન લાખો શ્રદ્ધાળુઓ ઉમટી પડવાની શક્યતા હોવાથી સમગ્ર ઘાટ વિસ્તારને 10 ઝોન, 21 સેક્ટર અને 36 સબ-સેક્ટરમાં વહેંચવામાં આવ્યો છે. દરેક વિસ્તારમાં ઝોનલ અને સેક્ટર પ્રભારીઓની નિમણૂક કરવામાં આવી છે.

ઘાટ પર 27 વોચ ટાવર, ક્વિક રિસ્પોન્સ ટીમ (QRT), 21 મુખ્ય ઘાટ પર એન્ટી રોમિયો સ્ક્વોડ, ખાનગી તરવૈયાઓ અને ડ્રોન કેમેરા દ્વારા નજર રાખવામાં આવશે. શ્રદ્ધાળુઓ અને પ્રવાસીઓની મદદ માટે 11 ખોવાયેલા-મળેલા કેન્દ્રો પણ બનાવવામાં આવ્યા છે. ઈ-સ્કૂટર પર પ્રવાસી પોલીસ સતત પેટ્રોલિંગ કરશે.

નમો ઘાટથી અસ્સી ઘાટ સુધી ખાસ બોટ વ્યવસ્થા

નમો ઘાટથી અસ્સી ઘાટ વચ્ચે ફ્લોટિંગ વોટર જેટી લગાવીને બોટ માટે ટુ-વે લેન બનાવવામાં આવી છે. આ વ્યવસ્થા મુજબ બોટ નમો ઘાટથી અસ્સી ઘાટ તરફ જશે અને નદીના સામેના રેતાળ કિનારેથી પરત નમો ઘાટ તરફ આવશે. નદીમાં ડીઝલથી ચાલતી અને અન્ય જિલ્લાઓમાંથી આવતી બોટના સંચાલન પર પ્રતિબંધ રહેશે.

સીમાવર્તી જિલ્લાઓમાંથી આવતા ભારે વાહનો માટે સાત મુખ્ય ડાયવર્ઝન પોઇન્ટ બનાવવામાં આવ્યા છે. શહેરમાં 31 સ્થળોએ પાર્કિંગની વ્યવસ્થા કરવામાં આવી છે. જ્યારે ભીડભાડવાળા મુખ્ય માર્ગો પર ઓટો અને ઈ-રિક્ષાના સંચાલન પર પ્રતિબંધ રહેશે.

આકસ્મિક તબીબી સારવાર માટે ખાનગી હોસ્પિટલોને જોડીને ગ્રીન કોરિડોરની વ્યવસ્થા પણ કરવામાં આવશે. મુખ્યમંત્રીએ 20થી 25 નવેમ્બર દરમિયાન સમગ્ર શહેરમાં વિશેષ સ્વચ્છતા અભિયાન ચલાવવા અને તેમાં વધુમાં વધુ સ્થાનિક લોકોને જોડવા સૂચના આપી હતી.