દારૂના આ દરોડાની જાણવા મળતી વિગતો મુજબ, રાજકોટ જિલ્લા પોલીસ વડા હિમકરસિંહ દ્વારા જિલ્લામાં દારૂ-જુગારની પ્રવૃત્તિ સામે ઝીરો ટોલરન્સની નીતિથી કામ કરવા માટે સૂચના આપવામાં આવી છે. જે અંતર્ગત રાજકોટ ગ્રામ્ય એલસીબી પીઆઇ વી.વી. ઓડેદરાની રાહબરી હેઠળ પી.એસ.આઈ એચ.સી. ગોહિલ તથા તેમની ટીમ પેટ્રોલિંગમાં હતી દરમિયાન એએસઆઈ શક્તિસિંહ જાડેજા, હેડ કોન્સ્ટેબલ અરવિંદસિંહ જાડેજા અને કૌશિકભાઇ જોશીને એવી બાથમી મળી હતી કે, જેતપુર પોરબંદર નેશનલ હાઈવે પર દારૂ ભરેલો એક ટ્રક પસાર થનાર છે. જે બાતમીના આધારે પોલીસની ટીમે અહીં હાઇવે પર પહોંચી ગોઠવી હતી.

દરમિયાન નેશનલ હાઇવે પર મંડલીકપુર ગામ પાસે પોલીસે એક શંકાસ્પદ ટ્રક અટકાવી હતી. ટ્રકમાંમાં સવાર બંને શખસોની પૂછતાછ કરતા તેમના નામ વિપુલ પુંજાભાઈ ભરાઈ (રહે. માણાવદર રઘુવીર પરા વિસ્તાર) અને મનસુખ શિવનાથ ધર્મનાથ (રહે. ખાંભલા તા. માણાવદર હોવાનું જણાવ્યું હતું. ટ્રકમાંથી રૂપિયા 1.03 લાખની કિંમતનો 192 બોટલ દારૂનો જથ્થો તથા રૂપિયા 94,464 ની કિંમતના 768 બિયરના ટીન મળી આવ્યા હતા.

પોલીસે દારૂ બિયરનો આ જથ્થો અને ટ્રક સહિત કુલ રૂપિયા 12,03,260 નો મુદ્દામાલ કબજે કર્યો હતો. ઝડપાયેલા આ બંને શખસોની પૂછતાછ કરતા દારૂનો આ જથ્થો માણાવદરમાં રહેતા લખન અરજણભાઈ ઇછુડાએ મંગાવ્યો હોવાનું ખૂલતાં પોલીસે ત્રણેય સામે ગુનો નોંધી લખનને ઝડપી લેવા તપાસ હાથ ધરી છે.