ખાખડાબેલામાં યુવાનની ઘાતકી હત્યામાં બે આરોપી ઝડપાયા: પૂર્વ આયોજિત કાવતરૂ ઘડી ઘટનાને અંજામ આપ્યો હતો

May 24, 2026 05:19 PM

રાજકોટ જિલ્લાના પડધરી તાલુકાના ખાખડાબેલા ગામે તાજેતરમાં બનેલી ચકચારી હત્યાની ઘટનામાં રાજકોટ ગ્રામ્ય પોલીસે ગણતરીના દિવસોમાં જ આંતર-રાજ્ય ઓપરેશન પાર પાડીને બે મુખ્ય આરોપીઓને ઝડપી પાડવામાં મોટી સફળતા મેળવી છે. ગત ૨૦ મે ૨૦૨૬ના રોજ ખાખડાબેલા ગામમાં યુવરાજસિંહ જાડેજા નામના યુવાનની તેમની જ કારમાં ઘાતકી અને નિર્મમ હત્યા કરવામાં આવી હતી. આ પૂર્વ આયોજિત હત્યાકાંડને અંજામ આપ્યા બાદ આરોપીઓ પોતાનું વાહન લઈને નાસી છૂટ્યા હતા, જેના પગલે સમગ્ર પંથકમાં ચકચાર મચી ગઈ હતી.

ઘટનાની ગંભીરતાને ધ્યાને લઈને રાજકોટ ગ્રામ્ય પોલીસની અલગ-અલગ ટીમો તપાસમાં જોતરાઈ હતી. પોલીસે આધુનિક ટેકનોલોજી, સીસીટીવી કેમેરાના સર્વેલન્સ, મોબાઈલ લોકેશન ટ્રેકિંગ અને આંતર-રાજ્ય ઇન્ટેલિજન્સ ગ્રીડના મજબૂત નેટવર્કનો ઉપયોગ કરીને ફરાર આરોપીઓનો પીછો કર્યો હતો. પોલીસની સઘન નાકાબંધી અને ટેકનિકલ એનાલિસિસના અંતે આ ઘાતકી ગુનાના મુખ્ય સૂત્રધાર એવા આરોપી મહેન્દ્રસિંહ જાડેજા અને યશપાલસિંહ જાડેજાની સફળતાપૂર્વક ધરપકડ કરી લેવામાં આવી છે.

પોલીસની પ્રાથમિક તપાસ અને પૂછપરછ દરમિયાન ચોંકાવનારા ખુલાસાઓ સામે આવ્યા છે. પોલીસે ઘટનાસ્થળ અને આરોપીઓ પાસેથી મહત્વના ફોરેન્સિક પુરાવા એકત્ર કર્યા છે. આ સાથે જ હત્યાની આ ઘાતકી ઘટનામાં વાપરવામાં આવેલી તીક્ષ્ણ ત્રણ છરીઓ પણ પોલીસે રિકવર કરી લીધી છે. પકડાયેલા શાતિર આરોપીઓએ પોલીસની નજરમાંથી બચવા અને પોતાની ઓળખ છુપાવવા માટે ગુનામાં વપરાયેલી બ્રેઝા કારની નંબર પ્લેટ પણ બદલી નાખી હતી, જેને પોલીસે કબ્જે કરી લીધી છે. હાલ ગ્રામ્ય પોલીસે પકડાયેલા બંને આરોપીઓના રિમાન્ડ મેળવવાની તજવીજ હાથ ધરી છે, તેમજ આ ગુનામાં પ્રત્યક્ષ કે પરોક્ષ રીતે સંડોવાયેલા અન્ય શંકાસ્પદ ઇસમોને પકડી પાડવા માટે તપાસના ચક્રો ગતિમાન કર્યા છે.