અમેરિકામાં અત્યંત મહત્વપૂર્ણ મિડટર્મ ચૂંટણીઓ (US Midterm Elections) માટે મતદાનની પ્રક્રિયા અધિકૃત રીતે શરૂ થઈ ગઈ છે. આ ચૂંટણીઓ પહેલા જ લાખો નાગરિકો અર્લી વોટિંગ (સમયસર પહેલા મતદાન) દ્વારા પોતાનો કિંમતી મત આપી ચૂક્યા છે. અમેરિકી સમય અનુસાર પ્રથમ તબક્કાનું મતદાન સાંજે 6 વાગ્યે પૂર્ણ થશે. આ ચૂંટણીના પરિણામો રાષ્ટ્રપતિ ડોનાલ્ડ ટ્રમ્પના કાર્યકાળના બાકીના બે વર્ષનો રાજકીય માર્ગ અને ભવિષ્ય નક્કી કરશે.

ચૂંટણીના આંકડા અનુસાર, ડેમોક્રેટ્સને હાઉસ ઓફ રિપ્રેઝન્ટેટિવ્સ (પ્રતિનિધિ સભા) માં બહુમતી મેળવવા માટે 3 બેઠકો અને સીનેટમાં જીત મેળવવા માટે 4 બેઠકોની જરૂર છે. ડેમોક્રેટિક પાર્ટી જનરલ કોંગ્રેસનલ બેલેટમાં 9 અંકની સરસાઈ સાથે ચૂંટણી મેદાનમાં ઉતરી છે. બીજી તરફ, રિપબ્લિકન પાર્ટી માટે પોતાના પરંપરાગત ગઢ ગણાતા રાજ્યોમાં પણ સીનેટની બેઠકો બચાવવી એ એક મોટો સૈદ્ધાંતિક અને રાજકીય પડકાર બની રહ્યો છે.

50 રાજ્યોમાં 1000 થી વધુ નિરીક્ષકો તૈનાત
અમેરિકાના ન્યાય વિભાગ અનુસાર, દેશના તમામ 50 રાજ્યોમાં નિષ્પક્ષ મતદાન સુનિશ્ચિત કરવા માટે આશરે 1000 જેટલા ચૂંટણી નિરીક્ષકો (ઈલેક્શન ઓબ્ઝર્વર્સ) ની તૈનાતી કરવામાં આવી છે. આ સાથે જ ચૂંટણી અધિકારીઓ સામે ન્યાય વિભાગની કડક કાર્યવાહી રોકવા સંબંધિત ઈમરજન્સી ઓર્ડર પણ અપીલ કોર્ટ દ્વારા યથાવત રાખવામાં આવ્યો છે.

ડોનાલ્ડ ટ્રમ્પ માટે અગ્નિપરીક્ષા
આ મિડટર્મ ચૂંટણીઓ રાષ્ટ્રપતિ ડોનાલ્ડ ટ્રમ્પ માટે એક અગ્નિપરીક્ષા સમાન માનવામાં આવી રહી છે. આ ચૂંટણીઓ પરથી નક્કી થશે કે અમેરિકી સંસદના બંને ગૃહ (હાઉસ અને સીનેટ) પર રિપબ્લિકન પાર્ટીનો કબજો જળવાઈ રહેશે કે પછી ડેમોક્રેટ્સ પોતાની પકડ મજબૂત કરશે. દેશમાં વધી રહેલી મોંઘવારી, દૈનિક જીવન-નિર્વાહનો ખર્ચ, ઈમિગ્રેશન (આવ્રજન) અને ઈરાન યુદ્ધ જેવા મુદ્દાઓ પર મતદારોની નારાજગી ચૂંટણી પરિણામોને સીધી રીતે પ્રભાવિત કરી શકે છે.

ચૂંટણી પ્રચારમાં કરોડો ડોલરનું આંધણ
​​​​​​​આ ચૂંટણી જીતવા માટે બંને પક્ષો દ્વારા કરોડો ડોલરનો ખર્ચ કરવામાં આવ્યો છે. અહેવાલો મુજબ, રાષ્ટ્રપતિ ટ્રમ્પના સમર્થન વાળા 'માગા ઈંક' (MAGA Inc) એ આશરે 28 કરોડ ડોલર અને તેમના સમર્થક ટેસ્લાના સીઈઓ એલોન મસ્કે 36.6 કરોડ ડોલરનો જંગી ખર્ચ કર્યો છે. બીજી તરફ, ડેમોક્રેટિક પાર્ટીનું ચૂંટણી બજેટ આશરે 19 કરોડ ડોલર રહ્યું છે. આ પરિણામો માત્ર ટ્રમ્પની નીતિઓના જનસમર્થનનો સંકેત નહીં આપે, પરંતુ 2028 ની આગામી રાષ્ટ્રપતિ ચૂંટણી માટે બંને પક્ષોની વ્યૂહરચના પણ નક્કી કરશે.