પશ્ચિમ એશિયામાં વધી રહેલા ભૂ-રાજકીય તણાવ અને અમેરિકા-ઈરાન વચ્ચે યુદ્ધ જેવી સ્થિતિના કારણે ગુજરાતના આર્થિક પાટનગર ગણાતા સૌરાષ્ટ્રના ઉદ્યોગોમાં ચિંતાની લહેર પ્રસરી ગઈ છે. ખાસ કરીને રાજકોટના એન્જિનિયરિંગ ક્લસ્ટર માટે મિડલ ઈસ્ટ એક મોટું માર્કેટ છે, જે હવે જોખમમાં મુકાયું છે.

ઓટો પાર્ટ્સ અને એન્જિનિયરિંગ હબને મોટો ફટકો

રાજકોટના ઓટો પાર્ટ્સ ઉદ્યોગની ઓળખ વિશ્વભરમાં છે. અહીં બનેલા સ્પેરપાર્ટ્સ, બેરિંગ્સ અને મશીનરીની ઈરાન, ઈરાક, સાઉદી અરેબિયા અને કુવૈત જેવા દેશોમાં મોટા પ્રમાણમાં નિકાસ થાય છે. જો યુદ્ધ ફાટી નીકળે તો સપ્લાય ચેઈનમાં દરિયાઈ માર્ગો બંધ થવાથી અથવા નૂર (Freight) દરમાં તોતિંગ વધારો થવાથી નિકાસ અટકી શકે છે. પેમેન્ટ અટકી જવાની બીક રહેશે. યુદ્ધની સ્થિતિમાં આંતરરાષ્ટ્રીય બેંકિંગ વ્યવહારો ખોરવાતા અગાઉ મોકલેલા માલના નાણાં ફસાઈ જવાની ભીતિ ઉદ્યોગપતિઓ વ્યક્ત કરી રહ્યા છે.

ઈઝરાયેલમાં ખેતીના ઓજારોની માગ પર અસર

માત્ર ઓટો પાર્ટ્સ જ નહીં, પરંતુ સૌરાષ્ટ્રમાં બનતા આધુનિક ખેતીના ઓજારો (Agricultural Implements) ની ઈઝરાયેલમાં ભારે માગ રહે છે. ઈઝરાયેલ અને આસપાસના વિસ્તારોમાં અશાંતિ વધતા નવા ઓર્ડર્સ પર બ્રેક વાગી શકે છે. રાજકોટના અનેક એકમો માત્ર એક્સપોર્ટ ઓરિએન્ટેડ છે, જેમના માટે આ સ્થિતિ આર્થિક નુકસાન નોતરી શકે તેમ છે.