બનાવની પ્રાપ્ત વિગત મુજબ શહેરના 150 ફૂટ રોડ પર ગોવર્ધન ચોક પાસે ખોડિયારનગરમાં રહેતો અને કલરકામની મજૂરી કરતો સુરજ તિલકચંદ પાલ (ઉ.વ.19)નો યુવક બપોરે ચારેક વાગ્યે વગડ ચોકડી પાસે મવડી પાળ રોડ પર આવેલી નિલેશભાઈ મહેતાની ધ ફોર્ટીન બાંધકામ સાઈટ પર ચોથા માળે બાલ્કનીમાં કલરકામ કરતો હતો ત્યારે શરીરનું બેલેન્સ ગુમાવી દેતા નીચે પટકાતા ગંભીર ઈજાઓ થઇ હતી. બનાવના પગલે અન્ય શ્રમિકો દોડી ગયા હતા અને યુવકને સારવાર માટે 108 મારફતે સિવિલ હોસ્પિટલમાં ખસેડવામા આવતા તેનું ચાલુ સારવાર દરમિયાન મોત નીપજ્યું હતું. બનાવની જાણ હોસ્પિટલ ચોકીના સ્ટાફે તાલુકા પોલીસને કરતા પોલીસ સ્ટાફે હોસ્પિટલ પહોંચી જરૂરી કાર્યવાહી કરી હતી.

મૃત્યુ પામનાર યુવક મૂળ યુપીનો રહેવાસી હતો અને બે ભાઈ એક બહેનમાં નાનો હતો અને બે વર્ષથી રાજકોટમાં રહી કલરકામની મજૂરી કરતો હતો. યુવાનના મૃત્યુથી પરિવારમાં કલ્પાંત સર્જાયો હતો. આગળની તપાસ તાલુકા પોલીસે હાથ ધરી છે.