સોશિયલ મીડિયા પ્લેટફોર્મ પર 'લિટલ ગ્લવ્ઝ' તરીકે લોકપ્રિય અને લાખો સબ્સ્ક્રાઇબર્સ ધરાવતી સુરતની જાણીતી યુટ્યુબર શિવાની કપિલાના જહાંગીરપુરા સ્થિત ઘરમાં એક ભયાનક અકસ્માત સર્જાયો છે. શિવાનીના બેડરૂમમાં ચાર્જિંગમાં મુકેલી એક વાયરલેસ પાવર બેંકમાં અચાનક પ્રચંડ બ્લાસ્ટ થતાં આખા રૂમમાં ભીષણ આગ લાગી ગઈ હતી. આ ભયાનક આગની લપેટમાં આવતા શિવાનીની આખી દુનિયા વેરવિખેર થઈ ગઈ છે. અકસ્માતમાં સદનસીબે મોટી જાનહાનિ ટળી છે, પરંતુ યુટ્યુબ તરફથી સખત મહેનત બાદ મળેલા પ્રતિષ્ઠિત ડાયમંડ, ગોલ્ડન અને સિલ્વર પ્લે બટન સહિત લાખો રૂપિયાનો કિંમતી સામાન બળીને રાખ થઈ ગયો છે.

શિવાની કપિલાએ પોતાના સોશિયલ મીડિયા હેન્ડલ પર એક હૃદયદ્રાવક વીડિયો શેર કરીને આ ચોંકાવનારી ઘટનાની આપવીતી જણાવી છે. તેણે રૂદન કરતા કહ્યું કે, તેની સાસુને અચાનક ખૂબ જ તીવ્ર તાવ આવવાને કારણે તે તેમને હોસ્પિટલમાં દાખલ કરવા માટે ગઈ હતી. આ સમયે ઘરમાં માત્ર તેના પિતા જ હાજર હતા. શિવાની હજુ હોસ્પિટલ પહોંચી જ હતી કે તેના પર ફોન આવ્યો કે તેના બેડરૂમમાં આગ લાગી છે. શરૂઆતમાં તેને લાગ્યું કે કોઈ નાની-મોટી શોર્ટ સર્કિટની આગ હશે, પરંતુ જ્યારે તે તાબડતોબ ઘરે પહોંચી ત્યારે ત્યાંના દ્રશ્યો જોઈને તેના પગ નીચેથી જમીન સરકી ગઈ હતી. પાવર બેંકના બ્લાસ્ટને કારણે આખો આલીશાન રૂમ કાળોમેશ થઈ ગયો હતો અને આગની જવાળાઓમાં બધું જ નાશ પામ્યું હતું.

ભયાનક ધુમાડા વચ્ચેથી પાલતુ શ્વાન 'કોકો'નો આબાદ બચાવ

આ અકસ્માત સર્જાયો ત્યારે શિવાનીનો વ્હાલો પાલતુ કૂતરો 'કોકો' તે જ રૂમમાં બંધ હતો. રૂમમાં એસી ચાલુ હોવાને કારણે કોકોને ત્યાં આરામ માટે રાખવામાં આવ્યો હતો. બેડરૂમમાંથી ધુમાડાના ગોટેગોટા નીકળતા જોઈ શિવાનીના પિતા અને તેમના મેનેજર રાજીવે ત્વરિત બુદ્ધિ વાપરી હતી. તેમણે ફાયર બ્રિગેડની રાહ જોયા વિના ડોલ ભરી ભરીને પાણી નાખવાનું શરૂ કર્યું હતું અને આગ પર કાબૂ મેળવવાનો પ્રયાસ કર્યો હતો. આ બંને જાંબાઝોએ પોતાની જિંદગી જોખમમાં મૂકીને ભયાનક ધુમાડાની વચ્ચેથી કોકોને સુરક્ષિત બહાર કાઢ્યો હતો. શિવાનીએ જણાવ્યું કે, 'જાકો રાખે સાઇયાં, માર સકે ન કોય' એ કહેવત અહીં સાચી સાબિત થઈ છે, કારણ કે કોકોને માત્ર પાછળના ભાગે થોડા વાળ બળવા સિવાય કોઈ ગંભીર શારીરિક ઈજા થઈ નથી.

વર્ષોની મહેનતથી બનાવેલા સપનાના ઘરમાં બધું જ ઓગળી ગયું

આગ એટલી પ્રચંડ અને વિનાશક હતી કે રૂમમાં રાખેલું એસી પ્લાસ્ટિકના રમકડાની જેમ સંપૂર્ણપણે ઓગળી ગયું હતું. આ સિવાય શિવાનીની મોંઘી બ્રાન્ડેડ બેગ્સ, કિંમતી કપડાં, ડિઝાઈનર એક્સેસરીઝ, આખો કબાટ અને તેની પુત્રી આધ્યાની બાળપણની યાદગીરી રૂપે દીવાલ પર બનાવેલું સ્પેશિયલ વોલ ડ્રોઈંગ પણ બળીને ભસ્મીભૂત થઈ ગયું છે. શિવાનીએ ભારે હૃદયે જણાવ્યું કે, "એક સામાન્ય મિડલ ક્લાસ પરિવારમાંથી આવીને મેં રાત-દિવસ એક કરીને મારી મહેનતથી આ સપનાનું ઘર બનાવ્યું હતું. મારી ઓળખ અને ગર્વ સમાન યુટ્યુબના એવોર્ડ્સ પણ આ આગમાં ઓગળી ગયા છે, જેનું મને અસહ્ય દુઃખ છે."

ઝેરી ગેસથી પરિવાર બીમાર, ચાહકોને ક્યારેય ન ભૂલવા જેવી ચેતવણી

આ ગંભીર દુર્ઘટના બાદ રૂમમાં ફેલાયેલા અત્યંત ઝેરી કાર્બન મોનોક્સાઇડ ધુમાડાના શ્વાસમાં જવાને કારણે શિવાની, તેના પિતા અને મેનેજર રાજીવની તબિયત લથડી છે. આ ત્રણેય લોકોને સતત ઉલ્ટીઓ અને પેટમાં અસહ્ય દુખાવાની ફરિયાદ થતાં સારવાર લેવી પડી છે.

આ વીડિયોના માધ્યમથી શિવાનીએ તેના લાખો ચાહકો અને સામાન્ય જનતાને એક બહુ મોટી ચેતવણી આપી છે. તેણે કરબદ્ધ અપીલ કરી છે કે, કોઈએ પણ ક્યારેય પણ પાવર બેંક, મોબાઈલ ફોન કે લેપટોપ જેવા ગેજેટ્સને બેડ પર, ગાદલા પર અથવા રાત્રે સૂતી વખતે પોતાના માથાની નજીક રાખીને ચાર્જિંગમાં ન મૂકવા જોઈએ. આજકાલ ઘરોમાં વપરાતી તમામ ચીજો સિન્થેટિક હોવાથી તે આગ ખૂબ જ ઝડપથી પકડી લે છે. માત્ર એક નાની મિનિટની બેદરકારી કે આળસ આખા પરિવારને રસ્તા પર લાવી શકે છે. હાલમાં આખો પરિવાર આ માનસિક અને આર્થિક આઘાતમાંથી બહાર આવવા મથામણ કરી રહ્યો છે.