મોટી પાનેલી ગામે આવેલી વાડીમાં થ્રેસર મશીનમાં માંડવી કાઢતી વખતે શ્રમિક યુવતીનો દુપટ્ટો મશીનમાં આવી જતા ખેંચાયા બાદ તેનું માથું પણ મશીનમાં આવી જતા ગંભીર ઇજા થવાથી ઉપલેટા બાદ રાજકોટ વોકહાર્ટ હોસ્પિટલ અને ત્યાંથી રાજકોટ સિવિલમાં ખસેડવામાં આવતા તેણીનું મોત નીપજ્યું હતું. બનાવના પગલે પરિવારમાં ગમગીની છવાઈ છે.

બનાવની પ્રાપ્ત વિગત મુજબ મોટી પાનેલી ગમે રહેતી જીગુબેન દાનાભાઈ સાગઠીયા (ઉ.વ.18)ની યુવતી ગત તા.30ના રોજ ગામની સીમમાં આવેલી રાજભાઈ વસંતભાઈ ગજેરાની વાડીએ સાથી શ્રમિકો સાથે મજૂરી કામે ગઈ હતી દરમિયાન વાડીએ માંડવી ઉપાડવાનું કામ ચાલુ હોવાથી યુવતી થ્રેસરમાં કામ કરી રહી હતી એ વખતે દુપટ્ટો થ્રેસરમાં આવી જતા ખેંચાઈ હતી અને માથું પણ થ્રેસરમાં આવી જતા ગંભીર ઈજાઓ થઇ હતી. ઘટનાના પગલે કામ કરતા શ્રમિકો દોડી આવ્યા હતા અને તાકીદે સારવાર માટે ઉપલેટાની ક્રિષ્ના હોસ્પિટલમાં અને ત્યાંથી રાજકોટ વોકહાર્ટમાં અને ત્યાર બાદ રાજકોટ સિવિલમાં લાવતા તેણીનું મોત થયું હતું.

બનાવ અંગે હોસ્પિટલ ચોકીના સ્ટાફે ભાયાવદર પોલીસને જાણ કરતા પોલીસે હોસ્પિટલ પહોંચી જરૂરી કાર્યવાહી કરી હતી. મૃતક બે બહેન એક ભાઇમાં નાની હતી. બનાવથી પરિવારમાં કલ્પાંત સર્જાયો હતો.