ગીર સોમનાથ જિલ્લાના કોડીનાર તાલુકામાં આવેલા છારા ગામના દરિયા કિનારેથી મંગળવારે એક અત્યંત દુઃખદ અને ચિંતાજનક ઘટના સામે આવી છે. મિત્રો સાથે દરિયા કિનારે ફરવા ગયેલા ધોરણ ૧૦ અને ૧૧ના પાંચ વિદ્યાર્થીઓ દરિયાના પ્રચંડ પ્રવાહમાં ડૂબવા લાગતાં અફરાતફરીનો માહોલ સર્જાયો હતો. ઘટના સ્થળે હાજર સ્થાનિક માછીમારોની ત્વરિત સતર્કતા અને સાહસના કારણે ત્રણ કિશોરોને જીવિત બહાર કાઢી લેવામાં સફળતા મળી છે, જ્યારે અન્ય બે કિશોરો દરિયાના ઊંડા પાણીમાં ગરકાવ થઈ જતાં તેમની શોધોળ હાથ ધરવામાં આવી છે.

મિત્રને બચાવવા જતાં અન્ય કિશોરો પણ દરિયાના કરંટમાં સપડાયા

મળતી માહિતી અનુસાર, પાંચેય કિશોરો અભ્યાસ કરતા વિદ્યાર્થીઓ છે અને બપોરના સમયે દરિયા કિનારે ફરવા પહોંચ્યા હતા. પ્રાથમિક તપાસમાં બહાર આવ્યા મુજબ, શરૂઆતમાં બે કિશોરો દરિયામાં ન્હાવા માટે પાણીમાં ઉતર્યા હતા. પરંતુ દરિયામાં અચાનક આવેલ જોરદાર કરંટ અને ઊંડા પાણીના પ્રવાહમાં તેઓ સપડાઈને ડૂબવા લાગ્યા હતા. પોતાના સાથી મિત્રોને પાણીમાં ગરકાવ થતાં જોઈને કિનારે ઉભેલા અન્ય ત્રણ કિશોરો પણ તેમને ઉગારવા માટે દરિયામાં કૂદી પડ્યા હતા. જોકે દરિયાના રાક્ષસી મોજાં અને પ્રચંડ પ્રવાહ સામે તેઓ પણ લાચાર બનીને ડૂબવા લાગ્યા હતા.

સ્થાનિક માછીમારો બન્યા દેવદૂત: ૩ કિશોરોને સમયસર ઉગારી લીધા

આ દુર્ઘટના સર્જાતાં જ આસપાસના વિસ્તારમાં ચીસાચીસ મચી ગઈ હતી. નજીકમાં જ હાજર સ્થાનિક માછીમારોનું ધ્યાન જતાં તેઓ પોતાની જાનની પરવા કર્યા વિના તુરંત જ દરિયાના પાણીમાં કૂદી પડ્યા હતા. માછીમારોએ સમયસૂચકતા વાપરીને બચાવ કામગીરી શરૂ કરી અને ત્રણ કિશોરોને સુરક્ષિત રીતે દરિયામાંથી બહાર ખેંચી કાઢ્યા હતા. જીવિત બચાવી લેવાયેલા ત્રણેય સગીરોને તાત્કાલિક સારવાર અર્થે ખસેડવામાં આવ્યા હતા. પરંતુ દુર્ભાગ્યવશ અન્ય બે કિશોરો દરિયાના ભારે પ્રવાહમાં તણાઈને ઊંડા પાણીમાં ગુમ થઈ ગયા હતા.

ડ્રોન કેમેરાની મદદથી યુદ્ધના ધોરણે શોધખોળ, ગામમાં ભારે ચિંતા

દરિયાના વિશાળ વિસ્તારમાં તણાઈ ગયેલા બંને કિશોરોને શોધવા માટે સ્થાનિક માછીમારો, ગ્રામજનો અને સ્થાનિક પ્રશાસન દ્વારા યુદ્ધના ધોરણે રેસ્ક્યુ ઓપરેશન ચલાવવામાં આવી રહ્યું છે. શોધખોળ કામગીરી વધુ ઝડપી અને અસરકારક બને તે માટે આધુનિક ડ્રોન કેમેરાનો પણ ઉપયોગ કરવામાં આવી રહ્યો છે. લાપતા બનેલા બંને ૧૬ વર્ષીય કિશોરોની ઓળખ નિર્મળ હમીરભાઈ ચુડાસમા અને ભાવસિંહ ભરતભાઈ ચુડાસમા તરીકે થઈ છે. આ કરૂણ હોનારતને પગલે છારા ગામ સહિત સમગ્ર વિસ્તારમાં ગમગીની છવાઈ ગઈ છે અને પરિવારજનો બંને બાળકો સલામત મળી આવે તે માટે પ્રાર્થના કરી રહ્યા છે.