એક નાની ભૂલ કેવી રીતે જીવલેણ સાબિત થઈ શકે છે તેનું કરુણ ઉદાહરણ તમિલનાડુના મદુરાઈમાંથી સામે આવ્યું છે. યુટ્યુબ પર જોયેલા એક અપ્રમાણિત ઘરેલું ઉપાયને અનુસરીને 19 વર્ષીય યુવતીએ પોતાનો જીવ ગુમાવ્યો છે. આ ઘટનાએ તેના પરિવારને ઊંડા શોકમાં મુકી દીધો છે તેમજ સમાજ માટે ગંભીર ચેતવણીરૂપ સંદેશ પણ આપ્યો છે કે સોશિયલ મીડિયા પર દર્શાવાતા ખતરનાક અને વૈજ્ઞાનિક રીતે અસાબિત ઉપાયો પર વિશ્વાસ કરવો ઘાતક બની શકે છે.

મૃતક યુવતીની ઓળખ મદુરાઈના મીનામ્બલપુરમ વિસ્તારની રહેવાસી કલૈયારસી તરીકે થઈ છે. પોલીસના જણાવ્યા અનુસાર, કલૈયારસી વજન ઘટાડવાના ઉપાયો અંગે યુટ્યુબ પર વીડિયો જોતી હતી. એક ચેનલમાં બતાવવામાં આવેલા ઉપાયથી પ્રેરિત થઈને તેણે વેંગારમ, જેને સામાન્ય ભાષામાં બોરેક્સ તરીકે ઓળખવામાં આવે છે, તેનું સેવન કર્યું હતું. આ રસાયણ સામાન્ય રીતે ઔદ્યોગિક અને ઘરગથ્થુ સફાઈ માટે વપરાય છે અને માનવ સેવન માટે અત્યંત ખતરનાક માનવામાં આવે છે.

પોલીસ તપાસમાં ખુલ્યું છે કે 16 જાન્યુઆરીના રોજ કલાઈયારાસીએ પૂર્વ મેસી સ્ટ્રીટ પર આવેલી એક સ્થાનિક દવાની દુકાનમાંથી બોરેક્સ ખરીદ્યું હતું. બીજા દિવસે, 17 જાન્યુઆરીની સવારે આશરે 9 વાગ્યે તેણે આ પદાર્થ દવા સમજીને લીધું હતું. થોડા સમય બાદ તેને ગંભીર ઉલ્ટી અને ઝાડાના લક્ષણો શરૂ થયા. પરિવારજનોએ તરત જ તેને નજીકની ખાનગી હોસ્પિટલમાં દાખલ કરી, જ્યાં પ્રાથમિક સારવાર બાદ તેને ઘરે મોકલવામાં આવી.

જો કે, સાંજ પડતાં જ તેની તબિયત ફરી બગડી. ઉલ્ટી, પેટમાં દુખાવો અને નબળાઈ વધી જતાં પરિવારજનોએ તેને નજીકના ક્લિનિકમાં લઈ ગયા. રાત્રે આશરે 11 વાગ્યે તેની હાલત અત્યંત ગંભીર બની જતા તેને તાત્કાલિક રાજાજી સરકારી હોસ્પિટલમાં ખસેડવામાં આવી, પરંતુ ત્યાં પહોંચતા પહેલાં જ ડોક્ટરોએ તેને મૃત જાહેર કરી.

આ ઘટનાના બીજા દિવસે, 18 જાન્યુઆરીએ મૃતકના પિતા લામુરુગન (ઉંમર 51) એ લૌર પોલીસ સ્ટેશનમાં ફરિયાદ નોંધાવી હતી. પોલીસે શંકાસ્પદ મૃત્યુનો ગુનો નોંધીને તપાસ શરૂ કરી છે. પોલીસ દ્વારા દવાની દુકાન, યુટ્યુબ ચેનલ અને સંબંધિત તમામ પાસાઓની તપાસ કરવામાં આવી રહી છે.

આ દુઃખદ ઘટના પછી તબીબી નિષ્ણાતોએ અને અધિકારીઓએ લોકોને અપીલ કરી છે કે વજન ઘટાડવા કે અન્ય આરોગ્ય સંબંધિત મુદ્દાઓ માટે માત્ર પ્રમાણિત ડોક્ટરની સલાહ જ લેવી જોઈએ અને સોશિયલ મીડિયા પર દેખાતા જોખમી ઉપાયોથી દૂર રહેવું જોઈએ.