ઘરબેઠાં કામ કરીને કમાણી કરવાની લાલચમાં સાયબર ઠગોની જાળમાં ફસાયેલી રાજકોટની એક પરિણીતાએ રૂ. ૫.૧૧ લાખ ગુમાવવાનો વારો આવ્યો હતો. શરૂઆતમાં નાની રકમના ટાસ્ક પૂરાં કરાવ્યા બાદ નફા સાથે પૈસા પરત આપી મહિલાનો વિશ્વાસ જીતવામાં આવ્યો હતો. ત્યારબાદ વધુ કમાણીની લાલચ આપીને લાખો રૂપિયા પડાવી લેવાયા હતા. એપ્લિકેશનમાં નફા સહિત રૂ. ૧૩.૫૨ લાખથી વધુની રકમ દેખાડ્યા બાદ તે ઉપાડવા માટે વધુ ૨૦ ટકા રકમની માગણી કરવામાં આવતાં મહિલાને છેતરપિંડી થયાનો ખ્યાલ આવ્યો હતો. જેથી આ અંગે ફરિયાદ નોંધાવી છે.

સાયબર ફ્રોડના આ બનાવ અંગે કુવાડવા રોડ પર રણછોડનગર સોસાયટીની શેરી નં. ૮માં રહેતાં પ્રીમાબેન અભિષેકભાઈ રામાણી (ઉ.વ. ૩૨)એ સાયબર ક્રાઇમ પોલીસમાં ફરિયાદ નોંધાવી છે. તેમના પતિ ચાંદીકામ કરે છે અને તેઓ ઘરકામ કરે છે. ફરિયાદના આધારે પોલીસે અલગ-અલગ બેંક ખાતાધારકો સામે માહિતી પ્રૌદ્યોગિકી અધિનિયમ સહિતની કલમો હેઠળ ગુનો નોંધી તપાસ શરૂ કરી છે.

ફરિયાદ મુજબ, ગત તા. ૧૭ ઓગસ્ટના રોજ પ્રીમાબેન સામાજિક માધ્યમ ઇન્સ્ટાગ્રામનો ઉપયોગ કરતાં હતાં ત્યારે મિન્ત્રાના નામે ઘરેથી કામ કરીને કમાણી કરવાની જાહેરાત જોવા મળી હતી. જાહેરાતમાં આપેલી કડી ખોલતાં ટેલિગ્રામ પર મિન્ત્રા જેવા લોગોવાળી ચેનલ ખૂલી હતી. ત્યાં વિગતો મોકલ્યા બાદ તેમને ટાસ્ક પૂરાં કરવા માટે મિન્ત્રાના નામે મોબાઇલ એપ્લિકેશન ઉતારી ખાતું બનાવવાનું કહેવામાં આવ્યું હતું.

પ્રથમ ટાસ્ક માટે રૂ. ૧૦૦ જમા કરાવતાં નફા સહિત રૂ. ૨૪૭ પરત મળ્યા હતા. ત્યારબાદ ચાર ટાસ્ક પૂરાં કરવા રૂ. ૨,૪૦૦ ભરાવાયા હતા અને નફા સહિત રૂ. ૪,૦૬૭ બતાવી કમિશન બાદ રૂ. ૩,૮૬૩ તેમના બેંક ખાતામાં જમા કરાવાયા હતા. આ રીતે શરૂઆતમાં નાણાં પરત મળતાં મહિલાને વિશ્વાસ બેઠો હતો.

બાદમાં નવ મુખ્ય ટાસ્ક અને દરેક ટાસ્ક હેઠળ છ પેટા ટાસ્ક મળી કુલ ૫૪ ટાસ્ક પૂરાં કરવાના બહાને અલગ-અલગ યુપીઆઈ મારફતે રૂ. ૫.૧૧ લાખ જમા કરાવાયા હતા. ટાસ્ક પૂરાં થતાં એપ્લિકેશનમાં નફા સહિત રૂ. ૧૩,૫૨,૮૦૭ની રકમ દેખાડવામાં આવી હતી. જોકે, આ રકમ ઉપાડવાની વિનંતી કરતાં બેંક ખાતું સ્થગિત હોવાનું જણાવી તેને ફરી શરૂ કરવા ૨૦ ટકા રકમ ભરવાની માગણી કરાઈ હતી. શંકા જતાં મહિલાએ વધુ પૈસા ભર્યા નહોતા અને ૧૯૩૦ પર જાણ કરી હતી. સાયબર ક્રાઇમના પીઆઈ એમ.ડી. ગઢવી અને તેમની ટીમે તપાસ હાથ ધરી છે.