તમાકુ ઉત્પાદનો પર વધેલા ટેક્સને કારણે સિગારેટના ભાવમાં ફરી વધારો થયો છે. અહેવાલ મુજબ, આઈટીસીએ પોતાની કેટલીક બ્રાન્ડ્સના ભાવમાં વધારો કર્યો છે. તાજેતરના ભાવવધારાની અસર ક્લાસિક કનેક્ટ અને ગોલ્ડ ફ્લેક સુપર સ્ટાર પર થઈ છે.

ડિલર પાસેથી મળેલી માહિતી મુજબ, નવા ભાવવાળા પેકેટ બજારમાં આવવા લાગ્યા છે. ૨૦ ક્લાસિક કનેક્ટ સિગારેટના પેકેટની કિંમત હવે રૂ.428 થઈ ગઈ છે, જ્યારે અગાઉ તેની કિંમત રૂ.390 હતી. આ રીતે એક પેકેટ પર રૂ.38નો વધારો, એટલે કે આશરે 9.74 ટકાનો ભાવવધારો થયો છે.

ગોલ્ડ ફ્લેક સુપર સ્ટારના 10 સિગારેટના પેકેટની કિંમત હવે રૂ.89 થઈ ગઈ છે. અગાઉ આ પેકેટ રૂ.79માં મળતું હતું. એટલે કે ગ્રાહકોને હવે એક પેકેટ માટે રૂ.10 વધુ ચૂકવવા પડશે, જે આશરે 12.66 ટકાનો વધારો છે.

આ ભાવવધારા પાછળ તમાકુ ઉત્પાદનો પર લાગુ થયેલા નવા ટેક્સ માળખાની પણ અસર છે. 1 ફેબ્રુઆરીથી સિગારેટ અને અન્ય તમાકુ ઉત્પાદનો પર 40 ટકા જીએસટી દર લાગુ થયો છે. આ ઉપરાંત વધારાની એક્સાઇઝ ડ્યૂટીનું નવું માળખું પણ અમલમાં આવ્યું છે.

40 ટકા જીએસટી સ્લેબમાં સિગારેટ ઉપરાંત પાન મસાલા, વધારાની ખાંડવાળું એરેટેડ વોટર, કાર્બોનેટેડ બેવરેજીસ, મિડ-સાઇઝ અને મોટી કાર, 350 સીસીથી વધુ ક્ષમતાવાળી મોટરસાઇકલ, વ્યક્તિગત ઉપયોગ માટેના વિમાન અને મનોરંજન માટેની યાટ્સ જેવા ઉત્પાદનોનો પણ સમાવેશ થાય છે.

સિગારેટ માટે વધારાની એક્સાઇઝ ડ્યૂટી 1,000 સ્ટિક દીઠ રૂ.2,050થી રૂ.8,500 સુધી છે. આ રકમ સિગારેટની લંબાઈ અને તેમાં ફિલ્ટર છે કે નહીં તેના આધારે નક્કી થાય છે.

આ ડ્યૂટી જીએસટી ઉપરાંત લાગુ પડે છે, જેના કારણે કંપનીઓ પરનો કુલ ટેક્સ બોજ વધ્યો છે. ઉત્પાદકોએ વધેલા ટેક્સ ખર્ચનો એક હિસ્સો ગ્રાહકો પર નાખ્યો છે અને લાંબી તથા ફિલ્ટરવાળી સિગારેટ પર તેની વધુ અસર જોવા મળી રહી છે.

ક્લાસિક કનેક્ટ અને ગોલ્ડ ફ્લેક સુપર સ્ટારના ભાવમાં આ પહેલાં પણ વધારો થઈ ચૂક્યો છે. ફેબ્રુઆરીમાં ક્લાસિક કનેક્ટનો ભાવ રૂ.300થી વધીને રૂ.360 અને ત્યારબાદ રૂ.390 થયો હતો. તે જ સમયગાળામાં ગોલ્ડ ફ્લેક સુપર સ્ટારનો ભાવ રૂ.59થી વધીને રૂ.70 થયો હતો.