જમ્મુ-કાશ્મીરના દક્ષિણ ભાગમાં આવેલા કુલગામ જિલ્લામાં આતંકવાદીઓએ ફરી એકવાર નિર્દોષ અને બિન-કાશ્મીરી પરપ્રાંતીય મજૂરોને નિશાન બનાવ્યા છે. કુલગામમાં અંધાધૂંધ ગોળીબાર કરીને આતંકીઓએ બે પરપ્રાંતીય મજૂરોને ગંભીર રીતે વિંધી નાખ્યા હતા. આ કાયરતાપૂર્ણ હુમલામાં એક મજૂરનું ઘટનાસ્થળે જ કરુણ મોત નીપજ્યું છે, જ્યારે અન્ય એક શ્રમિક ગંભીર રીતે ઈજાગ્રસ્ત થતાં તેને સારવાર અર્થે નજીકની હોસ્પિટલમાં દાખલ કરવામાં આવ્યો છે.

​​​​​​​નિર્દોષ શ્રમિકો પર અંધાધૂંધ ગોળીબાર
મળતી પ્રાથમિક માહિતી અનુસાર કુલગામ વિસ્તારમાં કામ કરી રહેલા પરપ્રાંતીય મજૂરો પર અચાનક આવી પહોંચેલા સશસ્ત્ર આતંકીઓએ નજીકથી ગોળીઓ ચલાવી હતી. આતંકીઓએ બિન-કાશ્મીરી મજૂરોને લક્ષ્ય બનાવીને ટાર્ગેટ કિલીંગ કરવાનો શરમજનક પ્રયાસ કર્યો હતો.

હુમલાની ઘટના બનતાની સાથે જ ભારતીય સેના, જમ્મુ-કાશ્મીર પોલીસ અને સીઆરપીએફ (CRPF) ની સંયુક્ત ટીમોએ સમગ્ર વિસ્તારને ઘેરી લીધો છે અને હુમલાખોર આતંકીઓને દબોચી લેવા માટે વ્યાપક સર્ચ ઓપરેશન હાથ ધર્યું છે.