હવામાન વિભાગ (IMD) દ્વારા રાજ્યમાં આગામી ૨૪ કલાક દરમિયાન ભારેથી અતિભારે વરસાદની તીવ્ર સંભાવના વ્યક્ત કરવામાં આવી છે. રાજ્યના વાતાવરણમાં સર્જાયેલી ચાર મજબૂત વરસાદી સિસ્ટમના કારણે નીચાણવાળા વિસ્તારોમાં પાણી ભરાવા, જળાશયો અને નદીઓમાં જળસ્તર ઝડપથી વધવા તેમજ સામાન્ય જનજીવન પર વિપરીત અસર થવાની શક્યતા સેવાઈ રહી છે. આ સ્થિતિને પહોંચી વળવા હવામાન વિભાગે રાજ્યના અનેક જિલ્લાઓ માટે 'રેડ' અને 'ઓરેન્જ' એલર્ટ જારી કર્યા છે.

મોરબી, રાજકોટ સહિત ૬ જિલ્લામાં 'રેડ એલર્ટ'

મેઘરાજાના તોફાની મિજાજને ધ્યાનમાં રાખીને હવામાન વિભાગે મોરબી, સુરેન્દ્રનગર, અમદાવાદ, રાજકોટ, બોટાદ અને ભાવનગર જિલ્લાઓમાં અત્યંત અતિભારે વરસાદની આશંકા સાથે રેડ એલર્ટ જાહેર કર્યું છે. આ જિલ્લાઓમાં પૂર જેવી સ્થિતિ સર્જાવાની શક્યતા હોવાથી સ્થાનિક વહીવટી તંત્રને હાઈ એલર્ટ મોડ પર મૂકવામાં આવ્યું છે. એનડીઆરએફ (NDRF) અને એસડીઆરએફ (SDRF)ની ટીમોને પણ તૈનાત રાખીને નીચાણવાળા વિસ્તારોમાં રહેતા લોકોને સાવચેત રહેવા જણાવાયું છે.

ઉત્તર, મધ્ય અને સૌરાષ્ટ્રના ૧૩ જિલ્લામાં 'ઓરેન્જ એલર્ટ'

અતિભારે વરસાદની આગાહી વચ્ચે રાજ્યના ૧૩ અન્ય જિલ્લાઓ માટે ઓરેન્જ એલર્ટ જાહેર કરવામાં આવ્યું છે. જેમાં વાવ-થરાદ, બનાસકાંઠા, પાટણ, મહેસાણા, સાબરકાંઠા, અરવલ્લી, ગાંધીનગર, ખેડા, આણંદ, ભરૂચ, અમરેલી, જામનગર અને કચ્છ જિલ્લાઓનો સમાવેશ થાય છે. આ વિસ્તારોમાં ગાજવીજ અને પવન સાથે ભારે વરસાદ થવાની શક્યતા હોવાથી લોકોને બિનજરૂરી મુસાફરી ટાળવા અને હવામાન વિભાગની સત્તાવાર સૂચનાઓનું ચુસ્તપણે પાલન કરવા અપીલ કરાઈ છે.

તમામ બંદરો પર ૩ નંબરનું સિગ્નલ અને માછીમારોને ચેતવણી

દરિયાઈ પટ્ટા પર પવનની ગતિ વધુ રહેવાની શક્યતા હોવાથી સાવચેતીના ભાગરૂપે રાજ્યના તમામ નાના-મોટા બંદરો પર ૩ નંબરનું ભયસૂચક સિગ્નલ (Local Cautionary Signal) લગાવી દેવામાં આવ્યું છે. દરિયામાં ઉંચા મોજા ઉછળવાની અને તોફાની પવન ફુંકાવાની સંભાવનાને કારણે માછીમારોને આગામી સૂચના ન મળે ત્યાં સુધી દરિયો ન ખેડવા અને તમામ દરિયાઈ પ્રવૃત્તિઓથી દૂર રહેવાની કડક સૂચના આપવામાં આવી છે.​​​​​​​

આગામી ૨૪ કલાક બાદ વરસાદનું જોર ઘટશે

હવામાન વિભાગના અનુમાન મુજબ, આગામી ૨૪ કલાક સુધી રાજ્યમાં ચોમાસાનો કડક મિજાજ જોવા મળશે, પરંતુ ત્યારબાદ વરસાદની તીવ્રતામાં ધીમે ધીમે ઘટાડો નોંધાવાની પૂરેપૂરી શક્યતા છે. તેમ છતાં, જળાશયોમાં થઈ રહેલી પાણીની આવક અને વાતાવરણની સ્થાનિક પરિસ્થિતિને ધ્યાનમાં રાખીને નાગરિકોને સતત હવામાન અપડેટ્સ પર નજર રાખવા અને તકેદારી જાળવવાની સલાહ આપવામાં આવી છે.