ઉત્તર પ્રદેશના પ્રયાગરાજ જિલ્લામાં એક મકાનની અંદર જમીન ખોદતાં રોકડ રકમથી ભરેલા અનેક ડ્રમ મળી આવવાની ચોંકાવનારી ઘટના પ્રકાશમાં આવી છે. પ્રાથમિક માહિતી અનુસાર જમીનમાં દાટવામાં આવેલા ડ્રમમાં કરોડો રૂપિયાની નોટોની થપ્પીઓ છુપાવવામાં આવી હતી. બુધવારે સાંજથી શરૂ થયેલી પોલીસ કાર્યવાહીમાં મોડી રાત સુધી આશરે રૂ. ચાર કરોડની ગણતરી થઈ હતી. સૂત્રોના જણાવ્યા અનુસાર કુલ રકમ રૂ. ૬૦ કરોડથી વધુ હોઈ શકે છે. જોકે પોલીસે સ્પષ્ટ કર્યું છે કે તમામ નોટોની ગણતરી પૂરી થયા પછી જ ચોક્કસ રકમ જાહેર કરી શકાશે.

પ્રાપ્ત માહિતી અનુસાર પ્રયાગરાજ જિલ્લાના બરઈપુર રામનગર વિસ્તારની આ ઘટના છે. અહીં રહેતો એક વ્યક્તિ અગાઉ મહારાષ્ટ્રના પુણે શહેરમાં આવેલી એક પેઢીમાં નોકરી કરતો હતો. સૂત્રોનો દાવો છે કે નોટબંધીના સમયગાળા દરમિયાન આ વ્યક્તિ મોટી માત્રામાં રોકડ રકમ લઈને ફરાર થયો હતો.

ત્યારબાદ તે પોતાના વતન પરત ફર્યો હતો અને અનેક વીઘા જમીન ખરીદી હતી. બાકી રહેલી રોકડ રકમ તેણે ડ્રમમાં ભરીને પોતાના મકાનની અંદર જમીનમાં દાટી દીધી હોવાની શંકા છે.

આ સમગ્ર મામલો પડોશી સાથે થયેલા વિવાદ પછી બહાર આવ્યો હોવાનું જણાવાય છે. થોડા દિવસ પહેલાં આ વ્યક્તિને પોતાના સંબંધી પડોશી સાથે બોલાચાલી થઈ હતી. આ વિવાદ દરમિયાન જમીનમાં મોટી માત્રામાં રોકડ છુપાવેલી હોવાની વાત પોલીસ સુધી પહોંચી હતી.

ઉચ્ચ અધિકારીઓના નિર્દેશ પછી બુધવારે રાત્રે પોલીસે મકાનને ચારેબાજુથી ઘેરી લીધું હતું. શંકાસ્પદ વ્યક્તિને અટકાયતમાં લઈને પૂછપરછ કરવામાં આવી હતી. ત્યારબાદ તેની નિશાનદેહી પર મકાનની અંદર ખોદકામ શરૂ કરવામાં આવ્યું હતું.

ખોદકામ દરમિયાન એક પછી એક રોકડ રકમ ભરેલા ડ્રમ બહાર આવતાં પોલીસ અધિકારીઓ પણ આશ્ચર્યચકિત થયા હતા. મોટી સંખ્યામાં નોટો મળી આવતાં તેમની ગણતરી માટે સંબંધિત વિભાગના કર્મચારીઓને સ્થળ પર બોલાવવામાં આવ્યા હતા.

હવે તપાસનો મુખ્ય મુદ્દો આટલી મોટી રોકડનો મૂળ સ્ત્રોત શોધવાનો છે. આરોપી ખરેખર કોઈ પેઢીમાંથી નાણાં લઈને ફરાર થયો હતો કે કેમ અને રોકડ મેળવવામાં અન્ય લોકોની સંડોવણી હતી કે નહીં તેની તપાસ જરૂરી બની છે.

નોટોની ગણતરી, તેમની વિગતો અને નાણાંની માલિકી અંગેના પુરાવા મળ્યા પછી જ આ ઘટનાનું સંપૂર્ણ ચિત્ર સ્પષ્ટ થશે. પોલીસે હાલ રૂ. ૬૦ કરોડની રકમને સત્તાવાર સમર્થન આપ્યું નથી.