રાષ્ટ્રપતિ ડોનાલ્ડ ટ્રમ્પે કહ્યું છે કે અમેરિકાની મધ્યસત્ર ચૂંટણીઓ પછી તુરંત જ ઈરાન સાથેનું યુદ્ધ સમાપ્ત થઈ જશે. ઈરાન વધુ સમય સુધી ટકી શકશે નહીં. અમેરિકામાં નવેમ્બરમાં મધ્યસત્ર ચૂંટણીઓ યોજાવાની છે. ટ્રમ્પે દલીલ કરી હતી કે ઈરાન આ સંઘર્ષને વધુ સમય સુધી ચાલુ રાખી શકશે નહીં. ટ્રમ્પે આ દાવો એવા સમયે કર્યો છે જ્યારે મધ્ય પૂર્વમાં અમેરિકા અને ઈરાન વચ્ચે ફરીથી તણાવ વધી રહ્યો છે. ટ્રમ્પે તેહરાન પર અમેરિકન ચૂંટણીઓને પ્રભાવિત કરવાનો પણ આરોપ લગાવ્યો હતો. યુદ્ધનો સાતમો મહિનો છે, પણ ફક્ત થોડા અઠવાડિયા ચાલશે. ટ્રમ્પે ડલ્લાસમાં રિપબ્લિકન રાષ્ટ્રીય સંમેલનમાં જતા પહેલા આ નિવેદન આપ્યું હતું

ટ્રમ્પના મતે, ઈરાનનું નેતૃત્વ આ ચૂંટણીઓને પ્રભાવિત કરવાનો પ્રયાસ કરવા માટે ઉત્સુક છે. ટ્રમ્પે સ્પષ્ટતા કરી કે તેઓ નજીકના ભવિષ્યમાં ઈરાન સાથે કોઈપણ વાટાઘાટો પર વિચાર કરી રહ્યા નથી. સાચું કહું તો અમે એવું કરવા માંગતા નથી. શરૂઆતમાં, હું એક ડીલ કરવા માંગતો હતો. હવે પરિસ્થિતિ એટલી બદલાઈ ગઈ છે કે તેમની પાસે બહુ ઓછા દેશો બાકી છે, એટલે કે ઈરાન પાસે બહુ ઓછા સાથી કે સહાયક દેશો બાકી છે. આથી જ અમે એવું કરવા માગતા નથી. હા, વાતચીત શક્ય છે, પરંતુ અમે હાલમાં તે વિશે વિચારી રહ્યા નથી. ટ્રમ્પે કહ્યું કે વર્તમાન પરિસ્થિતિઓમાં, અમેરિકા ઈરાન સાથે કોઈ નવી ડીલ કે વાટાઘાટો શરૂ કરવાનો ઇરાદો ધરાવતો નથી.

ટ્રમ્પે આરોપ લગાવ્યો કે ઈરાન નવેમ્બરમાં યોજાનારી અમેરિકાની મધ્યસત્ર ચૂંટણીઓને પ્રભાવિત કરવાનો પ્રયાસ કરી રહ્યું છે. તેમણે કહ્યું કે તેહરાન ચૂંટણીમાં નબળા લોકોનો એક જૂથ ઇચ્છે છે જે ઈરાનને પરેશાન નહીં કરે અને તેને પરમાણુ શસ્ત્રો વિકસાવવા દેશે નહીં. ટ્રમ્પે કહ્યું, તેઓ ફક્ત પરમાણુ શસ્ત્રો ઇચ્છે છે. જો તેઓ પરમાણુ શસ્ત્રો મેળવે છે, તો આખી દુનિયા મોટી મુશ્કેલીમાં મુકાઈ જશે.

ટ્રમ્પની ટિપ્પણી એવા સમયે આવી છે જ્યારે અમેરિકા અને ઈરાને તાજેતરમાં એકબીજાના સ્થાનો પર હુમલો કર્યો છે. ઈરાનના રિવોલ્યુશનરી ગાર્ડે ગઈકાલે કહ્યું હતું કે તેણે બે યુએસ જહાજો, આઠ તેલ ટેન્કરો અને હોર્મુઝ સ્ટ્રેટમાંથી પસાર થવાનો પ્રયાસ કરી રહેલા દસ અન્ય જહાજો પર હુમલો કર્યો હતો. આ જળમાર્ગ ગલ્ફ દેશોમાંથી વિશ્વના તેલ અને ગેસ પુરવઠા માટે એક મહત્વપૂર્ણ માર્ગ છે.

ઈરાન સાથેની વાટાઘાટો અંગે, ટ્રમ્પે કહ્યું કે તે તેહરાનના પરમાણુ કાર્યક્રમ કરતાં ઘણું વધારે છે. તેમણે કહ્યું, હું પરમાણુ કરાર કરતાં ઘણું વધારે વિશે વાત કરી રહ્યો છું. પરમાણુ મુદ્દા કરતાં ઘણું બધું છે. પરમાણુ મુદ્દો ત્યાં રહેશે, તે 99.9 ટકા ચોક્કસ છે, પરંતુ ટેબલ પર ઘણું બધું હશે. ટ્રમ્પે, વાટાઘાટોની શક્યતાને સંપૂર્ણપણે નકારી ન હતી, પરંતુ કહ્યું કે અમેરિકા સક્રિય રીતે તેહરાન સાથે વાતચીત કરવા માંગતું નથી.

ટ્રમ્પને ઘટી રહેલી લોકપ્રિયતા અને ઈરાન સાથે યુદ્ધ સમાપ્ત કરવા માટે તેમના પોતાના રિપબ્લિકન પાર્ટીમાંથી દબાણનો સામનો કરવો પડી રહ્યો છે. મધ્ય પૂર્વમાં વધતી લડાઈને કારણે ગઈકાલે, જુલાઈ પછી પ્રથમ વખત તેલના ભાવ 100 ડોલર સુધી પહોંચી ગયા. ચૂંટણી પછી તુરંત જ, તેલના ભાવમાં અચાનક ઘટાડો થશે તેમ ટ્રમ્પે પત્રકારોને જણાવ્યું હતું. ​​​​​​​

ટ્રમ્પના દાવા વ્હાઈટ હાઉસથી વિપરીત 2029 સુધી યુદ્ધ ચાલુ રહેવાની આશંકા 

ટ્રમ્પના જાહેર દાવાઓ વ્હાઇટ હાઉસના આંતરિક અહેવાલોથી તદ્દન વિપરીત છે. ગઈકાલે  વોલ સ્ટ્રીટ જર્નલે અમેરિકન અધિકારીઓને ટાંકીને અહેવાલ આપ્યો હતો કે ઉપરાષ્ટ્રપતિ જે.ડી. વાન્સ, સેક્રેટરી ઓફ સ્ટેટ માર્કો રુબિયો અને અન્ય ટોચના અધિકારીઓએ ટ્રમ્પ સાથે લાંબા યુદ્ધની શક્યતા અંગે ચર્ચા કરી હતી. અહેવાલ મુજબ, અમેરિકાના દબાણ, નાકાબંધી અને અન્ય સૈન્ય કાર્યવાહી છતાં ઈરાન પીછેહઠ કરવાનો ઇનકાર કરી શકે છે. આવી સ્થિતિમાં, જાન્યુઆરી 2029માં ટ્રમ્પના કાર્યકાળના અંત સુધી સંઘર્ષ ચાલુ રહી શકે છે. વ્હાઇટ હાઉસની અંદરની આ ચર્ચાઓ ટ્રમ્પના જાહેર નિવેદનોથી તદ્દન વિપરીત છે.