BREAKING NEWS

6 વર્ષ જૂના BS-VI વાહનો માટે PUC હવે 3 વર્ષ ચાલશે; જૂના વાહનોએ દર 3 મહિને કરાવવું પડશે ટેસ્ટિંગ; PUC નિયમોમાં મોટો ફેરફાર

  • November 19, 2026 06:06 PM 
Aajkaal Daily (Desh Pardesh Ni Aajkaal)

દેશભરના વાહન માલિકો માટે એક મોટા અને મહત્વપૂર્ણ સમાચાર સામે આવ્યા છે. કેન્દ્ર સરકારે વાહનોના પ્રદૂષણ નિયંત્રણ પ્રમાણપત્ર એટલે કે PUC (Pollution Under Control) ની માન્યતા અવધિ અંગે નવા નિયમો જારી કર્યા છે. માર્ગ પરિવહન અને ધોરીમાર્ગ મંત્રાલયે 13 નવેમ્બરના રોજ સેન્ટ્રલ મોટર વાહન (સોળમો સુધારો) નિયમો, 2026ને સૂચિત કર્યા છે, જે ગેઝેટમાં પ્રકાશનની તારીખથી અમલમાં આવ્યા છે. આ નવા નિયમો મુજબ, હવે PUCની માન્યતા વાહનના ઉત્સર્જન ધોરણો (BS norms) અને તેની ઉંમરના આધારે નક્કી કરવામાં આવશે, જેમાં જૂના વાહનો માટે નિયમો કડક બનાવાયા છે અને નવા વાહનોને મોટી રાહત આપવામાં આવી છે.


નવા નિયમોમાં સૌથી મોટો અને કડક ફેરફાર જૂના વાહનોને લઈને કરવામાં આવ્યો છે. સૂચના અનુસાર, BS-I, BS-II અને BS-III ઉત્સર્જન ધોરણોનું પાલન કરતા તમામ મોટર વાહનો માટે PUC પ્રમાણપત્ર હવે માત્ર ત્રણ મહિના માટે જ માન્ય રહેશે. આનો સીધો અર્થ એ થાય કે આવા જૂના વાહન માલિકોએ વર્ષમાં ચાર વખત પ્રદૂષણ પરીક્ષણ કરાવવું પડશે. આ ઉપરાંત, 2017 થી 2020 દરમિયાન અમલમાં રહેલા BS-IV ધોરણોનું પાલન કરતા વાહનો માટે PUC પ્રમાણપત્ર છ મહિના માટે માન્ય રહેશે. ઉલ્લેખનીય છે કે ભારતે BS-V ધોરણ છોડીને 1 એપ્રિલ, 2020 થી સીધા BS-VI લાગુ કર્યા હતા. સરકારનો મત છે કે જૂના વાહનો વધુ પ્રદૂષણ ફેલાવે છે, તેથી તેમનું વધુ વારંવાર ચેકિંગ થવું જરૂરી છે.


બીજી તરફ, BS-VI ધોરણો ધરાવતા નવા વાહનોના માલિકોને સરકારે નોંધપાત્ર રાહત આપી છે. BS-VI ખાનગી એટલે કે નોન-ટ્રાન્સપોર્ટ વાહનો માટે PUCની માન્યતા હવે વાહનની ઉંમર મુજબ નક્કી થશે. 0 થી 6 વર્ષ જૂના BS-VI ખાનગી વાહનો માટે PUC હવે 3 વર્ષ માટે માન્ય રહેશે, જે અગાઉ દર વર્ષે કરાવવું પડતું હતું. જ્યારે 6 થી 10 વર્ષ જૂના વાહનો માટે દર વર્ષે અને 10 વર્ષથી વધુ જૂના વાહનો માટે દર 6 મહિને PUC રિન્યુ કરાવવું પડશે.


BS-VI કોમર્શિયલ અથવા ટ્રાન્સપોર્ટ વાહનો માટે અલગ નિયમો રાખવામાં આવ્યા છે. આવા વાહનોમાં 6 વર્ષ સુધીના વાહનો માટે PUC બે વર્ષ માટે, 6 થી 10 વર્ષ જૂના વાહનો માટે એક વર્ષ માટે અને 10 વર્ષથી વધુ જૂના વાહનો માટે છ મહિના માટે માન્ય રહેશે.


જે વાહન માલિકો પાસે હાલમાં માન્ય PUC છે, તેમના માટે પણ સરકારે સ્પષ્ટતા કરી છે કે નવા નિયમો અમલમાં આવ્યા તે પહેલાં જારી થયેલા પ્રમાણપત્રો તેમના પૂરા સમયગાળા માટે માન્ય રહેશે. નવા નિયમો ત્યારે જ લાગુ થશે જ્યારે પ્રમાણપત્ર પહેલી વાર રિન્યુ કરાવવામાં આવશે. જો કોઈ વ્યક્તિ માન્ય PUC વગર વાહન ચલાવતા પકડાય, તો મોટર વાહન કાયદા હેઠળ પહેલી વારરૂ.1,000 સુધી અને બીજી વારરૂ.2,000 સુધીનો દંડ થઈ શકે છે, તેમજ વાહન જપ્ત કરવાની કાર્યવાહી પણ થઈ શકે છે.


વાહન માલિકોએ પોતાના વાહનનું નોંધણી પ્રમાણપત્ર એટલે કે RC તપાસીને તે કયા BS ધોરણમાં આવે છે અને તેની ઉંમર કેટલી છે તે જાણી લેવું જોઈએ. PUC પૂરું થાય તે પહેલાં નજીકના માન્ય કેન્દ્ર પર પરીક્ષણ કરાવી લેવું હિતાવહ છે અને સુવિધા માટે DigiLocker અથવા mParivahan એપમાં તેની ડિજિટલ કોપી સાચવી રાખવી જોઈએ. એકંદરે, સરકારના આ નિર્ણયનો હેતુ સ્વચ્છ અને નવા વાહનો પરનો બોજ ઘટાડવાનો તથા વધુ પ્રદૂષણ ફેલાવતા જૂના વાહનો પર કડક નજર રાખવાનો છે.



લાઈક અને ફોલો કરો અમારું ફેસબુક પેજ FACEBOOK - AAJKAALDAILY


ફોલો કરો અમારું ઇન્સ્ટાગ્રામ INSTAGRAM - AAJKAALDAILY


સબસ્ક્રાઈબ કરો અમારી યૂ ટ્યૂબ ચેનલ YOUTUBE - AAJKAALDAILY


મહત્વના સમાચારો આપના મોબાઇલમા મેળવવા માટે જોડાઓ અમારા વોટ્સએપ ગ્રૂપમાં  99251 12230  

View News On Application