મૂળ કુછડી તથા હાલ ઇઝરાયલ રહેતી એક મહિલાએ સોશિયલ મીડિયામાં વીડિયો વાઇરલ કરીને તેના પુત્ર અને પતિનું અપહરણ કરીને હિરબા જાડેજા અને તેના માણસો દ્રારા સૂરજ પેલેસ બંગલે ગોંધી રાખ્યા હોવાનું જણાવી પૈસાની લેતીદેતી મામલે આ બનાવ બન્યાનું કહીને રડતા રડતા વડાપ્રધાન નરેન્દ્ર મોદીથી માંડીને જિલ્લા પોલીસવડાની મદદ માંગી હતી. આ બનાવમાં પોલીસે તાત્કાલિક ઊંડાણથી તપાસ હાથ ધરીને કાર્યવાહી કરતા અંતે હિરલબા જાડેજા અને તેમના સાગરિતો સામે પોલીસ ફરિયાદ દાખલ થઈ છે અને હિરલબા જાડેજાની ધરપકડ કરવામાં આવી છે. ત્યારે આ બનાવે પોરબંદર શહેરમાં ભારે ચર્ચા જગાવી છે.

મહિલાએ વીડિયો કર્યો હતો વાઇરલ

પોરબંદરના નજીકના કુછડી ગામે રહેતી અને હાઈ ઇઝરાયલ રહેતી લીલુ ઓડેદરાએ સોશિયલ મીડિયામાં એક વીડિયો વાઇરલ કરીને રડતા રડતા એવું જણાવ્યું હતું કે, વડાપ્રધાન નરેન્દ્ર મોદીથી માંડીને પોરબંદરના એસ.પી. તેમને મદદ કરે તેવી માંગણી છે. હિરલબા જાડેજા અને તેના માણસોએ લીલુબેનના પતિ અને 17 વર્ષના પુત્રને સુરજ પેલેસ બંગલા ખાતે ગોંધી રાખ્યા છે અને લીલુબેને લીધેલા રૂપિયા પાછા આપવા તેમની દબાણ કરી રહ્યા છે. બંગલે ગોંધી રાખવામાં આવેલા દીકરાનો અભ્યાસ પણ બગડી રહ્યો છે. મદદ માંગવા છતાં કોઈ તેઓને મદદ કરવા આગળ આવતું નથી. 

હિરલબાએ ફગાવ્યા હતા આક્ષેપ

આ પ્રકારના ગંભીર આક્ષેપો થયા ત્યારે હિરલબા જાડેજાએ એવું જણાવ્યું હતું કે તેમણે કોઈને ગોંધી રાખ્યા નથી. પરંતુ ઉલ્ટાના લીલુબેનના પતિ અને પુત્રને બીજા લોકો પૈસા માટે હેરાન કરતા હોવાથી એ બંને ખુદ જાતે જ હિરલબાની મદદ માંગવા માટે આવ્યા હતા અને હિરલબાએ તેઓને મદદ કરી હતી. રૂપિયાની લેતીદેતીના પ્રશ્ને ગોંધી રાખ્યા હોવાના આક્ષેપ ફગાવી દીધા હતા.​​​​​​​

પોલીસે હાથ ધરી તપાસ

આ પ્રકારના વાઇરલ થયેલા વીડિયો બાદ પોલીસ દ્વારા ઊંડાણથી તપાસ હાથ ધરવામાં આવી હતી. જિલ્લા પોલીસવડા ભગીરથસિંહ જાડેજાએ જાતે રસ લઇને કોઇની સેહશરમ રાખ્યા વગર તટસ્થ તપાસ કરવાની કાર્યવાહી આગળ ધપાવી હતી.

અચાનક પોલીસમથકે થયા હાજર

લીલુબેન ઓડેદરાએ તેમના પુત્ર અને પતિનું અપહરણ થયાની અને બંગલે ગોંધી રાખ્યાની વાત જાહેર કરી હતી. તેની પૂરતા પ્રમાણમાં પોલીસ દ્વારા તપાસ થાય તે પહેલા અચાનક તેમના પતિ  ભનુભાઇ અને પુત્ર રણજીત અચાનક જ પોલીસમથકે હાજર થયા હતા અને પોલીસ દ્રારા તેઓની ઉંડાણથી પૂછપરછ કરવામાં આવતા તેઓએ એવુ જણાવ્યું હતું કે, તેમનું કોઈ અપહરણ કરવામાં આવ્યું નથી અને તેઓ હિરલબાના બંગલે મદદ માંગવા માટે ગયા હતા. લીલુબેને જેમની પાસેથી પૈસા લીધા છે તેવા અનેક લોકો હેરાન કરતા હોવાથી હિરલબા જાડેજાની મદદ  માટે તેમને ત્યાં ગયા હોવાનું જણાવીને હિરલબાએ અપહરણ કરીને ગોંધી નહી રાખ્યાનું પોલીસ સમક્ષ વીડિયોમાં કબૂલ્યું હતું.

અચાનક પોલીસે નોંધ્યો ગુનો

આ બનાવમાં હજુ તો પૂરતા પ્રમાણમાં વિગતો જાહેર થાય તે પહેલા અનેકવિધ ચર્ચાઓ જાગી હતી અને અલગ–અલગ પ્રકારની અફવાઓ પણ વહેતી થઇ હતી. તે દરમ્યાન અચાનક જ હાર્બર મરીન પોલીસમથકમાં હિરલબા જાડેજા સહિત   તેમના સાગરિતો વિરૂધ્ધ ગુન્હો નોંધવામાં આવતા ભારે ચકચાર જાગી છે.

એફ.આઇ.આર.ની વિગત

કુછડી ગામે ગૌશાળા પાસે રહેતા ભનુભાઇ અરજણભાઇ ઓડેદરા નામના ૬૪ વર્ષના વૃધ્ધ દ્રારા એવી પોલીસફરિયાદ નોંધાવવામાં આવી છે કે તેમની દીકરી લીલુએ લીધેલા ૭૦ લાખ રૂપિયા કઢાવવા માટે કાવતરુ રચીને ગત તા. ૧૧–૪–૨૦૨૫ના રાત્રે ફરિયાદી ભનાભાઇના ઘરે અજાણ્યા ચારથી પાંચ આરોપીઓએ ઘરમાં અપપ્રવેશ કરી ફરિયાદી ભનાભાઇ, તેના જમાઇ ભનુભાઇ અને ફરિયાદીની સાળી ગીગીબેનનું અપહરણ કરી કાળા રંગની રજીસ્ટર નંબર ૧૦૦૦ વાળી ફોરવ્હીલમાં પોરબંદરના સુરજ પેલેસ બંગલે કે યાં હિરલબા ભુરાભાઇ જાડેજા વસવાટ કરે છે ત્યાં લઇ ગયા હતા અને હિરલબા જાડેજાની સામે જ અન્ય બે શખ્શો કે યુબેલી ખાપટ રોડ પર રહે છે તેવા હિતેશ ભીમા ઓડેદરા અને વિજય ભીમા ઓડેદરાએ ભનાભાઇની દીકરી સાથે ભનાભાઇ અને તેના જમાઇ ભનુભાઇની વીડિયોકોલમાં વાત કરાવી હતી અને રૂપિયા કઢાવવા માટે દબાણ કર્યુ હતુ એટલું જ નહીં પરંતુ હિરલબાના બંગલે રહેલા અજાણ્યા ચારથી પાંચ ઇસમોએ ફરિયાદી ભનાભાઇ ઓડેદરા અને તેના જમાઇ ભનુભાઇનું અપહરણ થયુ છે તેવુ જાણવા છતાં એ અજાણ્યા ઇસમોએ એકબીજાને મદદગારી કરી હતી. તથા ફરિયાદી ભનાભાઇ અને તેના જમાઇ ભનુભાઇને ગેરકાયદેસર રીતે છુપાવી અટકાયતમાં રાખ્યા  હતા. એટલું જ નહી પરંતુ ચાર–પાંચ દિવસ પછી હિતેશ ભીમા ઓડેદરાએ  ફરિયાદી ભનાભાઇની દીકરી લીલુના દીકરા રણજીતનું રાણાવાવ ખાતેથી અપહરણ કરીને તેને પણ સુરજપેલેસ બંગલે લાવવામાં આવ્યો હતો અને તેના પિતા અને નાના સાથે રાખીને ફોન પર  તેની માતા લીલુ સાથે વાત કરાવી પૈસા આપી દેવા માટે દબાણ  કર્યુ હતુ. હિતેશ ભીમા ઓડેદરાઅને હિરલબાના માણસોએ ફરિયાદી ભનાભાઇ અરજણ ઓડેદરા અને તેના જમાઇ ભનુભાઇને ઢીકાપાટુનો માર મારી રણજીતને ધમકીઓ આપી હતી તથા હિતેશ ભીમા ઓડેદરાએ ફરિયાદી અને તેના જમાઇને આડકતરી રીતે મારી નાખવાની  ધમકી આપી હતી ત્યારબાદ હિતેશ ભીમા ઓડેદરાની ભનુની કુછડી ખાતે રહેલ કાર હિરલબાના બંગલે મંગાવી લીધી હતી તેમજ જમીન, મકાન, પ્લોટ, દાગીના વગેરે આપી દેવા માટે દબાણ કર્યુ હતુ તથા હિતેશે બળજબરીથી ભનાભાઇ પાસે અલગ–અલગ અગિયાર જેટલા કોરા ચેકમાં સહી કરાવી લીધી હતી. તો વિજય ભીમા ઓડેદરાએ ફરિયાદી ભનાભાઇની મૃત્યુ પામેલી દીકરીની નિશાની માટે રાખેલ હાથમાં પહેરવાનો સોનાનો દોઢ તોલાનો બેરખો અને આશરે અડધાથી પોણા તોલા સોનાનો ચેઇન મળી દોઢેક લાખના દાગીના લઇ લીધા હતા. તથા ફરિયાદી ભનાભાઇ અરજણ  ઓડદરા અને તેના જમાઇ ભનુભાઇને સતર દિવસ સુધી તથા દોહિત્ર રણજીતને બાર દિવસ સુધી સુરજ પેલેસ બંગલે ગોંધી રાખી બળજબરીથી ૭૦ લાખ રૂા. કઢાવી લેવા તા. ૨૭–૪ સુધી ગેરકાયદેસર અટકાયત કર્યાનો ગુન્હો દાખલ કરવામાં આવ્યો છે જેમાં બી.એન.એસ.ની કલમ ૩૦૮(૫), ૧૪૦(૩), ૧૪૨, ૧૧૫(૨), ૩૫૧(૩), ૧૨૦(૧), ૧૨૭(૪), ૩૨૯(૩), ૬૧(૨) (બી) મુજબ ગુન્હો નોંધીને તપાસ હાથ ધરી છે.

હિરલબાની થઇ ધરપકડ

પોરબંદરના ગ્રામ્ય ડી.વાય.એસ.પી. સુરજીત મહેડુએ રાત્રે એવુ જાહેર કર્યુ હતુ કે વાઇરલ થયેલા વીડીયો અન્વયે હિરલબા જાડેજા અને અન્ય ઇસમો વિરૂધ્ધ ગુન્હો દાખલ કરવામાં આવ્યો છે અને હિરલબા જાડેજાની ધરપકડ થઇ છે અને તેમની પૂછપરછ ચાલી રહી છે.

બંગલામાં સર્ચ ઓપરેશન

પોરબંદરમાં ભારે ચકચાર મચાવનારા આ કિસ્સામાં જિલ્લા પોલીસવડા ભગીરથસિંહ જાડેજાના માર્ગદર્શન નીચે મોડી રાત્રિના સૂરજ પેલેસ બંગલા ખાતે સર્ચ ઓપરેશન હાથ ધરવામાં આવ્યુ હતુ અને વ્યાજના વિષચક્ર અંગે ઉંડાણથી તપાસ હાથ ધરવામાં આવી છે. આમ, પોરબંદરમાં અપહરણના અને બળજબરીથી પૈસા પડાવવાના આ બનાવે ભારે ચકચાર જગાવી છે.

જિલ્લા પોલીસવડા બપોરે યોજશે પ્રેસ કોન્ફરન્સ

પોરબંદરમાં ભારે સનસનાટી મચાવનારા આ બનાવ અંગે વિધિવત  રીતે પોલીસ ફરિયાદ નોંધાઇ ચૂકી છે પરંતુ સમગ્ર કિસ્સો સંવેદનશીલ હોવાથી ઓનલાઇન એફ.આઇ.આર. મુકવામાં આવી નથી તેથી સમગ્ર ગુન્હા બાબતે ઉંડાણથી માહિતી આપવા પોરબંદરના જિલ્લા પોલીસવડા ભગીરથસિંહ જાડેજા બપોરે કમલાબાગ પોલીસ સ્ટેશન ખાતે પ્રેસ કોન્ફરન્સ યોજીને માહિતી આપશે તેમ જાણવા મળ્યુ છે. 

વાયરલ થયેલા ઓડિયોમાં બિઝનેસમાં પાર્ટનરશીપ આપવાની હિરલબાએ કરી હતી વાત

એકબાજુ  પોરબંદરના કુછડી ગામની મહિલાએ રડતા–રડતા  વાયરલ કરેલા વીડિયોમાં હિરલબા જાડેજા દ્રારા અપાતી ધાકધમકી  અને તેના પતિ  સહિત પુત્ર અને પિતાનું અપહરણ કર્યાનું જાહેર કરવામાં આવ્યુ હતુ તો બીજી બાજુ રૂપિયાની લેતીદેતી પ્રશ્ને વાતચીતનો ઓડિયો વાયરલ થયો છે જેમાં હિરલબા જાડેજા લીલુને  ફોન ઉપર કોઇ ધમકી આપતા નથી પરંતુ ૭૦ લાખ રૂપિયાનો વહીવટ પૂર્ણ થાય ત્યારબાદ બિઝનેશમાં પાર્ટનરશીપ આપવા  માટે પણ વાતચીત કરી હતી. તેથી પોલીસે આ દિશામાં પણ તપાસ હાથ ધરી છે.