કેનેડાના ભૂતપૂર્વ વડાપ્રધાન જસ્ટિન ટ્રુડો અને અમેરિકન સીંગર કેટી પેરી વચ્ચેના પ્રેમ સંબંધની અફવાઓ વચ્ચે નવો વળાંક જોવા મળ્યો છે. જાપાનના ભૂતપૂર્વ વડાપ્રધાન ફુમિયો કિશિદાના એક ફોટાએ તેમના સંબંધોની પુષ્ટિ કરી છે.

કિશિદાએ ગુરુવારે એક ફોટો પોસ્ટ કર્યો હતો જેમાં ટ્રુડો અને પેરી તેમની પત્ની સાથે પોઝ આપતા દેખાય છે. ટ્રુડો ક્રિસમસ ટ્રી પાસે પેરી સાથે ઉભા છે. 

પોસ્ટમાં, કિશિદાએ પેરીને ટ્રુડોના જીવનસાથી તરીકે વર્ણવ્યા હતા. આ શબ્દના ઉપયોગથી ટ્રુડો-પેરી સંબંધની અફવાઓની પુષ્ટિ થઈ. ત્યારથી તે કેનેડિયન સોશિયલ મીડિયા પર ચર્ચાનો વિષય બની ગયો છે. કિશિદાએ કેપ્શનમાં લખ્યું છે, ભૂતપૂર્વ વડાપ્રધાન જસ્ટિન ટ્રુડો તેમના જીવનસાથી સાથે જાપાન આવ્યા હતા અને અમે સાથે લંચ કર્યું હતું. તેમણે કહ્યું કે, હું વડાપ્રધાન તરીકેના કાર્યકાળ દરમિયાન ટ્રુડોને ઘણી વખત મળ્યો હતો અને તેઓએ જાપાન-કેનેડા એક્શન પ્લાન પર સાથે કામ કર્યું હતું.

જસ્ટિન ટ્રુડોએ ફોટો ફરીથી શેર કરતા લખ્યું, "કેટી અને હું તમારી તથા યુકો સાથે સમય વિતાવીને ખૂબ ખુશ થયા. ઘણા લોકો આ નિવેદનને તેમના સંબંધની બિનસત્તાવાર પુષ્ટિ તરીકે અર્થઘટન કરી રહ્યા છે. ટ્રુડોએ કિશિદાની મિત્રતા અને સારા ભવિષ્ય પ્રત્યેની પ્રતિબદ્ધતાની પણ પ્રશંસા કરી. ટ્રુડો અને પેરી પહેલીવાર જુલાઈના અંતમાં મોન્ટ્રીયલ રેસ્ટોરન્ટમાં સાથે જોવા મળ્યા હતા. લે વિયુક્સ લાયનએ પુષ્ટિ આપી હતી કે તેઓએ સાથે રાત્રિભોજન કર્યું હતું અને "ખૂબ જ નમ્ર" હતા. ત્યારબાદ ટીએમઝેડે તેમના ફોટા પોસ્ટ કર્યા હતા, જે ઝડપથી વાયરલ થયા. બંનેને ઘણી વખત સાથે જોવામાં આવ્યા છે, પરંતુ ટ્રુડો કે પેરીએ સત્તાવાર રીતે તેમના સંબંધને સ્વીકાર્યા નથી.

જસ્ટિન ટ્રુડોની પૂર્વ પત્ની સોફી ગ્રેગોઇર ટ્રુડોએ નવેમ્બરમાં એક પોડકાસ્ટમાં આ મુદ્દાને સંબોધિત કર્યો હતો. તેણીએ કહ્યું, આપણું જીવન અલગ છે, પરંતુ અમારો પરિવાર એક છે. અમે માનવ છીએ, વસ્તુઓ અમને અસર કરે છે, પરંતુ અમે કેવી રીતે પ્રતિક્રિયા આપીએ છીએ તે અમારા પર નિર્ભર છે. સોફી અને ટ્રુડો 18 વર્ષના લગ્નજીવન પછી ઓગસ્ટ 2023માં અલગ થયા. તેઓ હાલમાં તેમના ત્રણ બાળકોનો ઉછેર કરી રહ્યા છે. જેમાં ઝેવિયર, એલા-ગ્રેસ અને હેડ્રિયનનો સમાવેશ થાય છે. સોફીએ કહ્યું, હું સિંગલ મધર નથી.

મળતી માહિતી અનુસાર, કેટી પેરી લગભગ દસ વર્ષ સાથે રહ્યા પછી ગયા વર્ષે જૂનમાં તેના મંગેતર ઓર્લાન્ડો બ્લૂમથી અલગ થઈ હતી. જસ્ટિન ટ્રુડોએ લગભગ 12 વર્ષના નેતૃત્વ પછી જાન્યુઆરી 2024માં વડાપ્રધાન અને લિબરલ પાર્ટીના નેતા તરીકે રાજીનામું આપ્યું હતું અને ફુમિયો કિશિદાએ ઓક્ટોબર 2021થી ઓક્ટોબર 2022 સુધી જાપાનના વડાપ્રધાન તરીકે સેવા આપી હતી.