રિલાયન્સ ઇન્ડસ્ટ્રીઝના ચેરમેન મુકેશ અંબાણી હવે વિશ્વના 100 અબજ ડોલરની સંપત્તિ ધરાવતા અબજોપતિઓની વિશિષ્ટ ક્લબમાંથી બહાર થઈ ગયા છે. બ્લૂમબર્ગ બિલિયનેર્સ ઇન્ડેક્સ અનુસાર તાજેતરમાં તેમની નેટવર્થમાં અંદાજે 8.12 અબજ ડોલરની ઘટાડો નોંધાયો છે, જેના કારણે તેમની કુલ સંપત્તિ 100 અબજ ડોલરથી નીચે આવી ગઈ છે.

આ ઘટાડાનું મુખ્ય કારણ રિલાયન્સ ઇન્ડસ્ટ્રીઝના શેરના ભાવમાં આવેલી અસ્થિરતા ગણાય છે. છેલ્લા કેટલાક સમયથી શેરબજારમાં કંપનીના શેર પર દબાણ જોવા મળી રહ્યું છે, જેના સીધા અસરરૂપે મુકેશ અંબાણીની કુલ સંપત્તિમાં ઘટાડો થયો છે. વૈશ્વિક બજારમાં અનિશ્ચિતતા, ઊર્જા ક્ષેત્રની ચાલ અને રોકાણકારોની સાવચેતી પણ આ ગિરાવટ માટે જવાબદાર માનવામાં આવે છે.

વિશ્લેષકોનું માનવું છે કે આ ઘટાડો તાત્કાલિક સ્વરૂપનો છે. રિલાયન્સ ગ્રુપના ડિજિટલ, રિટેલ અને નવી ઊર્જા ક્ષેત્રના પ્રોજેક્ટ્સ લાંબા ગાળે મજબૂત સંભાવનાઓ ધરાવે છે. ખાસ કરીને રિલાયન્સ જિયો અને રિટેલ બિઝનેસને લઈને બજારમાં હજુ પણ હકારાત્મક અપેક્ષાઓ વ્યક્ત કરવામાં આવી રહી છે.

હાલ અંબાણીની સંપત્તિમાં ઘટાડો નોંધાયો હોવા છતાં તેઓ હજુ પણ ભારત અને વિશ્વના સૌથી પ્રભાવશાળી ઉદ્યોગપતિઓમાં સ્થાન ધરાવે છે. બજાર નિષ્ણાતો માને છે કે આવનારા ત્રિમાસિક નાણાકીય પરિણામો અને વ્યૂહાત્મક રોકાણોના આધારે મુકેશ અંબાણી ફરીથી 100 અબજ ડોલરની ક્લબમાં પ્રવેશ કરી શકે તેવી શક્યતા યથાવત છે.