જિયો પ્લેટફોર્મ્સની શેરબજારમાં આઈપીઓ લિસ્ટિંગ સેરેમની અંબાણી પરિવાર માટે માત્ર એક મોટી બિઝનેસ સિદ્ધિ જ નહીં, પરંતુ ભાવનાઓનો એક અનોખો સંગમ બની રહી હતી. આ ઐતિહાસિક અવસર પર અનંત અંબાણીએ આપેલા હૃદયસ્પર્શી સંબોધણે સૌનું ધ્યાન ખેંચ્યું હતું, જેમાં તેમણે વ્યવસાયને પૂજા અને આરાધના સાથે સરખાવ્યો હતો. અનંતે જિયોની આ સફળતાનો પૂરો શ્રેય દેશવાસીઓના અખૂટ વિશ્વાસને આપતાં કહ્યું કે, એક્સચેન્જની ઘંટડી તેમના માટે મંદિરની ઘંટડી સમાન છે અને જિયોને દેશની જનતા સાથે વહેંચવું એ 'પ્રસાદ' વહેંચવા જેવું પવિત્ર કામ છે. પિતા મુકેશ અંબાણીના ભારતને આગળ વધારવાના સપનાનો ઉલ્લેખ કરતી વખતે અનંતના આ શબ્દો સાંભળીને મુકેશ અંબાણી પોતે પણ ભાવુક થઈ ગયા હતા, જે આ સમગ્ર સેરેમનીની સૌથી ચર્ચિત ક્ષણ બની ગઈ હતી.

પોતાના સંબોધનની શરૂઆત કરતાં અનંત અંબાણીએ ભૂતકાળની યાદો તાજી કરી હતી. તેમણે પોતાના શબ્દોમાં જણાવ્યું હતું કે કેવી રીતે જામનગરની ઉજ્જડ જમીન પર દુનિયાની સૌથી મોટી રિફાઇનરી ઊભી કરીને તેમના પિતાએ સાબિત કરી દીધું કે જ્યારે ભારત બનાવે છે ત્યારે આખી દુનિયા તેને જોવે છે. સમયની સાથે દેશમાં એક નવા, યુવા ભારતનું સપનું જાગ્યું, જેમાં દરેક હાથમાં ઇન્ટરનેટ અને દરેક ગામ સુધી ડિજિટલ ક્રાંતિ પહોંચાડવાનું લક્ષ્ય હતું. દુનિયાના આ સપનાનું નામ જિયો રાખવામાં આવ્યું હતું. આ સપનાના નાના બીજને રોપવાનું કામ ઈશા દીદીએ કર્યું હતું અને આકાશ ભાઈએ આ બીજને પોતાનું મોટું સપનું બનાવ્યું હતું. આ સફરમાં આખા દેશે જિયોને દિલથી દુઆઓ આપી હતી, જેમાં માતાએ આશીર્વાદ આપતા કહ્યું હતું કે 'જીઓ મેરે લાલ', દાદીએ કહ્યું 'જુગ જુગ જીઓ' અને મિત્રોએ પણ હસતા-હસતા કહ્યું કે 'જીઓ યાર'.

અનંત અંબાણીએ પોતાના ભાષણમાં ભારપૂર્વક જણાવ્યું હતું કે આજે તેમના માટે સૌથી મહત્વનો શબ્દ ‘કૃતજ્ઞતા’ છે. તેમણે સ્પષ્ટ કર્યું કે આજે એક્સચેન્જમાં વાગનારી ઘંટડી તેમના માટે કોઈ સામાન્ય બિઝનેસ બેલ નથી, પરંતુ મંદિરની ઘંટડી જેવી પવિત્ર છે. તેમના માટે વ્યવસાય એ માત્ર નફો કમાવવાનું સાધન નથી, પણ એક પૂજા સમાન છે અને હિન્દુ પરંપરા મુજબ દરેક પૂજાનો અંત પ્રસાદથી થાય છે. જિયોના શેરને સમગ્ર દેશના સામાન્ય નાગરિકો સાથે વહેંચવું એ તેમના માટે આ પ્રસાદ વહેંચવા જેવું જ પવિત્ર કાર્ય છે. તેમણે તે લાખો-કરોડો ગ્રાહકો અને રોકાણકારોનો હૃદયપૂર્વક આભાર માન્યો જેમણે જિયો પર અતૂટ વિશ્વાસ મૂક્યો અને તેને દેશના ખૂણે-ખૂણે પહોંચાડવાની તક આપી.

કાર્યક્રમનો સૌથી ભાવુક અને યાદગાર ક્ષણ તે રહી જ્યારે અનંતે પોતાના પિતા મુકેશ અંબાણીના વિઝન અને સપનાઓનો ઉલ્લેખ કર્યો. તેમણે કહ્યું કે મુકેશ અંબાણીએ હંમેશા એવા સશક્ત ભારતનું સપનું જોયું હતું જેને આગળ વધતાં કોઈ તાકાત રોકી ન શકે. પિતાના આ સપનાને યાદ કરીને અનંતે ભાવુક સ્વરમાં કહ્યું કે, "જિયો તમે બનાવ્યું છે, તો તમારા સપનાઓને સાકાર કરવાનું અમારું સૌથી મોટું સપનું છે." આ વાત જિયોના કરોડો યુઝર્સ અને તેના વિકાસમાં અથાક મહેનત કરનારા લોકોની ભૂમિકાને દર્શાવતી હતી. આ વાતો સાંભળીને સ્ટેજ પર બેઠેલા મુકેશ અંબાણી પોતાની લાગણીઓ રોકી શક્યા નહીં અને તેમની આંખો ભીની થઈ ગઈ હતી. આ દશ્ય પિતા અને પુત્રના ગાઢ સંબંધની સાથે તે લાંબી અને સંઘર્ષભરી સફરની યાદ અપાવતું હતું, જેમાં જિયોએ દેશના ડિજિટલ બજારમાં ક્રાંતિ લાવી છે.

આ ઐતિહાસિક અવસરે પરિવારની એકતા પણ સ્પષ્ટ જોવા મળી હતી. અનંત અંબાણીએ પોતાના ભાઈ આકાશ અંબાણી અને બહેન ઈશા અંબાણી સાથેના અતૂટ બંધનનો ઉલ્લેખ કરતા જણાવ્યું કે ભલે તેમના શરીર અલગ-અલગ હોય, પરંતુ તેઓ બધા એક જ આત્માની જેમ પોતાના પરિવાર અને દેશના સપનાઓને સાકાર કરવા માટે પ્રતિબદ્ધ છે. તેમનો આ સ્પષ્ટ સંદેશ હતો કે જિયોની આગામી ભવિષ્યની સફર પરિવારના આ સહિયારા સંકલ્પ અને દેશના સામાન્ય નાગરિકોના વિશ્વાસના પાયા પર જ વધુ મજબૂતાઈથી આગળ વધશે. લિસ્ટિંગ સમારોહની આ ભાવનાત્મક ક્ષણે માત્ર વ્યાપારી સફળતા જ નહીં, પરંતુ ભારતીય સંસ્કારો, પરિવારની એકતા અને ભવિષ્યની મોટી જવાબદારીઓને પણ ખૂબ જ સુંદર રીતે ઉજાગર કરી હતી.

આ સમગ્ર મહોત્સવ વચ્ચે આર્થિક મોરચે પણ જિયો પ્લેટફોર્મ્સે એક નવો ઇતિહાસ રચ્યો છે. શેરબજારમાં લિસ્ટ થતાંની સાથે જ જિયો પ્લેટફોર્મ્સનો શેર ₹1,358 ની શાનદાર કિંમતે ખૂલ્યો હતો, જે તેના ₹1,119 ના મૂળ ઇશ્યૂ પ્રાઇસ કરતાં આશરે 21% જેટલો વધારે છે. આ પ્રભાવશાળી દેખાવને કારણે રિલાયન્સ ઇન્ડસ્ટ્રીઝ બાદ જિયો પ્લેટફોર્મ્સ માર્કેટ કેપિટલાઇઝેશનના મામલે દેશની બીજી સૌથી મોટી કંપની બની ગઈ છે. હાલમાં જિયોનું માર્કેટ કેપ વધીને 12.50 લાખ કરોડ રૂપિયા થઈ ગયું છે. ઉલ્લેખનીય છે કે, રિલાયન્સનું કુલ માર્કેટ કેપ 15.99 લાખ કરોડ રૂપિયા છે, જ્યારે તેની મુખ્ય પ્રતિસ્પર્ધી એરટેલનું માર્કેટ કેપ 12.10 લાખ કરોડ રૂપિયા પર છે. આ શાનદાર લિસ્ટિંગે સાબિત કરી દીધું છે કે ભારતીય શેરબજારમાં પણ જિયોનું ભવિષ્ય અત્યંત ઉજ્જવળ અને મજબૂત છે.