વડાપ્રધાન નરેન્દ્ર મોદીએ બુધવારે પોતાના જાહેર જીવનના 25 વર્ષ પૂર્ણ થવાના અવસરે આયોજિત કાર્યક્રમમાં પોતાના રાજકીય સફર અને દેશ માટેના સંકલ્પ વિશે વાત કરી હતી. લગભગ એક કલાકના સંબોધનમાં તેમણે ‘વી વિલ ડુ ઈટ... હમ કરીને દિખાએંગે’ના નારાનો 19 વખત ઉલ્લેખ કર્યો હતો.

પીએમ મોદીએ કહ્યું હતું કે ભારત જ્યાં સુધી વિકસિત રાષ્ટ્ર નહીં બને ત્યાં સુધી તેઓ ન તો થાકશે અને ન તો અટકશે. તેમણે પોતાના સંબોધનમાં કહ્યું, હું મહત્વાકાંક્ષા માટે નહીં, પરંતુ મિશન માટે જીવું છું. તેમણે પોતાના જાહેર જીવન દરમિયાન આવેલા પડકારો અને વિરોધનો પણ ઉલ્લેખ કર્યો હતો.

પીએમ મોદીએ કહ્યું કે તેમણે ક્યારેય જીવનમાં શું બનવા માંગે છે અથવા ભવિષ્ય તેમના માટે શું રાખે છે તે વિશે વિચારવાનું બંધ કર્યું નથી. તેમણે કહ્યું કે તેમના બાળપણના ઉછેર અને મૂલ્યોએ તેમને શીખવ્યું કે જીવન ફક્ત વ્યક્તિગત મહત્વાકાંક્ષા માટે નહીં, પણ હેતુ માટે જીવવું જોઈએ. તેમણે કહ્યું કે તેઓ જીવનમાં તેમને જે પણ જવાબદારી સોંપવામાં આવી હતી તે પૂર્ણ કરવાનું ચાલુ રાખ્યું. જીવનમાં તેમનો એકમાત્ર હેતુ દેશ માટે નિઃસ્વાર્થપણે કામ કરવાનો હતો. પ્રધાનમંત્રીએ કહ્યું, મારા માટે, કામ જ બધું છે; કામ જ મારો ધર્મ છે. તેમણે યુવાનોને આ જ ભાવના સાથે દેશ માટે કામ કરવા અને તેમને મળેલી તકોનો તેમની સંપૂર્ણ ક્ષમતા સાથે ઉપયોગ કરવા વિનંતી કરી હતી.

જાહેર જીવનમાં ૨૫ વર્ષ પૂર્ણ કરવાની તેમની સફરને યાદ કરતાં પ્રધાનમંત્રીએ કહ્યું કે ૨૫ વર્ષ પહેલા, જ્યારે તેઓ ૫૦ વર્ષના હતા, ત્યારે તેમણે જંગલોમાં આદિવાસી સમુદાયોની સેવા કરવામાં અને પર્વતો વચ્ચે રહેતા નોંધપાત્ર સમય વિતાવ્યો હતો. તે સમયે, તેમનો રાજકીય રેકોર્ડ મુખ્યત્વે સંગઠનાત્મક કાર્યકર તરીકેના તેમના કાર્યનો હતો. તેમણે કહ્યું કે જ્યારે તેઓ ચૂંટણીમાં સક્રિય હતા, ત્યારે તેમણે ક્યારેય પોતે ચૂંટણી લડી ન હતી. જો તેમનું લક્ષ્ય ચૂંટણી રાજકારણમાં આગળ વધવાનું હોત, તો તેઓ ઘણા સમય પહેલા મેદાનમાં ઉતરી શક્યા હોત, પરંતુ તે તેમનો સ્વભાવ નહોતો.

આ રાષ્ટ્રમાં જન્મ લેવાનો અહેસાસ જ મારા માટે અમૃત સમાન:મોદી

ભારત પ્રત્યેની પોતાની લાગણી વ્યક્ત કરતાં મોદીએ કહ્યું કે આ રાષ્ટ્રમાં જન્મ લેવાનો અહેસાસ જ પોતાના માટે અમૃત સમાન છે. તેમણે કહ્યું કે ભારતની સામે સત્તાનું સુખ કંઈ નથી. પદ અને પ્રતિષ્ઠા દુનિયાના અનેક સ્થળોએ મળી શકે છે, પરંતુ ભારત જેવી પવિત્ર ભૂમિ બીજી ક્યાંય મળી શકે નહીં. મોદીએ પોતાના 25 વર્ષના જાહેર જીવનનું મૂલ્યાંકન કરવાની વાત કરતાં કહ્યું કે આ સમયગાળાનું આકલન તેઓ ક્યાં પહોંચ્યા તેના આધારે નહીં, પરંતુ તેમનું દેશ ક્યાં પહોંચ્યું તેના આધારે થવું જોઈએ. તેમણે આગામી સમય માટે પણ દેશના વિકાસને કેન્દ્રમાં રાખીને કામ કરવાનો સંકલ્પ વ્યક્ત કર્યો હતો.

વિરોધ કરનારાઓએ લોકશાહીની શક્તિ સમજાવી:મોદી

તેમણે કહ્યું કે જેમણે તેમને નીચે પાડવાનો પ્રયાસ કર્યો, તેમણે જ તેમને ફરી ઊભા થવાનું શીખવ્યું. જ્યારે વિરોધ કરનારાઓએ તેમને લોકશાહીની શક્તિ સમજાવી. મોદીએ કહ્યું કે 25 વર્ષ પાછળ ફરીને જોતા તેમને સિદ્ધિઓ કરતાં વધુ કૃતજ્ઞતાનો અનુભવ થાય છે.વડાપ્રધાને કહ્યું કે જાહેર જીવનની દરેક ઘટનાએ તેમને કંઈક શીખવ્યું છે અને સાથે જ નમ્ર રહેવાનું પણ શીખવ્યું છે. તેમણે કહ્યું કે તેઓ ઈશ્વર પાસે માત્ર એટલી જ પ્રાર્થના કરે છે કે જીવનમાં સતત શીખવાની ઈચ્છા ક્યારેય ઓછી ન થાય.

ગુજરાતનો વિકાસ, રાષ્ટ્રનો વિકાસ મંત્ર સાથે સેવાની શરૂઆત કરી: મોદી

પોતાના રાજકીય કારકિર્દીના શરૂઆતના દિવસોને યાદ કરતાં, વડા પ્રધાન મોદીએ કહ્યું કે જ્યારે તેઓ ગુજરાતમાં હતા, ત્યારે તેમણે એક જ મંત્ર સાથે કામ કર્યું: ગુજરાતનો વિકાસ, રાષ્ટ્રનો વિકાસ. તેમણે કહ્યું કે તે સમયગાળો પડકારોથી ભરેલો હતો. તેમને ન તો સરકાર ચલાવવાનો અનુભવ હતો, ન તો વહીવટી તંત્રનો અનુભવ, ન તો વધારે જ્ઞાન હતું. પીએમ મોદીએ કહ્યું કે તે સમયે જો તેમની પાસે કંઈ હતું, તો તે લોકોમાં વિશ્વાસ અને તેમની શક્તિમાં વિશ્વાસ હતો. તેમણે આ વિશ્વાસને પોતાની શક્તિમાં ફેરવી દીધો. તેમણે કહ્યું વિશ્વ આજે ગુજરાત જે સ્થિતિમાં પહોંચ્યું છે તેનું ઉદાહરણ આપે છે.