ગાંધીનગરના સેક્ટર-૨૬ ખાતે સ્થાયી થયેલા અને મૂળ વાવોલ ગામના વતની એવા પાટનગર યોજના વિભાગના નિવૃત્ત કર્મચારી રમેશભાઈ મોતીભાઈ પટેલની ચરેડી સ્થિત એક અવાવરું સરકારી જગ્યામાં અજાણ્યા શખ્સ દ્વારા દાતરડા જેવા ધારદાર હથિયારના ઘા ઝીંકીને કરપીણ હત્યા કરી દેવામાં આવી છે. મૃતક નિત્યક્રમ મુજબ આ નિર્જન જગ્યાએ એકઠા થતા સેંકડો મોરને મકાઈના દાણા ખવડાવવા માટે જતા હતા, તે જ સમયે આ ખૂની ખેલ ખેલાયો હતો. આ અરેરાટીભરી ઘટનાને પગલે સમગ્ર વિસ્તારમાં ભારે સનસનાટી મચી ગઈ છે.   

ખુરશી પર બેઠેલા રમેશભાઈ પર જીવલેણ હુમલો

ઘટનાની વિગતો મુજબ, મૃતક સરકારી પ્લોટમાં જઈને શાંતિથી ખુરશી પર બેસીને મોરને દાણા નાખી રહ્યા હતા. આ દરમિયાન અચાનક કોઈ શખ્સે આવીને તેમના પર દાતરડા વડે જીવલેણ હુમલો કરી દીધો હતો. જેના કારણે રમેશભાઈ લોહીલુહાણ હાલતમાં ખુરશી પર જ ઢળી પડ્યા હતા અને ઘટનાસ્થળે જ તેમનું પ્રાણપંખેરું ઊડી ગયું હતું. આ ગંભીર દુર્ઘટનાની જાણ થતાં જ સેક્ટર-૨૧ પોલીસ સ્ટેશનનો કાફલો તાત્કાલિક ઘટનાસ્થળે દોડી આવ્યો હતો અને મૃતદેહને પોસ્ટમોર્ટમ અર્થે હોસ્પિટલ ખસેડીને વધુ તપાસ શરૂ કરી હતી.   

શંકાસ્પદ ચોકીદારની અટકાયત અને નાણાકીય લેવડ-દેવડની શંકા

પ્રાથમિક તપાસ અને આસપાસના લોકોની પૂછપરછના આધારે પોલીસે તે જગ્યાના શંકાસ્પદ ચોકીદારને રાઉન્ડઅપ કરીને તેની સઘન પૂછપરછ હાથ ધરી છે. તપાસ દરમિયાન એવા ચોંકાવનારા તથ્યો સામે આવ્યા છે કે રમેશભાઈ જે જગ્યાએ મોરને દાણા ખવડાવવા જતા હતા, ત્યાં ફરજ બજાવતા ચોકીદારના દીકરાના અભ્યાસના ખર્ચ માટે તેઓ આર્થિક મદદ કરતા હતા. વળી, આ ચોકીદારનો ગુનાહિત ઇતિહાસ હોવાનું અને તેણે અગાઉ પોતાની પત્નીની પણ હત્યા કરી હોવાનું સૂત્રો દ્વારા જાણવા મળ્યું છે. પોલીસની પ્રાથમિક તપાસમાં આ હત્યા પાછળ પૈસાની લેવડ-દેવડ મુખ્ય કારણ હોવાની પ્રબળ શંકા સેવાઈ રહી છે.   

પરિવાર વિદેશમાં હોવાથી પુત્રના આગમન બાદ અંતિમક્રિયા

ઉલ્લેખનીય છે કે મૃતક રમેશભાઈનો પુત્ર અને પુત્રી હાલ ઓસ્ટ્રેલિયામાં રહે છે. તેઓ દરરોજ મોરને દાણા ખવડાવવાના દ્રશ્યોના વીડિયો પણ સોશિયલ મીડિયા પર પોસ્ટ કરતા હતા. આ દુર્ઘટના અંગે તેમના પુત્ર અને પુત્રીને જાણ કરવામાં આવી છે. પુત્ર આવતીકાલે ગાંધીનગર પરત ફર્યા બાદ જ રમેશભાઈની અંતિમક્રિયા કરવામાં આવશે. હાલમાં સેક્ટર-૨૧ પોલીસે ચોકીદારની અટકાયત કરી હત્યાનો ગુનો નોંધવાની તજવીજ હાથ ધરી છે અને આ પાછળ અન્ય કોઈ વ્યક્તિ કે કારણ સંડોવાયેલું છે કે કેમ તે દિશામાં સઘન તપાસ ચલાવી રહી છે.