એશિયા-પેસિફિક ક્ષેત્રમાં વધતા તણાવ વચ્ચે, એક મોટા સમાચાર સામે આવ્યા છે. વિયેતનામના ડાનાંગ (Danang) એરપોર્ટના રનવે પર રશિયાના લશ્કરી વિમાનો પાર્ક કરેલા હોવાનું સેટેલાઇટ તસવીરોમાં જોવા મળ્યું છે. મંગળવારે (17 નવેમ્બર) લેવામાં આવેલી આ તસવીરોએ આંતરરાષ્ટ્રીય રાજકારણમાં હલચલ મચાવી દીધી છે, કારણ કે આ વિમાનોની હાજરીએ તાઇવાન અને જાપાનની વાયુસેનાને એલર્ટ કરી દીધી હતી.
કયા વિમાનો ત્યાં હાજર છે?
સૂત્રોના જણાવ્યા મુજબ, બુધવારે પણ ડાનાંગ એરપોર્ટના ટાર્મેક પર કુલ 4 રશિયન લશ્કરી વિમાનો હાજર હતા. જેમાં બે Tu-95 સ્ટ્રેટેજિક બોમ્બર્સનો સમાવેશ થાય છે, જેમને NATO દ્વારા "બિયર્સ" (Bears) નામ આપવામાં આવ્યું છે. તેમની સાથે બે લાંબા અંતરના ટેન્કર વિમાનો પણ પાર્ક કરેલા હતા.
રૉઇટર્સની તપાસ અને પુષ્ટિ
રૉઇટર્સ દ્વારા વિમાનોના માળખા અને પૂંછડીના ભાગની તપાસ કરીને તેમની ઓળખની પુષ્ટિ કરવામાં આવી છે. આ ઉપરાંત, સોશિયલ મીડિયા પર વાયરલ થયેલા અન્ય ફૂટેજમાં જોવા મળેલા ડાનાંગ એરપોર્ટના મેદાન, આસપાસની ઇમારતો અને રસ્તાના લેઆઉટ સાથે આ સેટેલાઇટ તસવીરો સંપૂર્ણપણે બંધબેસતી આવે છે, જે આ અહેવાલને વધુ મજબૂત બનાવે છે.
મહત્વપૂર્ણ આંતરરાષ્ટ્રીય બેઠકો પહેલાં ઘટના આ લશ્કરી ઉડાન એવા સમયે થઈ છે જ્યારે રશિયાના રાષ્ટ્રપતિ વ્લાદિમીર પુતિન આ સપ્તાહે યોજાનાર APEC સમિટમાં ભાગ લેવા માટે ચીનના શહેર શેનઝેન (Shenzhen) પહોંચવાના છે. સાથે જ, અમેરિકાના રાષ્ટ્રપતિ ડોનાલ્ડ ટ્રમ્પ સહિત અન્ય વિશ્વ નેતાઓ પણ ASEAN ની બેઠક માટે મનીલામાં એકત્રિત થયા છે. આ મહત્વપૂર્ણ રાજદ્વારી બેઠકો પહેલાં રશિયાના આ પ્રકારના લશ્કરી અભ્યાસ અને પડોશી દેશોની નજીક વિમાનોની હાજરીને લઈને અનેક તર્ક-વિતર્ક શરૂ થઈ ગયા છે.