અમદાવાદના પોશ ગણાતા આનંદનગર વિસ્તારમાં આવેલા એક પેઇંગ ગેસ્ટ (PG) હાઉસમાં અભ્યાસ કરતી વિદ્યાર્થિની સાથે સિક્યોરિટી ગાર્ડ દ્વારા દુષ્કર્મ આચરવામાં આવ્યાની અત્યંત ચોંકાવનારી ઘટના સામે આવી છે. મૂળ ઉત્તર પ્રદેશના અને માંડ અઠવાડિયા અગાઉ જ નોકરી પર રખાયેલા સિક્યોરિટી ગાર્ડે મોડી રાત્રે ધાબા પર ચાલવા ગયેલી માસૂમ વિદ્યાર્થિનીને હવસનો શિકાર બનાવી હતી. આ શરમજનક ઘટનાને પગલે સમગ્ર વિસ્તાર સહિત પીજીમાં રહેતી અન્ય વિદ્યાર્થિનીઓમાં ભારે દહેશત અને અસુરક્ષાની લાગણી વ્યાપી ગઈ છે.

મળતી વિગતો અનુસાર, પીડિત યુવતી અમદાવાદમાં રહીને ઇન્ટિરિયર ડિઝાઇનિંગનો અભ્યાસ કરે છે અને આનંદનગરના પીજીમાં રહે છે. ઘટનાની રાત્રે વિદ્યાર્થિની પોતાના રૂમમાંથી પીજીના ધાબા પર ચાલવા (વોક કરવા) માટે ગઈ હતી. આ દરમિયાન સુરક્ષાની જવાબદારી સંભાળતા સિક્યોરિટી ગાર્ડે તેની એકલતાનો ગેરલાભ ઉઠાવ્યો હતો. આરોપીએ પાછળથી આવીને વાયર વડે યુવતીના ગળામાં ટૂંપો દઈ દીધો હતો, જેના કારણે યુવતી પ્રતિકાર કરવાની સ્થિતિમાં રહી નહોતી. ત્યારબાદ નરાધમ ગાર્ડે તેની પર બળજબરીથી દુષ્કર્મ આચર્યું હતું.

બનાવ અંગેની જાણ થતાં જ આનંદનગર પોલીસ સહિત ઉચ્ચ પોલીસ અધિકારીઓનો કાફલો ઘટનાસ્થળે દોડી ગયો હતો. ગુનાની ગંભીરતાને ધ્યાનમાં રાખીને સ્થાનિક પોલીસ, એલસીબી (LCB) અને ક્રાઈમ બ્રાન્ચની ૧૦થી વધુ ટીમો બનાવીને ત્વરિત તપાસ ધમધમાવવામાં આવી હતી. ટેકનિકલ સર્વેલન્સ અને બાતમીદારોના નેટવર્ક આધારે પોલીસે ગણતરીના કલાકોમાં જ આરોપી ધર્મસિંહ રામશંકરસિંહ સિંહની ધરપકડ કરી લીધી હતી. પોલીસ તપાસમાં સામે આવ્યું છે કે આરોપી ઉત્તર પ્રદેશના હરદોઈ જિલ્લાનો વતની છે અને છ-સાત દિવસ પહેલાં જ ગાર્ડ તરીકે જોડાયો હતો.

આ ઘટના બાદ મહિલાઓની સુરક્ષા અને પીજી હાઉસિસમાં રાખવામાં આવતા સિક્યોરિટી સ્ટાફના પોલીસ વેરિફિકેશન સામે ગંભીર સવાલો ઊભા થયા છે. કોઈપણ જાતની પૃષ્ઠભૂમિની તપાસ વગર સિક્યોરિટી ગાર્ડ તરીકે નોકરીએ રાખી લેવાની બેદરકારીને કારણે આ દુર્ઘટના ઘટી હોવાનું પ્રાથમિક દ્રષ્ટિએ જણાઈ આવે છે. હાલમાં આનંદનગર પોલીસે આ મામલે ગુનો નોંધીને આરોપી સામે કાયદાકીય શિકંજો કસ્યો છે અને પીજી સંચાલકોની બેદરકારી અંગે પણ તપાસ હાથ ધરી છે.