ગુજરાત વહીવટી તંત્રમાંથી એક મહત્વપૂર્ણ સમાચાર સામે આવ્યા છે, જેમાં કેન્દ્ર સરકારમાં સેવાઓ આપી રહેલા ૧૯૯૯ બેચના સિનિયર આઈએએસ અધિકારી અજય ભાદુએ ગુજરાત સરકારમાં સત્તાવાર રીતે વાપસી કરી છે. રાજ્ય સરકાર દ્વારા તેમને ઉદ્યોગ અને ખાનગી વિભાગ હસ્તક મહત્વની જવાબદારી સોંપવામાં આવી છે. સરકાર દ્વારા જારી કરવામાં આવેલા આદેશ અનુસાર, અજય ભાદુની નિમણૂક ગુજરાત મિનરલ ડેવલપમેન્ટ કોર્પોરેશન (GMDC) લિમિટેડ, અમદાવાદના મેનેજિંગ ડિરેક્ટર તરીકે કરવામાં આવી છે. 

આ નિમણૂક થકી તેઓ રાજ્યના ખનન અને ઉદ્યોગ ક્ષેત્રના વિકાસને વેગ આપશે તેવી અપેક્ષા રાખવામાં આવી રહી છે. આ ફેરફારના ભાગરૂપે, અગાઉ જીએમડીસીના મેનેજિંગ ડિરેક્ટર તરીકેનો વધારાનો હવાલો સંભાળી રહેલા આઈએએસ અધિકારી રૂપવંત સિંહને આ વધારાના ચાર્જમાંથી સત્તાવાર રીતે મુક્ત કરવામાં આવ્યા છે. રૂપવંત સિંહ હવે તેમની અન્ય નિયુક્ત જવાબદારીઓ પર ધ્યાન કેન્દ્રિત કરશે.

અજય ભાદુના આગમન અને જીએમડીસીના વડપણમાં થયેલા આ ફેરફારથી કોર્પોરેશનની કામગીરીમાં વધુ પારદર્શિતા અને ઝડપ આવશે તેમ માનવામાં આવી રહ્યું છે. કેન્દ્ર સરકારના ડેપ્યુટેશન બાદ તેમની આ પરત ફરવાની વહીવટી વર્તુળોમાં પણ વ્યાપક ચર્ચા થઈ રહી છે.