શ્રીલંકામાં વીઝાની મુદત પૂર્ણ થઈ ગયા બાદ પણ ગેરકાયદેસર રીતે રોકાઈ રહેલા 21 વિદેશી નાગરિકોની ધરપકડ કરવામાં આવી છે, જેમાં 3 ભારતીય નાગરિકોનો પણ સમાવેશ થાય છે. શ્રીલંકા પોલીસના જણાવ્યા અનુસાર, તેમના સેન્ટ્રલ ક્રાઇમ બ્યુરો દ્વારા સોમવારે મોડી રાત્રે કોલંબોના મધ્ય ભાગમાં આવેલા મરાદાના વિસ્તારમાં દરોડા પાડીને આ તમામ વિદેશીઓની અટકાયત કરવામાં આવી હતી.

ધરપકડ કરાયેલા 21 વિદેશીઓમાં 12 ચીની નાગરિકો (જેમાં 2 મહિલાઓ સામેલ છે), 6 બાંગ્લાદેશી અને 3 ભારતીય નાગરિકો સામેલ છે. પોલીસ દ્વારા આ તમામ લોકોને આગળની કાનૂની કાર્યવાહી અર્થે અદાલતમાં રજૂ કરવામાં આવશે. જોકે, પોલીસે હાલ ધરપકડ કરાયેલા લોકો અંગે વધુ વિગતો જાહેર કરી નથી.

​​​​​​​ઉલ્લેખનીય છે કે, છેલ્લા કેટલાક મહિનાઓ દરમિયાન શ્રીલંકાના સત્તાવાળાઓ દ્વારા વીઝા નિયમોનો ભંગ કરનારા અનેક વિદેશી નાગરિકો સામે કડક કાર્યવાહી કરવામાં આવી છે. આ અગાઉ પણ પ્રવાસી (ટૂરિસ્ટ) વીઝા પર શ્રીલંકામાં રહીને સાયબર છેતરપિંડી અને ઓનલાઇન કૌભાંડોમાં સંકળાયેલા અનેક ચીની અને અન્ય દેશોના નાગરિકોની ધરપકડ કરવામાં આવી હતી.