કોઈમ્બતુરમાં કોલેજમાં અભ્યાસ કરતી વિદ્યાર્થિની તેના બોયફ્રેન્ડ સાથે એરપોર્ટ પાસેના નિર્જન વિસ્તારમાંથી પસાર થઈ રહી હતી ત્યારે રાતના સમયે 3 શકસ બાઈક પર ધસી આવ્યા હતા અને બોયફ્રેન્ડને પહેલા બહાર ખેચી તેને બેફામ માર માર્યો હતો, બાદમાં યુવતીને પણ બહાર લાવી આરોપીઓએ સામુહિક દુષ્કર્મ કર્યું હતું અને બાદમાં નાસી છુટ્યા હતા. આ ઘટનાની જાણ થતા પોલીસ કાફલો દોડી ગયો હતો અને ફૂટેજ સહિતના પુરાવાના આધારે તપાસ શરુ કરી તમામ આરોપીઓની ધરપકડ કરી ત્યારે આરોપીઓએ પોલીસ પર હુમલો કરતા પોલીસે વળતો પ્રહાર કર્યો હતો અને ફાયરીંગ કરતા મામલો ગરમાયો છે. પોલીસના જણાવ્યા અનુસાર, ધરપકડ કરાયેલા આરોપીઓની ઓળખ થવાસી, કરુપ્પાસ્વામી અને કાલીશ્વરન તરીકે થઈ છે. ત્રણેય આરોપીઓ શિવગંગાઈ જિલ્લાના રહેવાસી છે અને કોઈમ્બતુરમાં એક બાંધકામ કંપનીમાં કામ કરતા હતા.

ખાસ પોલીસ ટીમો આરોપીઓને શોધી રહી હતી. જ્યારે પોલીસે તેમને મંદિર પાસે ઘેરી લીધા, ત્યારે ત્રણેય આરોપીઓએ તેમના પર દાતરડાથી હુમલો કર્યો. હેડ કોન્સ્ટેબલ ચંદ્રશેખરને તેમના ડાબા હાથ અને કાંડામાં ઈજા થઈ. પોલીસે સ્વબચાવમાં ગોળીબાર કર્યો, જેમાં ત્રણેય આરોપીઓના પગમાં ઈજા થઈ. બાદમાં તેમની ધરપકડ કરવામાં આવી અને કોઈમ્બતુર જિલ્લા સરકારી હોસ્પિટલમાં દાખલ કરવામાં આવ્યા. ઘાયલ પોલીસ અધિકારીને પણ સારવાર માટે હોસ્પિટલમાં લઈ જવામાં આવ્યા.​​​​​​​

આખો કેસ શું છે

આ ઘટના રવિવારે રાત્રે બની હોવાનું કહેવાય છે. પોલીસ સૂત્રોના જણાવ્યા અનુસાર, પીડિતા, એક કોલેજ વિદ્યાર્થી, એક મિત્ર સાથે કારમાં બહાર ગઈ હતી. તેઓ પાંચ વર્ષથી સંબંધમાં હોવાનું કહેવાય છે. તેઓએ રાત્રિભોજન કર્યું અને પછી તે એકાંત વિસ્તારમાં થી પસાર થઈ રહ્યા હતા. ત્યારે ત્રણ અજાણ્યા માણસો મોટરસાઇકલ પર આવ્યા. તેઓએ પાર્ક કરેલી કાર પર પથ્થર ફેંક્યો, વિન્ડશિલ્ડ તોડી નાખ્યો અને બોયફ્રેન્ડને બહાર ખેંચી ગયા.હુમલાખોરોએ તેને છરીની અણીએ ધમકી આપી, અને જ્યારે યુવકે પ્રતિકાર કર્યો, ત્યારે તેઓએ તેને લાકડીઓ અને પથ્થરોથી માર માર્યો. તેને માથામાં ગંભીર ઈજાઓ થઈ હતી, જેના કારણે છ ગંભીર ઈજાઓ પર 28 ટાંકા લેવા પડ્યા હતા. યુવક થોડા સમય માટે બેભાન થઈ ગયો હતો. આ દરમિયાન, હુમલાખોરોએ યુવતીને બળજબરીથી કારમાંથી બહાર કાઢી હતી. તેમને એરપોર્ટથી લગભગ એક કિલોમીટર દૂર શેડમાં લઈ ગયા અને જ્યાં તેમણે તેના પર સામૂહિક બળાત્કાર ગુજાર્યો હતો. સવારે લગભગ 4:30 વાગ્યે, હુમલાખોરોએ કોઈને ન કહેવાની ધમકી આપીને છોડી દીધી હતી.

બોયફ્રેન્ડ રાત્રે 11:25 વાગ્યે ભાનમાં આવ્યો. તેણે ક્ષતિગ્રસ્ત કાર એરપોર્ટ રોડ તરફ હંકારી અને પસાર થતા લોકો પાસેથી મદદ માંગી. લોકોએ પોલીસને જાણ કરી, અને તેને તાત્કાલિક હોસ્પિટલમાં લઈ જવામાં આવ્યો, જ્યાં તેને હાલમાં મેડિકલ કોલેજમાં દાખલ કરવામાં આવ્યો છે. પીડિતાને ત્યજી દેવામાં આવી હતી કારણ કે પોલીસની ઘણી ટીમોએ વિસ્તારમાં શોધખોળ શરૂ કરી હતી. તેણી નજીકના રહેણાંક વિસ્તારમાં પહોંચી અને પોલીસને ફોન કર્યો. તેણીને ખાનગી હોસ્પિટલમાં દાખલ કરવામાં આવી છે. આ ઘટનાથી સમગ્ર તમિલનાડુમાં આક્રોશ ફેલાયો છે.

રાજકીય આક્ષેપબાજી શરુ

આ ઘટનાના ઘેરા પડઘા પડ્યા છે. એઆઈએડીએમકે મહાસચિવ ઇ. પલાનીસ્વામીએ શાસક સરકાર પર નિશાન સાધતા કહ્યું કે ડીએમકે ના શાસનમાં મહિલાઓની સલામતી સંપૂર્ણપણે જોખમમાં છે. એઆઈએડીએમકે ના શાસન દરમિયાન, તમિલનાડુ દેશનું સૌથી સુરક્ષિત રાજ્ય હતું, જ્યાં મહિલાઓ નિર્ભયતાથી જીવતી હતી.કેન્દ્રીય મંત્રી એલ. મુરુગને કહ્યું કે તમિલનાડુમાં મહિલાઓ વિરુદ્ધના જઘન્ય ગુનાઓમાં કોઈ ઘટાડો થયો નથી. આ ઘટના તેનું સ્પષ્ટ ઉદાહરણ છે. ભાજપના પ્રદેશ પ્રમુખ નૈનાર નાગેન્દ્રને આ ઘટના સામે રાજ્યવ્યાપી વિરોધ પ્રદર્શનની જાહેરાત કરી છે. દરમિયાન, કોઈમ્બતુર દક્ષિણના ધારાસભ્ય અને ભાજપ મહિલા મોરચાના પ્રમુખ વનાથી શ્રીનિવાસને કહ્યું કે આ ઘટના સરકારના શાસન પર વધુ એક કાળો ડાઘ છે.ભાજપ નેતા કે. અન્નામલાઈએ પણ આકરી પ્રતિક્રિયા આપી. તેમણે કહ્યું કે ડીએમકે સરકાર સત્તામાં આવી ત્યારથી રાજ્યમાં ગુનેગારોનો કાયદો અને પોલીસ પ્રત્યેનો ડર ઉઠી ગયો છે. પોલીસે હાલમાં ત્રણ આરોપીઓ સામે બળાત્કાર, અપહરણ અને હત્યાના પ્રયાસ સહિતના ગંભીર આરોપો હેઠળ કેસ દાખલ કર્યો છે. તપાસ ચાલુ છે, અને પોલીસ અધિકારીઓનું કહેવું છે કે આરોપીઓની પૂછપરછ બાદ વધુ ખુલાસાઓ થઈ શકે છે.