મુખ્ય ચૂંટણી કમિશનર સામે 10 ઓક્ટોબરના રોજ દિલ્હીના જંતર-મંતર ખાતે કોકરોચ જનતા પાર્ટી દ્વારા યોજાનારા વિરોધ-પ્રદર્શન પહેલા દિલ્હી પોલીસ અને પ્રશાસન દ્વારા લાદવામાં આવેલા સખત નિયંત્રણો સામે સુપ્રીમ કોર્ટે ભારે નારાજગી વ્યક્ત કરી છે. ચીફ જસ્ટિસ સૂર્યકાંતની ખંડપીઠે ટ્રાફિક અને મેટ્રો સ્ટેશનો બંધ કરવાના નિર્ણય પર તીખી ટિપ્પણી કરતાં જણાવ્યું હતું કે, કાયદો અને વ્યવસ્થા જાળવવી જરૂરી છે, પરંતુ તેના માટે સામાન્ય જનતાની અવરજવરને ઠપ કરવા જેવા અતિશય કડક પગલાં ન ભરી શકાય.

દિલ્હી પોલીસ દ્વારા રસ્તાઓ પર બેરિકેડિંગ કરવા, અનેક મેટ્રો સ્ટેશનો બંધ કરવા અને ટ્રેનોની આવનજાવન રોકવા સામે સવાલો ઉઠાવતા સુપ્રીમ કોર્ટે કહ્યું કે પ્રશાસનની જવાબદારી સુરક્ષા જાળવવાની છે, પરંતુ લોકોની સ્વતંત્રતા છીનવી શકાય નહીં. કોર્ટે ચિંતા વ્યક્ત કરી હતી કે દિલ્હી, ગુરુગ્રામ, નોઈડા અને ગ્રેટર નોઈડાથી આવતા હજારો મુસાફરો, વિદ્યાર્થીઓ, નોકરિયાતો અને વૃદ્ધો આ કડક પાબંધીઓના કારણે ભારે મુશ્કેલીનો સામનો કરી રહ્યા છે.

સુપ્રીમ કોર્ટે કેન્દ્ર સરકાર અને દિલ્હી પ્રશાસનને આદેશ આપ્યો છે કે બંધ કરવામાં આવેલા મેટ્રો સ્ટેશનોની સંખ્યામાં તાત્કાલિક ઘટાડો કરવામાં આવે અને લાદવામાં આવેલા નિયંત્રણોની ત્વરિત સમીક્ષા કરવામાં આવે. સુનાવણી દરમિયાન સીજેઆઈ સૂર્યકાંતે ટાંક્યું હતું કે, "દરેક વ્યક્તિ પાસે પોતાની કાર હોતી નથી. તમે બધું જ બંધ કરીને સામાન્ય લોકોને સાર્વજનિક પરિવહન સુવિધા વગર છોડી શકો નહીં."

​​​​​​​અદાલતે કેન્દ્ર સરકારને સ્પષ્ટપણે સુનિશ્ચિત કરવા જણાવ્યું છે કે 10 ઓક્ટોબરના વિરોધ પ્રદર્શન દરમિયાન દિલ્હી માટેની ટ્રેન સેવાઓ અને મેટ્રો ઓપરેશન પર સંપૂર્ણ પ્રતિબંધ રહેશે નહીં. કોર્ટે સ્પષ્ટ કર્યું હતું કે સુરક્ષા અને સામાન્ય નાગરિકોની સુવિધા વચ્ચે યોગ્ય સંતુલન જાળવવું જરૂરી છે. આ સમગ્ર મામલે વધુ સુનાવણી આગામી સોમવારે હાથ ધરવામાં આવશે.