સુરત શહેરમાં વરસી રહેલા ભારે વરસાદ વચ્ચે સુરત પોલીસની સરાહનીય અને બહાદુરીભરી કામગીરી સામે આવી છે. શહેરના સરથાણા વિસ્તારમાં આવેલા આદર્શ નિર્વાસિત શાળામાં પૂરના પાણી ઘૂસી જતાં શાળાના માસૂમ બાળકો અને સ્ટાફના સભ્યો અટવાઈ પડ્યા હતા. આ કપરી પરિસ્થિતિની જાણ થતાં જ સરથાણા પોલીસ મથકના જવાનો પોતાના જીવના જોખમે તાત્કાલિક મદદે દોડી ગયા હતા. પોલીસ જવાનોએ ઘૂંટણસમા પૂરના પાણી વચ્ચે દોરડાની મદદથી અત્યંત મુશ્કેલ ઓપરેશન પાર પાડીને એક-એક કરીને તમામ બાળકોને સુરક્ષિત રીતે બહાર કાઢ્યા હતા.

આ સફળ રેસ્કયૂ ઓપરેશન દરમિયાન શાળાના 37 બાળકો અને 12 સ્ટાફના સભ્યો સહિત કુલ 49 લોકોને સલામત સ્થળે ખસેડવામાં આવ્યા હતા. મુસીબતના સમયે દેવદૂત બનીને આવેલા સુરત પોલીસના આ માનવતાવાદી કાર્યની સ્થાનિક લોકો અને વાલીઓ દ્વારા ભારે પ્રશંસા થઈ રહી છે