થાઈલેન્ડની રાજધાની બેંગકોકમાંથી એક અત્યંત હૃદયદ્રાવક અને મોટી દુર્ઘટના સામે આવી છે. શનિવારે અહીં એક ભયાનક માર્ગ અને રેલ અકસ્માતમાં ટ્રેનની ટક્કર બાદ બસમાં જોરદાર આગ ફાટી નીકળી હતી. આ ભીષણ અકસ્માતમાં અત્યાર સુધીમાં ૮ લોકોના કમકમાટીભર્યા મોત થયા છે, જ્યારે ૨૫ જેટલા લોકો ગંભીર રીતે ઘાયલ હોવાનું સામે આવ્યું છે. ટક્કર એટલી જોરદાર હતી કે આસપાસના અન્ય વાહનો પણ તેની ઝપેટમાં આવી ગયા હતા.

ટક્કર બાદ વાહનો બન્યા આગનો ગોળો
સ્થાનિક પોલીસના જણાવ્યા અનુસાર, શનિવારે એક તેજ રફતાર ટ્રેને બસને જોરદાર ટક્કર મારી હતી. આ ટક્કર બાદ તરત જ બસમાં બ્લાસ્ટ સાથે ભીષણ આગ લાગી ગઈ હતી. આગની જ્વાળાઓ એટલી ઝડપથી ફેલાઈ કે તેણે આસપાસથી પસાર થઈ રહેલા અન્ય વાહનોને પણ પોતાની લપેટમાં લઈ લીધા હતા. સત્તાવાર માહિતી મુજબ, આ અકસ્માતમાં ટ્રેન અને બસ ઉપરાંત કેટલીક કાર અને મોટરસાઈકલ (બાઈક) પણ ભોગ બન્યા છે. ઘટનાને પગલે ચીસાચીસ અને નાસભાગ મચી ગઈ હતી.

યુદ્ધના ધોરણે બચાવ કામગીરી
ઘટનાની જાણ થતાં જ ફાયર બ્રિગેડની ગાડીઓ અને બચાવ દળ (Rescue Teams) ની મોટી ટુકડી તાત્કાલિક ઘટનાસ્થળે પહોંચી ગઈ હતી. ઇમરજન્સી સેવાઓના ભારે જહેમત અને વ્યાપક ઓપરેશન બાદ આગ પર કાબૂ મેળવી લેવામાં આવ્યો છે.

​​​​​​​અકસ્માતનું કારણ અકબંધ
આ ભયાનક આગ અને ટક્કર પાછળનું અસલી કારણ હજુ સુધી જાણી શકાયું નથી. ટ્રેન અને બસ વચ્ચે આ સિગ્નલની ખામીને કારણે થયું કે ડ્રાઇવરની બેદરકારીથી, તે હજુ સ્પષ્ટ થયું નથી. પોલીસે અકસ્માતના ચોક્કસ કારણો જાણવા માટે હાઈલેવલ તપાસ શરૂ કરી દીધી છે. તપાસકર્તાઓની ટીમ ઘટનાસ્થળેથી પુરાવા એકત્ર કરી રહી છે અને ક્ષતિગ્રસ્ત વાહનોની તપાસ કરવામાં આવી રહી છે જેથી આ જીવલેણ ટક્કર પાછળની વાસ્તવિકતા સામે આવી શકે. આ અકસ્માત બાદ સ્થાનિક રેલ અને રોડ ટ્રાફિકને ભારે અસર પહોંચી છે.