રાજ્યમાં સુરક્ષા વ્યવસ્થાને લઈને એક મોટા સમાચાર સામે આવ્યા છે. ગુજરાતની મુખ્યમંત્રી ઓફિસ (CMO) અને રાજ્યની સર્વોચ્ચ અદાલત એવી ગુજરાત હાઇકોર્ટને બોમ્બથી ઉડાવી દેવાની સનસનાટીભરી ધમકી મળતા સમગ્ર સરકારી તંત્ર અને પોલીસ બેડામાં ભારે દોડધામ મચી ગઈ છે. આ ધમકીભર્યા સંદેશા મળતા જ પોલીસ તંત્ર તુરંત જ સક્રિય થઈ ગયું છે અને સુરક્ષા દળો દ્વારા સંબંધિત પરિસરોમાં તાબડતોબ સઘન ચેકિંગ પ્રક્રિયા હાથ ધરવામાં આવી છે.

મળતી વિગતો અનુસાર, ગુજરાત હાઇકોર્ટને બપોરે ૧.૧૧ કલાકે બોમ્બથી ઉડાવી દેવાનો એક ધમકીભર્યો ઈ-મેઇલ મળ્યો હતો. ઘટનાની ગંભીરતાને ધ્યાને લઈને સોલા પોલીસ સ્ટેશનની ટીમ તેમજ બોમ્બ ડિસ્પોઝલ સ્કવોડ અને ડોગ સ્કવોડની વિષય નિષ્ણાત ટીમો તાત્કાલિક ધોરણે હાઇકોર્ટ સંકુલ ખાતે પહોંચી ગઈ હતી. વહીવટી તંત્ર અને સુરક્ષા એજન્સીઓ દ્વારા હાઇકોર્ટના ખૂણેખૂણાની બારીકાઈથી તપાસ શરૂ કરવામાં આવી છે. જોકે, આ તમામ સુરક્ષા ચેકિંગ વચ્ચે નાગરિકો અને વકીલોની સુવિધા માટે હાઇકોર્ટની તમામ કોર્ટમાં ન્યાયિક કામગીરી રાબેતા મુજબ ચાલુ રાખવામાં આવી છે.

હાઇકોર્ટ બાદ બપોરે ૩.૧૧ વાગ્યે રાજ્યના મુખ્યમંત્રી કાર્યાલય (CMO)ને પણ આવી જ રીતે બોમ્બ વિસ્ફોટ કરવાની ધમકી આપતો ઈ-મેઇલ પ્રાપ્ત થયો હતો. પ્રાથમિક માહિતી મુજબ આ ધમકીભર્યો ઈ-મેઇલ 'ખાલીસ્તાન નેશનલ આર્મી' નામના સંગઠન દ્વારા મોકલવામાં આવ્યો હોવાનું સામે આવ્યું છે. આ પ્રકારના ગંભીર ઈ-મેઇલ બાદ ગાંધીનગર અને અમદાવાદ પોલીસ સહિતની ઉચ્ચ સુરક્ષા એજન્સીઓ સંપૂર્ણ રીતે એલર્ટ મોડ પર આવી ગઈ છે.

હાલમાં સીઆઈડી ક્રાઈમ, સાયબર સેલ અને સ્થાનિક પોલીસની સંયુક્ત ટીમો દ્વારા આ ધમકીભર્યા ઈ-મેઇલનું આઈપી એડ્રેસ (IP Address) અને તેના મૂળ સ્ત્રોતને શોધવા માટેની ઊંડી ટેકનિકલ તપાસ ચલાવવામાં આવી રહી છે. ધમકી અફવા છે કે કોઈ મોટું કાવતરું, તે દિશામાં પણ તપાસ એજન્સીઓ ઝીણવટભરી તપાસ કરી રહી છે અને મહત્વપૂર્ણ સરકારી સ્થળોની સુરક્ષા વ્યવસ્થા પણ વધુ કડક બનાવી દેવામાં આવી છે.